E nehenehe anei te Bibilia e tauturu ia oe ia faaea i te rave i te raau taero?

I te mau matahiti atoa, e mirioni taata te pohe nei no te raau taero. Mai te maˈi pee Covid-19, ua rahi atu â teie tupuraa. Ua tauturu te paari o te Bibilia e rave rahi taata ia faaea i te rave i te raau taero. Mai te peu tera to oe fifi, e nehenehe te paari o te Bibilia e tauturu ia oe.a

I roto i teie tumu parau

No te aha e pee ai i te mau aratairaa Bibilia no te faaea i te rave i te raau taero?

Ia au i te mau aivanaa, pinepine e tuatihia te raveraa i te raau taero i te mau huru aau mai te moˈemoˈe anei, te hepohepo, te haapeapearaa e te ahoaho. E tauturu te Bibilia ia oe ia tiaturi papu e e nehenehe ta oe e faaruru i teie mau huru aau. E haapii atoa oe e nafea ia faatupu i te hoê auhoaraa piri e te Atua. (Salamo 25:14) Maoti te tauturu a te Bibilia, e haapaiuma oe i teie mau fifi o te ore e maraa ma to oe iho puai.—Mareko 11:22-24.

Maha ravea ta te Bibilia e horoa no te tiamâ mai

1. A haapii o vai Iehova.b (Ioane 17:3) O Iehova te Atua poiete e tei ia ˈna te puai otia ore. Hau atu â, o ˈna to oe metua i te raˈi î i te here. Te hinaaro nei oia e faafatata ˈtu ia oe no te tauturu ia oe. (Isaia 40:29-31; Iakobo 4:8) Te fafau nei oia i te hoê a muri aˈe no oe mai te peu e maiti oe i te riro ei hoa no ˈna.—Ieremia 29:11; Ioane 3:16.
2. A ani i te tauturu a Iehova. A pure i te Atua e a ani i te tauturu no te faaea i te rave i te raau taero ia riro oe ei taata “moˈa [aore ra, viivii ore] e te au i te Atua.” (Roma 12:1) Maoti to ˈna varua moˈa, aore ra puai ohipa, e horoa te Atua i te “puai o te hau ê i to te taata nei.” (Korinetia 2, 4:7; Luka 11:13) E tauturu teie puai ia oe ia faaea roa i te rave i te raau taero e ia faatupu i te “huru taata apî” mai to te Atua hinaaro.—Kolosa 3:9, 10.
3. A faaî i to oe feruriraa i te manaˈo o te Atua. (Isaia 55:9) E tauturu te Atua ia oe ia “faaapî i to . . . huru feruriraa,” aore ra ia taui to oe huru feruriraa, no te tiamâ mai i te raau taero. (Ephesia 4:23) E itehia te mau manaˈo o te Atua i roto i te Bibilia. No reira, mea faufaa ia taio tamau i te Parau a te Atua. (Salamo 1:1-3) E rave rahi tei maitai mai a fanaˈo ai i te tauturu no te taa i te Bibilia. (Ohipa 8:30, 31) Te pûpû nei te mau Ite no Iehova i te hoê haapiiraa Bibilia ma te tamoni ore. Te titau manihini atoa nei matou ia oe ia haere mai i ta matou mau putuputuraa, i reira oe e ite ai eaha ta te Bibilia e haapii ra e nafea e faaohipa ˈi i ta ˈna mau haapiiraa i roto i to tatou oraraa.
4. A maiti i te hoa maitai. E nehenehe to oe mau hoa e tauturu ia oe ia faaea aore ra ia rave i te raau taero. (Maseli 13:20) Te horoa nei te Atua i te mau hoa maitai i rotopu i te feia e haamori ia ˈna. Te hinaaro atoa nei oia ia riro ratou ei hoa no oe. (Salamo 119:63; Roma 1:12) A maiti maitai ta oe mau faaanaanataeraa, e nehenehe hoi oe e pee i te huru o te feia i roto i te mau video, te mau upaupa e te mau buka. A haapae i te mau mea atoa o te haafifi ia oe ia rave i te mea tia.—Salamo 101:3; Amosa 5:14.

Te mau aratairaa Bibilia o te tauturu ia faaea i te rave i te raau taero

Salamo 27:10: “Noa ˈtu e faarue to ˈu metua tane e to ˈu metua vahine ia ˈu, E farii mai Iehova ia ˈu.”

“Aita vau i ite o vai to ˈu papa, no reira vau i moˈemoˈe ai. I te taime râ a riro ai Iehova ei hoa papu o te here mau ia ˈu, ua taui roa to ˈu oraraa e ua upootia vau i nia i te raau taero.”—Wilby no Haiti.

Salamo 50:15: “A tiaoro ia ˈu i te tau ahoaho. E faaora vau ia oe.”

“Ehia taime, ua faaitoito teie irava ia ˈu ia tutava i te faaea i te rave i te raau taero, i te taime iho â râ a hema ai au. Ua tapea Iehova i ta ˈna parau.”—Serhiy no Ukraine.

Maseli 3:5, 6: “A tiaturi ia Iehova ma to aau atoa, E eiaha e turui i nia i to oe iho maramarama. A haapao i to ˈna manaˈo i roto i ta oe mau ohipa atoa e rave, E na ˈna e faatitiaifaro i to oe mau eˈa.”

“Ua tauturu teie mau irava ia tiaturi eiaha i nia ia ˈu iho tera râ i nia ia Iehova. Maoti to ˈna puai, ua taui roa to ˈu oraraa.”—Michele no Italia.

Isaia 41:10: “Eiaha e mǎtaˈu, tei pihai iho hoi au ia oe. Eiaha e haapeapea, o vau hoi to oe Atua. E haapuai au ia oe, oia mau, e tauturu vau ia oe, E mau iho â oe ia ˈu i to ˈu rima atau parau-tia.”

“E hepohepo rahi vau aita anaˈe ta ˈu raau taero. Ua haapapu teie parau, e tauturu te Atua ia hepohepo vau. Ta ˈna iho â i rave.”—Andy no Afirika apatoa.

Korinetia 1, 15:33: “Eiaha outou e vare. E ino te haerea maitai i te amuimuiraa i te feia iino.”

“Ua turai mai te mau amuimuiraa iino ia rave i te raau taero e ua matau roa vau i te reira. Ua tiamâ râ vau a faaea ˈi i te amuimui ia ratou e a faahoa ai i te feia e oraraa viivii ore to ratou.”—Isaac no Kenya.

Korinetia 2, 7:1: “E tamâ anaˈe ia tatou iho i te mau viivii atoa o te tino e o te feruriraa.”

“Ua faaitoito teie mau parau, ia vai viivii ore noa ta ˈu tino e ia faaea roa i te rave i te raau taero o tei tuino ia ˈu.”—Rosa no Colombie.

Philipi 4:13: “E puai to ˈu ia faaruru i te mau mea atoa maoti te horoa mai i te puai.”

“Ua ite au aita to ˈu e puai no te faaea i te rave i te raau taero, ua pure râ vau ia tauturu te Atua ia ˈu. Ua horoa mai oia i te puai hinaarohia e au.”—Patrizia no Italia.

Te tahi atu mau faatiaraa: Ua faaea ratou i te rave i te mau peu ino maoti te tauturu a te Bibilia

Joseph Ehrenbogen: Ua paari oia i te hoê vahi e mea rahi te mau ohipa iino. Mea na reira o ˈna i te matauraa i te inu hua i te ava, te puhipuhi i te avaava, te rave i te pakalolo e te raau taero puai mau. E rave rahi taime, ua fatata roa oia i te pohe. Te vai ra te hoê irava tei haapapu ia ˈna e nehenehe iho â o ˈna e taui. A taio i to ˈna aamu i roto i te tumu parau “Ua haapii au i te haafaufaa i te vahine e ia ˈu iho.”

Dmitry Korshunov: E ere i te mea ohie no ˈna no te faaea i te inu hua i te ava. E rave rahi taime ua hema o ˈna e ua haamata faahou i te inu hua i te ava. A mataitai i te video ‘Ua tâhiti roa vau i to ˈu oraraa’ no te ite eaha tei tauturu ia ˈna ia taui roa.

E opani anei te Bibilia te mau rapaauraa no te faaea i te rave i te raau taero?

Aita. Te haapapu ra te Bibilia: “E ere te taote no te feia oraora maitai, no te feia maˈi râ.” (Mataio 9:12) Te faaite ra te hoê Pu maimiraa no nia i te rave-hua-raa i te raau taero i Marite: “Te raveraa i te raau taero, e maˈi fifi mau ïa. No te tiamâ mai, e titauhia hau atu â i te hinaaro ia faaea aore ra i te haavî ia ˈna iho.” Papu roa, e mea puai aˈe te tauturu a te Atua i ta te taata hinaaro. Tera râ, noa ˈtu mea rahi tei faaea i te rave i te raau taero maoti te mau aratairaa Bibilia, mea titau-atoa-hia te tahi rapaauraa.c Ei hiˈoraa, te haamanaˈo ra o Allen: “I to ˈu haapaeraa i te ava, mauiui roa to ˈu tino. Ua ite atura vau e aita e navai noa te tauturu a te Bibilia, e titauhia râ ia rapaauhia vau.”

E opani anei te Bibilia ia faaohipahia te raau taero no te tahi maˈi?

Aita. Te faataa ra te Bibilia e e faaohipahia te ava no te faaora i te tahi mau maˈi aore ra no te faaiti mai i te mauiui o te taata e fatata i te pohe. (Maseli 31:6; Timoteo 1, 5:23) E faaohipahia te raau taero no te tamǎrû te mauiui. Mai te ava râ, e nehenehe tatou e matau roa i te reira. A ara ïa a rave ai i teie mau raau tamǎrû i te mauiui.—Maseli 22:3.

a Teie tumu parau, no nia ïa i te faaearaa i te rave i te raau taero. E nehenehe râ e faaohipa i teie mau aratairaa Bibilia no te faaea i te inu hua i te ava, te puhipuhi i te avaava, te amu rahi i te maa, te pere moni, te mataitai i te mau hohoˈa faufau aore ra i te haere tamau i nia i te reni faahoaraa.

b Iehova, te iˈoa ïa o te Atua. (Salamo 83:18) A hiˈo i te tumu parau “O vai o Iehova?”

c E rave rahi pu rapaauraa, fare maˈi, e porotarama rapaauraa te tauturu mai. Na te taata tataitahi e hiˈopoa maite i te mau huru rapaauraa e e maiti eaha te mea maitai aˈe no ˈna.—Maseli 14:15.