Te mau aueueraa fenua rahi: Eaha ta te Bibilia i tohu?

I te mau matahiti atoa, e rave rahi tausani aueueraa fenua te tupu nei. E ere te rahiraa i te mea puai. Vetahi râ, ua vavahi-roa-hia ïa te tahi mau vahi e mea rahi te taata o te mauiui nei e o tei pohe. I te tahi taime, e itehia te miti faaî i muri iho o te haapohe e rave rahi taata tei ora ra na te pae miti. Ua tohu anei te Bibilia i teie mau aueueraa fenua rahi?

I roto i teie tumu parau

• Ua tohu anei te Bibilia i te mau aueueraa fenua?

• Te faatupu ra anei te mau aueueraa fenua e tupu nei i teie mahana i te mau parau tohu Bibilia?

• Eaha ta te parau tohu Bibilia no nia i te mau aueueraa fenua e faaara mai ra?

• Manaˈo hape no nia i te parau tohu Bibilia e te mau aueueraa fenua

Ua tohu anei te Bibilia i te mau aueueraa fenua?

Ua faahiti Iesu i te mau aueueraa fenua i roto i te hoê parau tohu papaihia i roto i te Bibilia. E nehenehe ta tatou e taio i ta ˈna i parau i roto i teie na buka Bibilia e toru i muri nei:

“E aro hoi te tahi nunaa i te tahi atu nunaa e te tahi faatereraa i te tahi atu faatereraa, e e tupu te oˈe e te aueueraa fenua i tera e tera vahi.”—Mataio 24:7.

“E aro hoi te tahi nunaa i te tahi atu nunaa e te tahi faatereraa i te tahi atu faatereraa, e tupu te aueueraa fenua i tera e tera vahi e e tupu atoa te oˈe. E haamataraa teie o te mauiui rahi.”—Mareko 13:8.

“E tupu te aueueraa fenua rahi, e i tera e tera vahi te oˈe e te maˈi pee. E ite-atoa-hia te mau mea riaria e te mau tapao rahi no te raˈi mai.”—Luka 21:11.

Ua tohu Iesu e tupu “te aueueraa fenua rahi” “i tera e tera vahi” i te taime e tupu atoa ai te mau tamaˈi, te oˈe e te mau maˈi pee. Ia tupu teie mau mea atoa, papu ia tatou e te ora ra tatou i te “anotau hopea o te ao nei” aore ra “te mau mahana hopea.” (Mataio 24:3; Timoteo 2, 3:1) Ia hiˈopoahia te Bibilia, ua haamata “te mau mahana hopea” i 1914 e aita i hope atura.

Te faatupu ra anei te mau aueueraa fenua e tupu nei i teie mahana i te mau parau tohu Bibilia?

E. Te tuati ra te parau tohu a Iesu, tera atoa no nia i te mau aueueraa fenua, i ta tatou e ite nei i to tatou nei tau. Mai 1914, ua hau atu i te 1 950 aueueraa fenua rahi tei tupu e o tei haapohe hau atu e piti mirioni taata.a Teie te tahi mau hiˈoraa.

2004—Miti Initia. Ua faatupu te hoê aueueraa fenua i te faito puai 9,1 i te hoê miti faaî tei naea ahuru ma piti fenua e tei haapohe hau atu e 225 000 taata.

2008—Taina. Ua vavahi te hoê aueueraa fenua i te faito puai 7,9 i te mau oire e oire iti, e te manaˈohia ra e 90 000 taata tei pohe, fatata e 375 000 tei pepe e e mirioni taata aita e fare faahou to ratou.

2010—Haïti. No te hoê aueueraa fenua i te faito puai 7,0 e e rave rahi aueueraa puai tei tupu i muri iho, ua hau atu i te 300 000 taata tei pohe e ua hau atu i te hoê mirioni taata aita e fare faahou to ratou.

2011—Tapone. No te hoê aueueraa fenua i te faito puai 9,0 e te mau miti faaî i tupu i muri mai, te manaˈohia ra e 18 500 taata tei pohe, e ua hau atu i te hanere tausani atu â taata tei tuuhia i te tahi atu vahi no te mea ua ino te fare atomi i Fukushima. Ua atâta atura ïa i te ora i reira. Ahuru matahiti muri iho, fatata e 40 000 taata tei ore â e nehenehe e hoˈi i to ratou fare i Fukushima, no te mea mea atâta noa â ia ora i ǒ.

Eaha ta te parau tohu Bibilia no nia te mau aueueraa fenua e faaara mai ra?

Te faaara mai ra te parau tohu Bibilia no nia i te mau aueueraa fenua i te mea e fatata i te tupu. Ua parau Iesu: “Ia ite outou i teie mau mea ia tupu, ua fatata ïa te Faatereraa arii a te Atua.”—Luka 21:31.

Te faataa ra te Bibilia eaha te Faatereraa arii a te Atua. E faatereraa mau te reira i nia i te raˈi e o Iesu Mesia te Arii. Ua haapii Iesu i ta ˈna mau pǐpǐ ia pure no tera Faatereraa arii.—Mataio 6:10.

I raro aˈe i te Faatereraa arii a te Atua, eita te Atua e vaiiho faahou i te mau ati natura mai te mau aueueraa fenua e haamauiui i te taata. (Isaia 32:18) Hau atu â, e faaore roa o ˈna i te mau mauiui pae tino e pae aau faatupuhia e te mau aueueraa fenua ta tatou e ite nei i teie mahana. (Isaia 65:17; Apokalupo 21:3, 4) No te ite atu â, a taio i te tumu parau “Eaha ta te Faatereraa arii a te Atua e rave?”