Ia tairi anaˈe te ati

UA TAPAOHIA te senekele 20 e te mau ati rarahi, e na te taata iho i faatupu i te rahiraa o ratou. Area râ vetahi e ere ïa. Teie ta Iesu Mesia i tohu no to tatou nei tau: “E tia mai hoi te tahi fenua e aro mai i te tahi fenua, e te tahi basileia e aro mai i te tahi basileia; e oˈe hoi, e te maˈi, e e aueue fenua i tera vahi, i tera vahi.” (Mataio 24:7) Parau mau, o te taata te tumu o te mau tamaˈi e te oˈe, e ere râ o ˈna te tumu o te mau aueueraa fenua. Oia atoa, noa ˈtu e na te ohipa a te taata i faatupu i te mau ati pape pue, eita râ o ˈna e faahapahia no te mau aueueraa fenua. E ere atoa no te taata te hape i tupu ai te mau mataˈi puahiohio aore ra te mau paainaraa o te mouˈa auahi.

Noa ˈtu eaha te tumu, te faaite ra te mau ati natura e mea haihai mau â te taata, e mea paruparu oia i mua i te mau puai natura maere. E au ra e e huru ino ore e te etaeta to teie fenua, oia hoi to tatou faaearaa. Ia aueue râ oia, ia î hoi i te pape pue, aore ra ia farara mai te mataˈi puai o te faatahuri oioi mai te puai o te hoê paainaraa, e ore roa taua huru ino ore ra.

Ua faatupu te mau ati natura e rave rahi haamâuˈaraa e e rave rahi taata atoa tei pohe i te roaraa o te senekele 20. E nehenehe anei e arai i te reira? Aita anei e ravea no te faaiti mai i te mau faahopearaa iino mau? Eaha ta tatou tataitahi e nehenehe e rave no te paruru ia tatou iho? Aita iho â ïa e tiaturi-faahou-raa to tatou ia tairi anaˈe te ati? E mauiui noa anei te huitaata nei? E tauaparauhia teie mau uiraa i roto i te mau tumu parau i mua nei.