Mai te aha te oraraa i muri aˈe i te COVID-19? E nehenehe te Bibilia e tauturu?

“E hinaaro tatou pauroa ia hoˈi faahou mai to tatou oraraa mai na mua ˈˈe.”—Angela Merkel, te Faatere o Heremani.

Te ite ra paha oe tae roa mai i teie mahana, te fifi noa ra te oraraa o te taata na te ao atoa nei no te COVID-19. Eita e ore, te hinaaro atoa ra oe ia hoˈi faahou mai to tatou oraraa mai na mua ˈˈe. Eaha râ ta te taata e hinaaro mau ra?

• E ora mai na mua ˈˈe. Te hinaaro ra vetahi e farerei i te taata mai na mua ˈˈe, e tauahi aore ra e aroha rima. Hinaaro atoa ratou e tere haere na te ara. Ua parau te taote Anthony Faucia: “No vetahi, te oraraa mai na mua ˈˈe, o te haereraa ïa e tamaa e e faaanaanatae i rapae aore ra te raveraa i te ohipa mai tera te huru.”

• E taime tano no te haamaitai i te oraraa. No vetahi, e taime tano tera no te taui i te oraraa ia maitai atu â te reira i na mua ˈˈe. No ratou, mea rahi te mau mea e titauhia ia taui. Ei hiˈoraa, eiaha te taata ia horoa rahi faahou i to ratou taime e puai no te ohipa, eiaha te taata ia hiˈo-ino-faahou-hia no to ratou iri aore ra to ratou tiaraa totiare, e ia tauturu-atoa-hia e rave rahi atu â taata ia ore ratou ia topa i roto i te maˈi i te pae o te feruriraa. Ua parau o Klaus Schwab, te taata i haamau i te rururaa no te haamaitai i te imiraa faufaa na te ao: “Ua riro te COVID-19 ei ravea no te feruri i to tatou oraraa, e nafea ia taui i ta tatou huru hiˈoraa i teie ao e ia rave i te mau tauiraa e titauhia.”

Area no vetahi, ua ino roa to ratou oraraa no te maˈi pee, aita teie feia e manaˈo ra e nehenehe ratou e ora faahou mai na mua ˈˈe. E rave rahi hoi o ratou tei ere i te ohipa e to ratou fare, te vai ra tei maˈihia e te mea ino roa ˈtu, ua pohe tei herehia.

Eita tatou e nehenehe e ite papu eaha te tupu i muri aˈe i teie maˈi pee. (Koheleta 9:11) Tera râ, e nehenehe te Bibilia e tauturu mai ia faatano i ta tatou huru hiˈoraa no to tatou ananahi, i mua iho â râ i te mau tupuraa manaˈo-ore-hia. Hau atu â, te faaite ra te Bibilia i te hoê a muri aˈe papu e te faahiahia mau.

Te auraa mau o te maˈi pee COVID-19

Mea maoro to te Bibilia faaiteraa e tupu te maˈi pee i te roaraa o “te anotau hopea o te ao nei.” (Luka 21:11; Mataio 24:3) Ia haamanaˈo tatou i te reira, e hiˈo tatou i te maˈi pee COVID-19 ei tuhaa o te mau tupuraa ta te Bibilia i tohu aˈena, mai te tamaˈi, te aueueraa fenua rahi e te oˈe.

Te faufaaraa ia ite: Noa ˈtu e maitai rii mai te tupuraa na te ao, te faaara mai ra te Bibilia te ora nei tatou i te “tau ino mau ïa e te fifi ia faaruru.” (Timoteo 2, 3:1) Eiaha ïa tatou ia manaˈo eita tatou e roo-faahou-hia i te fifi.

Teie te manaˈo papu ta te Bibilia e horoa ra: E ino roa ˈtu â te oraraa i roto i teie ao, fatata râ te hoê tauiraa rahi i te tupu. Eaha tera tauiraa rahi?

Te hoê a muri aˈe faahiahia mau

Aita noa te Bibilia i faaite atea i te mau fifi rahi ta tatou e faaruru nei, ua tohu atoa mai râ i te oraraa maitai ta tatou e fatata i te fanaˈo. Te faaite ra te Bibilia, tera a muri aˈe, e ere na te faatereraa taata e horoa mai, na te Atua râ. Teie tei fafauhia: “E tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui.”—Apokalupo 21:4.

Ua fafau te Atua ra o Iehovab: “Inaha, te hamani nei au i te mau mea apî atoa.” (Apokalupo 21:5) E faaore te Atua i te mau fifi na te ao atoa nei, oia atoa te mau fifi ta te maˈi pee i faarahi atu â.Ua fafau te Atua i te horoa mai:

• Te hoê tino e te hoê feruriraa tia roa, aita e maˈi e e pohe faahou.—Isaia 25:8; 33:24.

• Te hoê ohipa e mauruuru mau ai te taata, eiaha faahou râ te ohipa o te faarohirohi roa ino.—Isaia 65:22, 23.

• E oraraa fanaˈo to te taata atoa, aita faahou e taata veve e te pohe i te poia.—Salamo 72:12, 13; 145:16.

• Eita te taata e haamanaˈo faahou i te faahoruhoru i to ratou aau e e fanaˈo ratou i te tiaturiraa e tia faahou mai te feia pohe.—Isaia 65:17; Ohipa 24:15.

Te faufaaraa ia ite: Te parau ra te Bibilia: “Teie tiaturiraa to tatou, mai te hoê ïa tutau no to tatou ora.” (Hebera 6:19) Eita tatou e aueue mai te peu te vai ra ia tatou tera tiaturiraa, oia hoˈi e fanaˈo tatou i te hoê oraraa maitai aˈe i mua nei. Maoti tera tiaturiraa, e faaea hau noa tatou e eita atoa e haapeapea rahi noa ˈtu te mau tupuraa fifi ta tatou e faaruru nei.

E nehenehe mau anei râ oe e tiaturi i ta te Bibilia e fafau ra? A hiˈo i te tumu parau “E parau mau ta te Bibilia e faaite ra.”

Aratairaa Bibilia o te tauturu mai i muri aˈe i te maˈi pee

• A haafaufaa i te ora

  Irava Bibilia: “E faaherehere te paari i te ora o to ˈna fatu.”—Koheleta 7:12.

  Eaha te auraa no oe? A faaite i te paari i roto i ta oe mau faaotiraa no te paruru ia oe ia ore oe ia roohia i te maˈi. A hiˈopoa i te tupuraa i to oe fenua, a hiˈo atoa i te mau faatureraa i te pae o te ea e te arairaa o te maˈi, te mau numera o te feia tei roohia i te maˈi e te rahiraa taata o tei farii i te mau patia arai atoa.

• A vai ara

  Irava Bibilia: “E haapao maitai te taata feruriraa paari e e fariu ê oia i te ino, mea tâuˈa ore râ te maamaa e e tiaturi rahi roa oia ia ˈna.”—Maseli 14:16.

  Eaha te auraa no oe? A tamau i te rave i te titauhia no te paruru i to oe ea. Te tiaturi nei hoˈi te mau aivanaa e vai maoro mai te COVID-19.

• A tiaturi noa i te mau haamaramaramaraa papu

  Irava Bibilia: “E tiaturi te taata vare hanoa i te mau parau atoa, e haapao maitai râ te taata feruriraa haroˈaroˈa i to ˈna mau taahiraa tataitahi.”—Maseli 14:15.

  Eaha te auraa no oe? A feruri maite eaha te aˈoraa ta oe e pee. Mea faufaa no te mea, e nehenehe te hoê haamaramaramaraa tano ore e turai ia oe ia rave i te faaotiraa e ino roa ˈi to oe ea.

• A tapea i te hoê feruriraa maitai

  Irava Bibilia: “Eiaha e parau: ˈNo te aha mea au aˈe te mau mahana na mua ˈˈe i teie mau mahana nei?,ˈ e ere hoi na roto i te paari oe e ui ai i te reira.”—Koheleta 7:10.

  Eaha te auraa no oe? A mauruuru i to oe tupuraa i teie mahana. Eiaha e feruri noa i te oraraa na mua ˈtu i te maˈi pee e eiaha e tiatonu i nia i te mau mea o ta oe e ore e nehenehe faahou e rave no te maˈi pee.

• A faatura ia vetahi ê

  Irava Bibilia: “A faatura i te mau huru taata atoa.”—Petero 1, 2:17.

  Eaha te auraa no oe? Mea taa ê te huru o te taata atoa i mua i te maˈi pee e te mau fifi ta ˈna i faatupu. A faatura i to vetahi ê manaˈo, eiaha râ e taui i te mau faaotiraa maitai ta oe i rave. A tâuˈa atoa i te feia o tei ore i farii i te patia arai, te feia ruhiruhia e tei roohia i te maˈi rahi.

• A faaite i te faaoromai

  Irava Bibilia: “E faaoromai e e hamani maitai te here.”—Korinetia 1, 13:4.

  Eaha te auraa no oe? A hamani maitai ia vetahi ê ia faaite mai te tahi e te haapeapea ra o ˈna i te rave faahou i te hoê ohipa ta ˈna i matau na i te rave na mua ˈˈe i te maˈi pee. Mai te peu e tauihia aore ra e faaorehia te mau faatureraa, a faanaho i ta oe ohipa ia au i te maraa ia oe.

Ua tauturu te Bibilia i te taata

E tamahanahanahia te mau Ite no Iehova na roto i te parau fafau Bibilia no te hoê a muri aˈe faahiahia mau e e tauturu te reira ia ratou ia ore ia tiatonu i nia i te maˈi pee. E faaitoito-atoa-hia ratou na roto i te apiti-tamau-raa i te mau putuputuraa mai ta te Bibilia e faaue ra. (Hebera 10:24, 25) E nehenehe te taata atoa e apiti mai i te putuputuraa a te mau Ite no Iehova o tei faatupuhia na roto i te natirara i te roaraa o te maˈi pee.

I teie tau fifi mau, ua ite roa vetahi i te mau maitai ia amui e te mau Ite no Iehova no te haamori i te Atua. Ei hiˈoraa, ua farii te tahi vahine o tei roohia i te COVID-19 i te apiti i te mau putuputuraa a te mau Ite no Iehova na roto i te natirara. Ua tauturu tera mau putuputuraa ia ˈna noa ˈtu mea maˈimaˈi roa oia. I muri aˈe, ua na ô oia: “E utuafare mau teie no ˈu! Maoti te taioraa Bibilia, ua roaa ia ˈu te hau o te feruriraa e te hau o roto. E tauturu mai te reira ia ˈu ia tiatonu i nia i to ˈu tiaturiraa no a muri aˈe, eiaha râ i nia i to ˈu mau fifi. Mauruuru i te tautururaa mai ia ˈu ia faatupu i te hoê auhoaraa e te Atua, tera iho â ta ˈu i hinaaro noa na!”