E ore anei te ohipa totoaraa i te hoê mahana?

I muri aˈe i te hoê ohipa totoaraa, e ui paha oe ia oe iho: ‘Te tâuˈa ra anei te Atua? No te aha teie mau ohipa e tupu ai? E ore anei te ohipa totoaraaa i te hoê mahana? Nafea ia oaoa noa i roto i te oraraa noa ˈtu to ˈu mǎtaˈu?’ Te pahono ra te Bibilia i teie mau uiraa.

Eaha to te Atua manaˈo no nia i te ohipa totoaraa?

Mea riri na te Atua te haavîraa uˈana e te ohipa totoaraa. (Salamo 11:5; Maseli 6:16, 17) Ei tia no te Atua, ua aˈo Iesu i ta ˈna mau pǐpǐ a haa ˈi ratou na roto i te riri i nia ia vetahi ê. (Mataio 26:50-52) Te parau ra te tahi mau taata e rave ra i te mau ohipa iino, e e rave ratou i te reira no te Atua. Aita râ te Atua e farii ra i ta ratou mau ohipa. Hau atu, aita roa ˈtu o ˈna e faaroo ra i ta ratou mau pure.—Isaia 1:15.

Te tâuˈa ra te Atua i te feia atoa o te mauiui ra, mai te feia tei faaruru i te mau ohipa totoaraa. (Salamo 31:7; Petero 1, 5:7) Te faaite atoa ra te Bibilia e e faaore roa te Atua i te haavîraa uˈana.—Isaia 60:18.

Te tumu mau o te ohipa totoaraa

Te faaite mai ra te Bibilia i te tumu mau o te ohipa totoaraa a na ô ai: “[Ua] faatere . . . te taata i te taata no to ˈna iho ati.” (Koheleta 8:9) I te roaraa o te tau, ua rave te feia e mana to ratou i te ohipa totoaraa no te haamauiui ia vetahi ê. I mua i tera mau ohipa iino, ua rave atoa te feia tei haamauiuihia i te ohipa totoaraa.—Koheleta 7:7.

Te hopearaa o te ohipa totoaraa

Te fafau ra te Atua e e faaore roa o ˈna i te mǎtaˈu e te haavîraa uˈana e e haamau o ˈna i te hau i nia i te fenua. (Isaia 32:18; Mika 4:3, 4) Teie te mau ohipa ta te Atua e rave:

• E faaore roa o ˈna i te tumu mau o te ohipa totoaraa. E monohia te faatereraa taata i te Faatereraa arii a te Atua o te faatere i nia i te fenua taatoa. O Iesu Mesia te Arii e e rave o ˈna i te mau ohipa parau-tia i nia i te taatoaraa a faaore roa ˈtu ai o ˈna i te haavîraa uˈana. (Salamo 72:2, 14) I tera taime, eita hoê aˈe taata e faaohipa faahou i te ohipa totoaraa. “E au roa [te taata] i te rahi o te hau.”—Salamo 37:10, 11.

• E faaore roa o ˈna i te mau faahopearaa o te ohipa totoaraa. E rapaau te Atua i te feia tei faaruru i te mau faahopearaa o te ohipa totoaraa, i te pae tino anei aore ra i te pae o te huru aau. (Isaia 65:17; Apokalupo 21:3, 4) Te fafau atoa ra te Atua e e faatia mai o ˈna i te feia pohe i nia i te hoê fenua hau mau.—Ioane 5:28, 29.

Te horoa mai ra te Bibilia i te mau tumu papu no te tiaturi e e haa oioi te Atua. Tera râ, e ui paha oe: ‘No te aha aita te Atua i faaore aˈena i te ohipa totoaraa?’ No te ite i te pahonoraa, a mataitai i te video No te aha te Atua e vaiiho noa ˈi te mauiui?