E tuino roa te mataitairaa i te hohoˈa faufau i to outou faaipoiporaa

Ua mataitai o ˈna i te hohoˈa faufau e ua itehia o ˈna na ta ˈna vahine. Ua tatarahapa o ˈna e horeo atura e faaea i tera peu. Ta ˈna iho â i rave, aita râ o ˈna i tapea i ta ˈna parau. Ua rave faahou o ˈna i tera peu.

Tei roto anei outou i tera tupuraa? Mai te peu e e, ia taa ia outou e te mauiui ra to outou hoa faaipoipo ia mataitai outou i te hohoˈa faufau e mea tia ia haapae roa i tera peu.a

I roto i teie tumu parau

• Eaha te titauhia ia outou ia ite?

• Eaha ta outou e nehenehe e rave?

• Ia mataitai ta outou tane i te hohoˈa faufau

Eaha te titauhia ia outou ia ite?

E tuino roa te peu e mataitai i te hohoˈa faufau i to outou faaipoiporaa. E inoino roa paha te hoa faaipoipo hara ore a ore atu ai e tiaturi faahou i to ˈna hoa faaipoipo.b

Ia mataitai te tane i te hohoˈa faufau e nehenehe ta ˈna vahine e faaruru i to muri nei mau huru aau:

• Te taiva. Te na ô ra Sarah: “Mai te huru ra e ua faaturi noa ta ˈu tane.”

• Te taiâ. Ua parau te hoê vahine e no te peu a ta ˈna tane, ‘ua haamâ roa oia’ e e au ra e ere o ˈna i ‘te vahine haviti.’

• Te feaa. Te na ô ra Helen: “E moemoe noa vau i te mau ohipa atoa ta ta ˈu tane e rave.”

• Te haapeapea rahi. Te faatia ra Catherine: “Ua ino roa to ˈu oraraa i te haapeapea-noa-raa no ta ˈu tane.”

A feruri na: Te faaue ra te Bibilia i te tane faaipoipo ia here i ta ˈna vahine. (Ephesia 5:25) Mai te peu no ta ˈna mau raveraa e mauiui ta ˈna vahine, te auraa anei e mea here na ˈna i ta ˈna vahine?

Eaha ta outou e nehenehe e rave?

E ere i te mea ohie ia haapae i te peu e mataitai i te hohoˈa faufau. Te faatia ra Stacey: “Ua noaa i ta ˈu tane ia haapae i te avaava, te raau taero e te ava. Mea fifi ra no ˈna ia faaea i te mataitai i te hohoˈa faufau.”

Mai te peu e mea fifi atoa no outou ia haapae i tera peu, teie mai te tahi manaˈo tauturu.

• Ia taa ia outou no te aha mea ino te mataitairaa i te hohoˈa faufau. E turai tera peu i te taata ia haapao noa ia ˈna iho e e iti mai te here, te tiaturi e te taiva ore i roto i te faaipoiporaa. E haafaufaa ore atoa te reira ia Iehova, o ˈna hoi te tumu o te faaipoiporaa.

  Aratairaa Bibilia: “Ia tura te faaipoiporaa.”—Hebera 13:4.

• A amo i ta outou hopoia. Eiaha outou e parau: ‘Eita vau e mataitai i te hohoˈa faufau ahani mea haapao maitai ta ˈu vahine ia ˈu.’ E ere na ta outou vahine te hape. E riro te reira ei otoheraa na outou mai te peu aita outou i mauruuru i ta outou vahine.

  Aratairaa Bibilia: “E faahemahia râ te taata tataitahi ia umehia oia e to ˈna iho hinaaro tia ore a hema ˈtu ai oia.”—Iakobo 1:14.

• A faaite pauroa ˈtu i ta outou vahine. Te na ô ra Kevin: “I te mau mahana atoa, e faaite vau i ta ˈu vahine i te mau mea atoa ta ˈu i mataitai. A na reira ˈi, e taa ia ˈna e aita vau e huna ra i te hoê ohipa.”

  Aratairaa Bibilia: “Te hinaaro ra matou ia afaro noa to matou haerea i te mau mea atoa.”—Hebera 13:18.

• A vai ara noa. E nehenehe ta outou tane e hema faahou noa ˈtu mea maoro to ˈna haapaeraa i tera peu. Te faatia ra Kevin, faahitihia na mua ˈtu: “Ua noaa ia ˈu ia haapae i te peu e mataitai i te hohoˈa faufau i te roaraa ahuru matahiti, ua manaˈo ïa vau e eita vau e topa faahou i roto i tera herepata. Tera râ, e au te reira i te raau taero. Mai te huru ra e te taoto noa ra te reira a tiai noa ˈi te taime tano no te faaite faahou mai i to ˈna hohoˈa hairiiri.”

  Aratairaa Bibilia: “Te taata e manaˈo ra e te tia ra oia, ia ara maitai eiaha oia ia hiˈa.”—Korinetia 1, 10:12.

• A mau papu i mua i te faahemaraa. Eita e mana to outou i nia i te mau hinaaro tia ore, e nehenehe râ outou e maiti i te ore e hema. E ore oioi tera mau hinaaro mai te peu e haavî outou i to outou feruriraa.

  Aratairaa Bibilia: “Ia ite outou tataitahi e nafea ia haavî i to outou iho tino e tia ˈi ma te moˈa e te tura, eiaha ma te nounou e te hinaaro faufau vî ore.”—Tesalonia 1, 4:4, 5.

• A ape i te mau tupuraa atâta e hapa ai outou. Te na ôhia ra i roto i te buka Willpower’s Not Enough: “Tei roto anaˈe outou i te hoê tupuraa atâta, mai te huru ra ïa ua tutui outou i te tahi raau mati, toe noa ra te mori i reira e ura roa ˈi.”

  Aratairaa Bibilia: “Eiaha roa te tahi mea ino ia haavî ia ˈu.”—Salamo 119:133.

• Eiaha e toaruaru. E titauhia te taime, e rave rahi paha matahiti ia nehenehe to outou hoa faaipoipo e tiaturi faahou ia outou. E ere râ te auraa e aita e ravea faahou.

  Aratairaa Bibilia: “E faaoromai . . . te here.”—Korinetia 1, 13:4.