A faaafaro oioi i te fifi!
UA HAAMAUIUIHIA anei oe na te hoê taeae aore ra tuahine, a ore atu ai orua e afaro faahou i teie nei? E nehenehe orua e faaafaro i to orua peapea ia vai hoa noa orua. Mea faufaa râ ia haaviti orua i te na reira ma te manaˈo turai e tano.a
A feruri na ia fati anaˈe to oe ivi, mea mauiui roa. Ia rapaauhia râ te reira na te taote, e pee tera mamae i muri mai. Mai te peu râ e vaiiho noa oe mai tera, e mamae noa ïa oe. E te mea ino roa ˈtu, eita tera ivi fati e ora a fifi roa ˈtu ai oe i muri mai.
Mai tera ivi fati, e titauhia ia faaafaro oioi orua i to orua peapea. Aita anaˈe, e atea noa ˈtu â orua te tahi i te tahi. E rahi roa mai te inoino, a mutu roa ˈtu ai to orua auhoaraa. Ua parau hoi Iesu: “Ia ru oe i te faaafaro i to oe fifi.” (Mat. 5:25) No reira, a haere e farerei i to oe hoa, e ma te mǎrû a faaite atu i to oe manaˈo. E ere iho â ïa mea ohie, no te aha? Teie e piti tumu.
A tahi, eita paha oe e hinaaro e paraparau ia ˈna no te mea e haama oe ia faahiti-faahou-hia to orua peapea.b Te ohipa ïa i tupu i rotopu ia Euodia raua Sunetuhe. E au ra e aita teie na tuahine i faaafaro oioi i to raua peapea. Ua vai noa ïa tera fifi e ua tapae roa te reira i roto i te tariˈa o te aposetolo Paulo, tei Roma roa hoi o ˈna. Ua faaitoito ïa o ˈna ia raua ia faatupu i te hau. (Phil. 4:2) E nehenehe mau â e piti Kerisetiano e hoa faahou ia faatupu raua i te haehaa, ia haamahora raua i to raua aau, e ia faaore raua i te hapa a te tahi e te tahi.
A piti, e puta mai paha te manaˈo inaha no ˈna te hape, na ˈna ïa e haere mai e hiˈo ia oe. Teie râ, te mea faufaa roa ˈˈe, ia hoa faahou orua, e ere râ te haapapuraa no vai te hape. Eaha ta te taote e haapao na mua? Te rapaauraa i to oe ivi fati, e ere râ te titorotororaa ia oe mea nafea te tupuraa tera fifi. No reira, ia paraparau oe i to oe hoa, eiaha e tuatapapa no vai te hape. A haamanaˈo atu râ e mea poihere roa na oe to orua auhoaraa, e a haapao noa i tei titauhia ia rave ia afaro faahou orua.
Mai te peu ua peapea orua to oe taeae aore ra tuahine, a haere e farerei ia ˈna i teie nei. Ta oe fa: E faaafaro i to orua fifi, e ia hoa faahou orua. “Eiaha te mahana ia topa e te riri noa ra outou.” (Eph. 4:26) Ma te na reira, e vai noa ïa “te hau e tahoê ra ia outou.”—Eph. 4:1-3.
a Mai te peu e hapa rii noa, a paraparau noa ïa orua anaˈe e a faaore noa ˈtu i te hapa. (Mat. 5:23, 24) Mai te peu râ e peapea rahi, e titauhia ïa te tauturu a te mau matahiapo. (Mat. 18:17) Tera râ, e ani te hoê Kerisetiano i tera tauturu i muri iho noa i te faaohiparaa i te mau aratairaa i roto i te Mataio 18:15, 16.
b Mai te peu ua haamauiuihia tatou na te hoê hoa Kerisetiano, aita râ to tatou auhoaraa i mutu, e nehenehe tatou e faaoti e tapoˈi noa ˈtu i te hapa.—Mas. 26:20.