Uiraa a te feia taio

I teihea taime te mau nunaa e tuô ai “te hau e te ati ore”?

I roto i te “Uiraa a te feia taio” o te hoê Pare Tiairaaa tei piahia aita i maoro aˈenei, ua faataahia fatata Iehova i te tuu i roto i te aau o “na tara hoê ahuru” (pauroa te mau hau poritita) i “te manaˈo . . . e rave i to ˈna hinaaro,” oia hoi e horoa i ta ratou faatereraa na “te puaa taehae” uteute, te Hau amui. Pii-atoa-hia teie puaa taehae “te tii o te puaa taehae matamua.” (Apo. 13:14, 15; 17:3, 16, 17) Na teie ïa “na tara hoê ahuru” e te puaa taehae uteute e haamou roa i te haapaoraa hape ati aˈe te ao nei. I teihea ïa taime te mau nunaa e tuô ai “te hau e te ati ore”?b Na mua ˈˈe anei aore ra i muri iho i te haamouraa o te haapaoraa hape?—Tes. 1, 5:3.

Te tanoraa, aita tatou i ite eaha te taime e tuôhia ˈi “te hau e te ati ore.” Ahani tatou i ite, aita ïa e faufaa ia vai ara noa tatou. Teie râ, pinepine Iesu i te faaitoitoraa i ta ˈna mau pǐpǐ ia “vai ara.” (Mat. 24:42; 25:13; 26:41) E hiˈopoa mai ïa tatou i te parau tohu ta te aposetolo Paulo i faahiti i roto i ta ˈna rata no te amuiraa no Tesalonia.

Teie ta Paulo i papai: “I te taime e parau ai ratou: ‘Te hau e te ati ore!’ ei reira iho e haamouhia ˈi ratou ma te manaˈo-ore-hia.” (Tes. 1, 5:2, 3) I faataahia na i roto i ta tatou mau papai i teie irava mai teie: E tuôhia “te hau e te ati ore” na mua rii noa ˈˈe i te ati rahi. E te ohipa matamua e tupu, o te haamouraa ïa o Babulonia rahi, oia hoi te taatoaraa o te mau haapaoraa hape. Ia faaroohia tera tuôraa, tera ïa te faaararaa e fatata roa te ati rahi i te tupu.

Teie râ, ua hiˈopoa-faahou-hia teie parau tohu. E au ra ïa e te vai ra te tahi atu tatararaa. Peneiaˈe e tuôhia “te hau e te ati ore” i muri iho te haapaoraa hape e haamouhia ˈi. Teie te tahi mau uiraa e nehenehe tatou e feruri:

Eaha te ohipa a te haapaoraa hape i roto i te mau tamaˈi? Te na ô ra te Bibilia: “Ua itehia i roto ia ˈna [“te vahine taiata rahi,” o Babulonia rahi ïa] te toto o . . . te feia atoa i haapohehia i nia i te fenua.” (Apo. 17:1, 5; 18:24) I te roaraa o te tau, ua turu noa tera vahine taiata rahi i te mau tamaˈi. E pinepine o ˈna te tumu i rahi ai te haavîraa uˈana, i pohe atoa ˈi e mirioni taata. O te tamaˈi ïa e te haavîraa uˈana ta te haapaoraa hape e faatupu, e ere râ te hau e te ino ore. E au ra ïa e tuô te mau nunaa “te hau e te ati ore” i muri iho noa ratou e haamou ai ia Babulonia rahi. Aita râ i papu roa ia tatou.

Ia tuôhia “te hau e te ati ore,” eaha te tupu i muri iho? Ua parau Paulo: “Ei reira iho e haamouhia ˈi ratou ma te manaˈo-ore-hia.” (Tes. 1, 5:3) E au ra ïa e tuô te mau puai poritita o te ao nei “te hau e te ati ore” i muri iho te haapaoraa hape e haamouhia ˈi. Inaha, i reira noa ratou e mou pauroa ˈi ma te manaˈo-ore-hia.

Mai te aha te huru o te mau tavini a Iehova ia tupu teie mau mea? Ua papai Paulo: “Taeae ma, aita outou i roto i te poiri a roohia ˈi outou e taua mahana ra mai te eiâ ra e roohia i te hitiraa mahana.” (Tes. 1, 5:4) A feruri na: Mai te peu e tuôhia “te hau e te ati ore” i muri iho i te haamouraa o te haapaoraa hape, e taa ïa i te mau tavini a Iehova fatata roa te mau nunaa i te haamouhia. E tae mai râ to ratou haamouraa mai te eiâ ra, oia hoi ma te ore e faaara mai.

Ta tatou noa i ite papu: Fatata roa “na tara hoê ahuru” e te puaa taehae uteute, tei horoahia ˈtu te faatereraa, i te haamou i te haapaoraa hape. O te haamataraa ïa o te ati rahi. Ua ite atoa tatou ia tae i te hoê taime, e tuô te mau nunaa “te hau e te ati ore.” I teihea ïa taime? E piti manaˈo ta tatou i hiˈopoa mai. A tahi: Peneiaˈe na mua rii noa ˈˈe i te haamouraa o te haapaoraa hape. A piti: Peneiaˈe e tuôhia tera poroi i muri iho te mau hau poritita e haamou ai i te haapaoraa hape. E tiai ïa tatou ia tupu taua parau tohu ra. Inaha, pinepine e taa maitai ia tatou te tahi mau parau tohu Bibilia i te taime e tupu ai te reira aore ra ua oti anaˈe i te tupu.—A hiˈo atoa i te Ioane 12:16.

Teie râ, te mea faufaa roa ˈˈe, e ere ïa te iteraa i teihea taime e tuôhia ˈi “te hau e te ati ore.” To tatou râ vai-taiva-ore-raa ia Iehova. No reira, “e vai ara” anaˈe ïa e “e feruri maite anaˈe,” ia ineine maitai hoi tatou noa ˈtu eaha te taime e tupu ai tei tohuhia.—Tes. 1, 5:6.