A mǎtaˈu i te Atua mai ia Obadia

E tiaau Obadia no te utuafare o te arii ino ra o Ahaba, o tei vaiiho noa i te haamoriraa ino a Baala i Iseraela. E mǎtaˈu rahi râ to Obadia ia Iehova “mai to ˈ[na] apîraa mai â.” (Arii 1, 18:1-13) No reira, i to te arii vahine ra o Iezebela faaueraa ia haapohehia pauroa te mau peropheta a Iehova, ua haa Obadia ma te itoito. Ua faatapuni o ˈna 100 peropheta e ua hopoi noa ˈtu oia i te faraoa e te pape na ratou i tera taime oˈe rahi. Tera te itoito mau. Inaha, ia faatapuni hoê noa peropheta, mea atâta, eaha ˈtu â ïa 100! Eiaha atoa hoi o ˈna ia noaahia e na rahiraa hanere peropheta haavare a Ahaba raua Iezebela.—Arii 1, 18:19.

Eaha ïa te haapiiraa e huti mai i te hiˈoraa a teie tavini a Iehova? Parau mau, ua mǎtaˈu Obadia ia Ahaba. Mea rahi aˈe râ to ˈna mǎtaˈu ia Iehova. Mea na reira i noaa ˈi ia ˈna te itoito no te paruru i to ˈna mau taeae noa ˈtu e nehenehe o ˈna e haapohehia. E faatupu atoa ïa tatou i te mǎtaˈu ia Iehova, mai te peu iho â râ ua opanihia te haamoriraa mau i to tatou fenua. E noaa ïa ia tatou te puai no te tauturu i to tatou mau taeae e tuahine e faaruru ra i te fifi.