6-12 NO EPERERA 2026
HIMENE 82 ‘Ia anaana to outou maramarama’
E nafea ia tauturu i te fetii e ere i te Ite no Iehova?
“Eiaha ïa tatou e faaea i te rave i te mea maitai.”—GAL. 6:9.
MANAˈO FAUFAA
Eaha te rave ia vai noa tera taamuraa to oe e te fetii, e ia anaanatae mai ratou i te parau mau?
1-2. Ia oe i haapii i te Bibilia, mai te aha te huru o to oe mau fetii?
UA PARAU Iesu i te hoê taata tei hinaaro e pee ia ˈna: “A hoˈi i to oe fare, i to oe mau fetii, e a faatia ˈtu i te mau mea atoa ta Iehova i rave no oe.” (Mar. 5:19) Na roto i teie parau, te taa ra ia tatou te tahi ohipa faufaa roa: to tatou hinaaro e faaite i te parau apî oaoa i te feia herehia e tatou.
2 Te haamanaˈo ra anei oe i to oe huru a haapii ai i te Bibilia? Aita oe i hinaaro e tapea noa teie mau haapiiraa no oe! Tera râ, aita paha to oe mau fetii i anaanatae roa mai. Aore ra aita ratou i afaro i ta oe huru paraparau, ia oe i faataa ˈtu te mea ta oe i haapii mai. Mai te peu tera ta oe e faaruru ra, e tauturu mai teie tumu parau ia imi i te hau e to oe fetii, e ia vai noa tera taamuraa i rotopu ia outou. I te hoê â taime, e ara oe eiaha e ofati i te mau ture aveia a Iehova.
3. Eaha ta tatou e hiˈopoa i roto i teie tumu parau?
3 I roto i teie tumu parau, e ite mai tatou: (1) E nafea te aumihi e turai ai ia tatou ia tauturu i te fetii e ere i te Ite no Iehova, noa ˈtu aita ratou e farii ra i te parau mau? (2) Te faufaaraa ia taa te tumu ratou e paraparau ai mai tera aore ra e rave ai i tera ohipa. (3) E nafea to tatou faaoromai e feruriraa maitai e tauturu ai i te fetii ia farii i te parau mau? (4) E e nafea ia faaite i to tatou here ia ratou?
A FAAITE I TE AUMIHI
4. Ua aha Iesu noa ˈtu aita te taata i tâuˈa i ta ˈna poroi?
4 Ua tamau noa Iesu i te poro, noa ˈtu aita te taata i tâuˈa i ta ˈna poroi. Ua faaau oia ia ˈna i te hoê taata faaapu vine tei atuatu maite i te hoê tumu suke aita e maa. (Luka 13:6-9) I to Iesu faahitiraa i teie faahohoˈaraa, ua tutava oia i te atuatu i te faaroo o te ati Iuda e toru matahiti te maoro. No te aha Iesu i tauturu noa ˈi ia ratou? No to ˈna aroha ia ratou. Ua faaite atu Iesu i te aumihi, e na te reira i tauturu ia ˈna ia faaoromai.
5. No te aha Iesu i aroha ˈi i te ati Iuda?
5 Ua aroha Iesu i te ati Iuda. Ua ite hoi o ˈna aita te mau tia haapaoraa i tauturu ia ratou ia faatupu i te faaroo mau i te Atua. I to ˈna iteraa i te ati Iuda, e au ratou i “te mau mamoe aita e tiai.” (Mar. 6:34) Hou to ˈna poheraa, ua taˈi Iesu a ite ai ia Ierusalema. Ua ite o ˈna e pohe te rahiraa o te taata i ǒ no te mea ua ere ratou i to ratou faaroo. (Luka 19:41-44) Mai ia Iesu, ia feruri tatou no te aha mea faufaa ia ite to tatou fetii i te parau mau, e hinaaro iho â tatou e tauturu ia ratou.
6. No te aha e titauhia ˈi ia faaite oe i te faaoromai? (Galatia 6:9)
6 A taio i te Galatia 6:9. Noa ˈtu aita â to tatou fetii i anaanatae atura i ta tatou poroi, e faaite tatou i te faaoromai a tamau noa ˈi i “te rave i te mea maitai.” Ua ite maitai tatou e titauhia te taime ia haapae roa te hoê taata i ta ˈna i manaˈo noa na e ia faatupu i te faaroo. Peneiaˈe mai tera atoa oe na mua ˈˈe, mai te feia ‘aita e tiaturiraa e aita e Atua i roto i teie nei ao.’ (Eph. 2:12) Mai te peu e tera iho â, eita e ore ua tauturu te hoê taata ia oe ia ite i te parau mau. No reira, ia faaite oe i te faaoromai i nia i to oe fetii, e nehenehe ïa oe e tauturu ia ratou ia haapii o vai Iehova.
TE TUMU RATOU E PARAPARAU AI MAI TERA AORE RA E RAVE AI I TERA OHIPA
7. No te aha te mau teina o Iesu i ore ai i tiaturi oioi ia ˈna?
7 Eita e ore ua faaroo te mau teina o Iesu i te mau semeio ta ˈna i faatupu i Galilea. (Luka 4:14, 22-24) Noa ˈtu râ, aita ratou i faatupu oioi i te faaroo ia ˈna. (Ioa. 7:5) No te aha? Aita te Bibilia e faaite ra. Tera râ, te faataahia ra no te aha aita te tahi ati Iuda i pee ia Iesu. Ua mǎtaˈu hoi vetahi aˈunei ratou e tuuhia ˈi i te hiti. (Ioa. 9:18-22) No te tahi atu, ua matau ratou ia Iesu mai to ˈna tamariiraa mai â. Aita ïa ratou i tiaturi e riro mai Iesu ei tia no te Atua. (Mar. 6:1-4) No teie mau tumu atoa paha i ore ai te mau teina o Iesu i tiaturi oioi ia ˈna. Peneiaˈe tei roto atoa to oe fetii i te hoê â tupuraa.
8. No te aha te fetii e taora parau aore ra e riri mai ai ia tatou?
8 A feruri no te aha ratou e taora parau aore ra e riri mai ai. To rotopu atoa paha te mau teina o Iesu i te fetii tei parau “ua maamaahia oia.” (Mar. 3:21) No te aha ratou i manaˈo ai mai tera? Peneiaˈe ua manaˈo to ˈna mau teina e ua rahi roa ta Iesu e rave nei. Inaha i te tahi taime, aita ta ˈna i nehenehe e tamaa no te mea e poro noa o ˈna i te taata. (Mar. 3:20) Tera atoa paha te manaˈo o to tatou mau fetii. Ua rahi roa ta tatou e rave nei ei Ite no Iehova. Mai te peu tera ta ratou e manaˈo ra, na tatou ïa e faaite e ua ite tatou e nafea ia vai aifaito noa i roto i to tatou oraraa.
9. Na te aha e tauturu i te fetii ia taui i to ratou manaˈo no nia i te mau Ite no Iehova? (Petero 1, 3:1, 2) (A hiˈo atoa i te hohoˈa.)
9 A faaite i te hamani maitai e te feruriraa aifaito. E nehenehe te manaˈo o te fetii no nia i te mau Ite no Iehova e taui maoti to tatou hamani maitai. (A taio i te Petero 1, 3:1, 2.) Ia haere te hoê tuahine i te putuputuraa aore ra i te pororaa, e nehenehe ta ˈna tane e ere i te Ite no Iehova e riri aore ra e manaˈo aita o ˈna e tâuˈahia ra. Ia ore ia tupu te reira, e faatano ïa tuahine i ta ˈna porotarama pae varua no te rave i te taime no ta ˈna tane. Ei hiˈoraa, e nehenehe o ˈna e poro i te taime mea ohipa roa ta ˈna tane aore ra aita anaˈe o ˈna to te fare. Ia faaite teie tuahine i te hoê feruriraa aifaito, peneiaˈe e taui te manaˈo o ta ˈna tane no nia i te mau Ite no Iehova.
E nehenehe te manaˈo o te fetii no nia i te mau Ite no Iehova e taui maoti to tatou hamani maitai (A hiˈo i te paratarafa 9)f
10. Ia faainohia mai tatou, e nafea ia pee i te hiˈoraa o Iesu?
10 Ia faaino mai te fetii, mea maitai eiaha e pahono atu. I to te taata parauraa e mea tamaa roa Iesu e mea inu oia i te uaina, aita o ˈna i imi i te ravea no te paturu i to ˈna roo. Ua faaitoito râ oia ia ratou ia hiˈo i to ˈna haerea. (Mat. 11:19) Ua faaite atoa Iesu na roto i ta ˈna mau faaotiraa e feruriraa aifaito to ˈna i roto i to ˈna oraraa. (A hiˈo atoa i te Ioane 2:2, 6-10.) Hoê â huru no oe, ia faainohia oe eiaha e pahono atu. A faaite râ na roto i to oe haerea mea aifaito oe e mea oaoa to oe oraraa. Ia ite ratou i te reira, e taa ia ratou mea hape tei parauhia no nia i te mau Ite no Iehova.
A FAAOROMAI E A TAPEA NOA I TE HOÊ FERURIRAA MAITAI
11. Noa ˈtu aita to ˈna mau taeae i tiaturi ia ˈna, ua aha Iesu?
11 Te faaite ra te mau Evanelia e ua faatupu Iesu i te faaoromai i nia i to ˈna mau teina. Ei hiˈoraa, ia ˈna i faatupu i ta ˈna semeio matamua i Kana, to reira atoa to ˈna mau taeae. (Ioa. 2:11, 12) Mai tei faahitihia na, aita to Iesu mau fetii i tiaturi ia ˈna. Noa ˈtu râ, ua tâuˈa noa Iesu ia ratou. Te faaite ra te Bibilia e fatata toru matahiti i muri iho i tei tupu i Kana, ua paraparau Iesu i to ˈna mau taeae ma te hamani maitai.—Ioa. 7:5-8.
12. Na te aha e tauturu ia tatou ia tapea noa i te feruriraa maitai?
12 Inaha ua taa maitai ia tatou to Iehova aroha hamani maitai, e tauturu te reira ia tatou ia tapea noa i te feruriraa maitai. Ia haamouhia te mau haapaoraa hape, e haamanaˈo paha to tatou fetii ua faaara ê na tatou ia ratou no nia i teie tupuraa.a (Apo. 17:16) E apiti atoa paha ratou ia tatou i roto i te haamoriraa ia Iehova, ua haamata anaˈe te ati rahi! E mai te peu te faaruru ra ratou i te fifi, e rave tatou i te mau mea atoa no te tauturu e no te faaitoito ia ratou. Ia ite mai ratou i to tatou here e hamani maitai, i reira paha ratou e farii ai i te parau mau.
A FAAITE I TO OE HERE IA RATOU
13. Noa ˈtu mea rahi ta tatou e rave nei no Iehova, ia ara tatou i te aha?
13 Noa ˈtu mea rahi ta tatou e rave nei no Iehova, eiaha to tatou fetii ia manaˈo aita to tatou e taime no ratou aore ra aita tatou e here faahou ra ia ratou. (Mat. 7:12) E nafea ia faaite i to tatou here ia ratou? Teie mai te tahi mau ravea.
14-15. Eaha te tahi ravea no te faaite i to tatou here i te fetii? A horoa i te hoê hiˈoraa.
14 Ia pinepine oe i te paraparau ia ratou e i te faaite i to oe here ia ratou. E faaite tatou i te here i te fetii ma te faaite eaha to tatou huru. Ei hiˈoraa, e nehenehe tatou e hapono i te tahi poroi, aore ra te tahi hohoˈa ia reva tatou e ia tamaa tatou e te mau hoa. E nehenehe atoa tatou e horoa i te ô na ratou, e papai i te tahi rata ia maitai mai to tatou taairaa e o ratou. Ia na reira tatou, e taa ïa ia ratou e mea here iho â na tatou ia ratou.
15 Teie te hiˈoraa o Anna, te hoê tuahine no Aramenia. Pinepine to ˈna mau fetii i te farerei no te faatupu i te mau mahana fanauraa aore ra no te tahi atu tumu. I to ˈna Anna riroraa mai ei Ite no Iehova, ua taiâ to ˈna fetii aˈunei o ˈna e faaea roa ˈi i te amuimui ia ratou. Ua haapeapea atoa ratou aˈunei o ˈna e fifihia ˈi no ta ˈna faaotiraa. Eaha ïa ta tuahine i rave? Te na ô ra o ˈna: “Ia haere au e farerei ia ratou e faatia ˈtu vau i ta ˈu e rave nei. E titau manihini atoa vau ia ratou i to ˈu fare e to ˈu mau hoa. I teie nei, ua matau roa ratou i to ˈu mau hoa e mea afaro maitai ratou te tahi i te tahi. I to ratou iteraa mea oaoa vau i roto i to ˈu oraraa, aita ratou i haapeapea faahou no ˈu. ”
16. Mea nafea Iesu i te faaiteraa i to ˈna here ia Iakobo? (A hiˈo atoa i te nota.)
16 A faaite e mea faufaa ratou no oe. I muri iho i to ˈna tia-faahou-raa, ua fa ˈtu Iesu i to ˈna taeae ra o Iakobo. (Kor. 1, 15:7) A feruri na i to Iakobo huru i tera taime. Eita e ore, ua putapû roa o ˈna i te iteraa i to Iesu here rahi ia ˈna. Ua haapapu atoa teie aparauraa ia Iakobo o Iesu te Mesia. I muri iho, ua paraparau Iakobo i to ˈna mau fetii e ua tauturu oia ia ratou ia taa o Iesu mau â te Mesia.b—Ohi. 1:14.
17. E nafea tatou ia faaohipa i te Roma 12:15? (A hiˈo atoa i te hohoˈa.)
17 A taio i te Roma 12:15. Ia faaite tatou e mea faufaa ratou no tatou, i te taime au e te taime fifi, e taui paha to ratou huru i nia ia tatou.c Ei hiˈoraa, ia fanauhia mai te hoê tamarii, e haapopou tatou ia ratou a horoa ˈtu ai i te tahi ô ei haapapuraa ua oaoa atoa tatou no ratou. Ia pohe tei herehia e ratou, oioi tatou i te tamahanahana ia ratou. E nehenehe atoa tatou e tauturu atu aore ra e hapono i te tahi rata no te faaitoito ia ratou. Eiaha e haamoˈe i te niuniu e i te haere pinepine e farerei ia ratou, i te taime oto iho â râ.
Ia faaite tatou e mea faufaa ratou no tatou, i te taime fifi, e taui paha to ratou huru i nia ia tatou (A hiˈo i te paratarafa 17)g
18. E nafea tatou ia pee i te hiˈoraa o Anederea?
18 Ia haamatau ratou i te tahi atu mau Ite no Iehova. I to Anederea papuraa o Iesu te Mesia, oioi o ˈna i te faaite atu i to ˈna taeae ra o Petero, ia nehenehe atoa o ˈna e farerei ia Iesu. (Ioa. 1:40-42) Eita anei tatou e na reira atoa? E nehenehe tatou e titau manihini hoê fetii i te putuputuraa aore ra i te hoê tamaaraa e te tahi mau hoa Kerisetiano. Ia amuimui o ˈna e te mau Ite no Iehova, e taa ia ˈna mai ia ratou atoa tatou. Mea faatura atoa tatou i te taata.
19. Noa ˈtu eita paha te fetii e taa i ta tatou mau tiaturiraa, eaha te titauhia ia rave tatou? (Petero 1, 3:15)
19 A taio i te Petero 1, 3:15. Eita paha te fetii e taa no te aha aita tatou e rave faahou ra i te tahi ohipa. E haamanaˈo râ ratou i to tatou hamani maitai e faatura ia ratou. E oaoa atoa ratou ia rave tatou i te taime no ratou. Noa ˈtu eita tatou e faatupu e e apiti i te mau mahana fanauraa, e tamau anaˈe i te haere e farerei ia ratou, i te tamaa e o ratou e i te horoa i te ô i te tahi atu taime.
EIAHA E FAAEA I TE TIATURI
20. No te aha mea faaitoito mau te hiˈoraa o Iakobo?
20 Aita Iakobo i pee ia Iesu i te roaraa o ta ˈna taviniraa i te fenua, ua riro mai râ o ˈna ei pǐpǐ na ˈna i muri mai. (Gal. 1:18, 19; 2:9) E ua haafaufaa oia i te mau mea atoa ta Iesu i haapii. Ei hiˈoraa, i raro aˈe i te aratairaa a te varua moˈa ua papai Iakobo i te hoê rata e ua faahiti o ˈna i roto i te tahi mau haapiiraa no roto mai i te Aˈoraa i nia i te mouˈa.d
21. No te aha eiaha roa ˈtu tatou e tuu?
21 Noa ˈtu ta tatou mau tutavaraa, eita paha to tatou fetii e farii i te parau mau aore ra aita e ite ra i to tatou haapeapea no ratou. Eiaha râ tatou e tuu! No te mea ia faaite tatou i te hamani maitai i te fetii, te pee ra tatou i te hiˈoraa o Iehova e o Iesu. (Luka 6:33, 36) Peneiaˈe, a mairi ai te mau matahiti, e mǎrû roa mai to ratou aau e e taui to ratou manaˈo no nia i te mau Ite no Iehova. E haamanaˈo atoa paha ratou i ta tatou i faaite atu na mua ˈˈe no nia ia Iehova e te Bibilia. No reira, eiaha e faaea i te tiaturi e ia tae i te hoê mahana, e apiti mai paha ratou ia oe i roto i te haamoriraa mau.
HIMENE 60 E ora mai te taata
a A hiˈo i te tumu parau “Eaha ta tatou i ite no nia i ta Iehova mau haavaraa i mua nei?” o Te Pare Tiairaa no Me 2024 api 11, par. 11-13.
b E piti taeae o Iesu tei farii i te parau mau i muri aˈe i to ˈna poheraa e tia-faahou-raa. O Iakobo raua Iuda.
c A hiˈo i te tumu parau tarenihia “E haere anei oe i te hoê faaipoiporaa aore ra hunaraa?”
d A faaau i te Iakobo 1:2 e te Mataio 5:11, 12; te Iakobo 1:19 e te Mataio 5:22; te Iakobo 1:22; 2:24 e te Mataio 7:21; te Iakobo 2:13 e te Mataio 5:7; 6:14, 15.
e No te ite atu â, a hiˈo i te tumu parau “Uiraa a te feia taio” o Te Pare Tiairaa o te 15 no Me 2002, e Te Pare Tiairaa o te 1 no Titema 2007.
f FAATAARAA O TE HOHOˈA: Te faaineine ra tuahine i te maa no ta ˈna tane faaipoipo hou a haere ai e poro.
g FAATAARAA O TE HOHOˈA: Taua tuahine noa â e haere ra e farerei i to ˈna metua hoovai e ere i te Ite no Iehova.