Mea faufaa noa anei ta oe i haapii ê na i roto i te Bibilia?

1. Eaha te mau haamaitairaa ta oe i fanaˈo i to oe haapiiraa i te Bibilia?

UA TAUI roa to tatou oraraa maoti ta tatou i haapii i roto i te Bibilia. Ei hiˈoraa, i to tatou haapiiraa e o Iehova te iˈoa o te Atua, ua rave tatou i te mau taahiraa no te riro ei hoa no ˈna. (Isa. 42:8) I to tatou iteraa eaha te tupu ia pohe te taata, aita tatou i uiui faahou te mauiui ra anei to tatou mau taata here tei faarue mai. (Koh. 9:10) E i to tatou iteraa e faariro Iehova i te fenua ei paradaiso, aita tatou i haapeapea faahou no a muri aˈe. Ua papu ia tatou eita tatou e ora e 70 aore ra e 80 noa matahiti. E ora râ tatou e a muri noa ˈtu.—Sal. 37:29; 90:10.

2. No te aha Petero i faaitoito ai i to ˈna mau taeae e tuahine ia haamanaˈo i te mau haapiiraa Bibilia ta ratou i ite ê na? (Petero 2, 1:12, 13)

² Eiaha roa ˈtu ia moˈe ia tatou e mea faufaa roa ta tatou i haapii mai i roto i te Bibilia. I roto i te piti o ta ˈna rata, ua papai te aposetolo Petero i te mau Kerisetiano ‘mea mau papu i roto i te parau mau.’ (A taio i te Petero 2, 1:12, 13.) I tera râ taime, te vai ra te tahi mau fifi i roto i taua amuiraa ra. Te vai ra hoi te mau peropheta haavare e te feia faatura ore ia Iehova. (Pet. 2, 2:1-3) Ua hinaaro Petero e faaitoito i to ˈna mau taeae e tuahine ia mau papu. No reira o ˈna i haamanaˈo ai ia ratou i te tahi mau haapiiraa ta ratou i ite ê na. Maoti te reira, e vai taiva ore ratou ia Iehova.

3. No te aha eiaha tatou e haamoˈe i ta tatou i haapii ê na i roto i te Bibilia? A horoa i te hoê hiˈoraa.

³ Mea maoro paha tatou i te taviniraa ia Iehova. Noa ˈtu râ, e huti mai â tatou i te haapiiraa i ta tatou i ite ê na i roto i te Bibilia. Teie te tahi hiˈoraa, te vai ra te hoê tutu maa mea maoro o ˈna i te raveraa i tera ohipa, e te tahi atu mea apî mai ïa. Hoê â faaineineraa ta raua i te tahi maa. No teie râ tutu maa aravihi, a mairi ai te tau, e aravihi atu â o ˈna i te faaineine i teie maa ia aminamina ˈtu â. Hoê â huru no te mau tavini a Iehova mea maoro i roto i te parau mau e te feia no haapii noa mai ra i te Bibilia. E ere hoê â huru hiˈoraa ta ratou i te mau haapiiraa Bibilia. Mai to tatou bapetizoraahia mai, ua taui to tatou tupuraa. Ua fanaˈo atoa tatou i te tahi atu â haamaitairaa i roto i te taviniraa. No reira, ia feruri tatou i ta tatou i haapii ê na i roto i te Bibilia, e ite mai tatou i te tahi atu â mau haapiiraa e apo mai. E rave mai tatou e toru hiˈoraa.

O IEHOVA TE ATUA POIETE

4. Eaha te haamaitairaa ta tatou i fanaˈo i te iteraa o Iehova te Atua poiete?

⁴ Ua ite tatou e mea poietehia te fenua e te mau mea atoa i nia iho. Te parau ra hoi te Bibilia: “Tei hamani i te mau mea atoa, o te Atua ïa.” (Heb. 3:4) E Atua poiete hope oia i te paari e te Manahope. Teie râ, e haapiiraa ê atu ta tatou e apo mai. Oia hoi, no te mea na ˈna i hamani ia tatou, ua ite ïa o ˈna i te mau mea atoa no nia ia tatou. Te tâuˈa atoa mai ra o ˈna ia tatou. E ua ite o ˈna eaha te mea maitai roa ˈˈe no tatou. No reira, i to tatou iteraa o Iehova te Atua poiete, ua maitai roa mai to tatou oraraa. E i teie nei, e fa ta tatou i roto i to tatou oraraa.

5. Teihea parau mau e haapii mai ra i te faufaaraa ia faatupu i te haehaa? (Isaia 45:9-12)

⁵ Te haapii atoa mai ra te parau mau o Iehova te Atua poiete i te faufaaraa ia faatupu i te haehaa. Ta Iehova ïa i rave i nia ia Ioba. Ua haamanaˈo o ˈna ia Ioba o ˈna te Atua poiete Manahope. No te aha? No te mea ua haapao noa Ioba ia ˈna iho e i te tahi atu mau taata. (Ioba 38:1-4) Taa ihora ia Ioba e to nia ˈˈe ta Iehova mau raveraa i ta te taata. No reira te peropheta Isaia i papai ai: “Ia parau anei te araea i te Potera: ‘Eaha ta oe e hamani ra?’ ”—A taio i te Isaia 45:9-12.

6. No te aha mea faufaa ia haamanaˈo tatou o Iehova te Atua poiete î i te paari e te Manahope? (A hiˈo atoa i te hohoˈa.)

⁶ Mea maoro anaˈe tatou i te tavini ia Iehova, e nehenehe tatou e tiaturi rahi roa ia tatou iho. Eita ïa tatou e fariu ia Iehova ra e i ta ˈna Parau te Bibilia no te imi i ta ˈna aratairaa. (Ioba 37:23, 24) No reira, mea faufaa ia haamanaˈo tatou o Iehova te Atua poiete î i te paari e te Manahope. (Isa. 40:22; 55:8, 9) Ia na reira tatou, e vai haehaa noa ïa tatou, a tuu atu ai i to tatou iho mau manaˈo i te hiti.

7. Mea nafea to Rahela fariiraa i te hoê aratairaa apî?

⁷ E rave mai tatou i te hiˈoraa o Rahela e faaea ra i Slovénie. Ua fifi-rii-hia o ˈna ia farii i te tahi aratairaa apî a te faanahonahoraa. Auaˈe râ o ˈna i haamanaˈo noa e o Iehova te Atua poiete. Ua parau roa o ˈna e ere mea ohie no ˈna i te tahi taime ia farii i te tahi mau faaotiraa a te mau taeae e aratai ra ia tatou. Ei hiˈoraa, ua mataitai o ˈna i te Video parau apî n^o 8 a te Tino aratai (2023). Noa ˈtu râ, e huru ê noa o ˈna ia ite o ˈna i te hoê taeae o te horoa ra i ta ˈna oreroraa parau e huruhuru taa to ˈna. Eaha ïa ta ˈna i rave? Ua pure o ˈna ia Iehova ia tauturu ia ˈna ia farii i tera faanahoraa apî. Ua taa ia Rahela i te mea o Iehova te Atua poiete, o ˈna ïa tei ite maitai aˈe e nafea ia aratai i ta ˈna faanahonahoraa. No reira, mai te peu te fifi rii ra tatou i te faatano i to tatou feruriraa aore ra i te farii i te hoê haamaramaramaraa e aratairaa apî, mea maitai ia feruriruri tatou i te paari hau ê e te puai hope o to tatou Atua poiete.—Roma 11:33-36.

NO TE AHA TE ATUA E VAIIHO NOA ˈI I TE MAUIUI?

8. Eaha te mau haamaitairaa ta tatou i fanaˈo i te iteraa no te aha te Atua e vaiiho noa ˈi i te mauiui?

⁸ No te aha te Atua e vaiiho noa ˈi i te mauiui? No te mea aita vetahi i ite i te pahonoraa o teie uiraa, ua riri ratou i te Atua aore ra ua manaˈo aita e Atua. (Mas. 19:3) O tatou râ, ua haapii tatou i roto i te Bibilia e ere o Iehova te tumu e mauiui ai tatou, o te hara râ. Ua haapii atoa tatou mea faaoromai Iehova. Maoti to ˈna faaoromai i ite ai e mirioni taata i te parau mau no nia ia ˈna, oia atoa e faaore o ˈna i te mauiui. (Pet. 2, 3:9, 15) Ua mahanahana roa to tatou aau i te iteraa i teie mau haapiiraa e ua here roa ˈtu â tatou ia ˈna.

9. I roto i teihea mau tupuraa mea tano ia feruri tatou no te aha Iehova e vaiiho noa ˈi i te mauiui?

⁹ A tiai noa ˈi ia faaore Iehova i te mauiui, e titauhia ia faaoromai. E ere râ i te mea ohie ia na reira. I te taime iho â râ e faarue mai ai te hoê taata herehia, ia û tatou e to tatou fetii i te fifi aore ra ia rave-ino-hia tatou. E puta mai paha te manaˈo, ‘Eaha ta Iehova e tiai ra?’ (Hab. 1:2, 3) No reira, mea tano ia feruri tatou no te aha Iehova e vaiiho noa ˈi i te taata parau-tia ia mauiui.a (Sal. 34:19) E mea tano atoa ia feruri tatou i ta Iehova opuaraa e faaore i te mauiui.

10. Na te aha i tamahanahana ia Anne i te poheraa to ˈna mama?

¹⁰ Ia ite tatou i te tumu e vaiiho noa ˈi te Atua i te mauiui, e tauturu te reira ia tatou ia faaoromai tamau i te fifi. Teie ta Anne e faaea ra i Mayotte e faatia ra: “Ua mauiui roa vau i te poheraa to ˈu mama tau matahiti teie nei. Teie râ, ua haamanaˈo noa vau e ere o Iehova te tumu o te mauiui. E hinaaro iho â o ˈna e faaore i te mauiui e e faahoˈi mai i te feia herehia e tatou i te ora. Ua topa ïa to ˈu hau i te feruriruriraa i teie pue parau mau.”

11. Na te aha e turai ra ia tatou ia tamau i te poro?

¹¹ Ia ite tatou i te tumu e vaiiho noa ˈi Iehova i te mauiui, e turai te reira ia tatou ia tamau i te poro. Ua faataa hoi te aposetolo Petero e mea faaoromai Iehova, no te mea te hinaaro ra o ˈna ia tatarahapa te taata e ia ora mai ratou. I muri iho, ua papai o ˈna: “A feruri ïa i teihea huru taata e titauhia ˈi ia riro outou. Ei taata haerea moˈa ïa e o te rave i te mau ohipa tei au i te haamoriraa i te Atua anaˈe.” (Pet. 2, 3:11) I roto i “te mau ohipa tei au i te haamoriraa i te Atua anaˈe,” e ô atoa mai ta tatou pororaa. Mea here hoi na tatou i te taata mai ia Iehova, e te hinaaro nei tatou ia ora ratou i roto i te ao apî ta Iehova i fafau. No reira Iehova e horoa ˈi i te taata i te ravea no te haamori ia ˈna. Mea fanaˈo ïa tatou i te tavini ia Iehova ei hoa ohipa no ˈna no te tauturu i te taata e rave rahi ia ite o vai o ˈna hou te hopea a tae mai ai!—Kor. 1, 3:9.

TE ORA NEI TATOU I “TE MAU MAHANA HOPEA”

12. Ia ite tatou i ta te Bibilia e parau ra no nia i “te mau mahana hopea,” ua papu ia tatou te aha?

¹² Te faataa maitai ra te Bibilia i te huru o te taata i “te mau mahana hopea.” (Tim. 2, 3:1-5) Te tupu nei ta te Bibilia i tohu. Inaha, te ino noa ˈtu ra te huru e te haerea o te taata. E haapapuraa ïa te reira e nehenehe iho â tatou e tiaturi i te Bibilia.—Tim. 2, 3: 13-15.

13. Ia au i te faahohoˈaraa a Iesu i te Luka 12:15-21, mea maitai ia feruri tatou i te aha?

¹³ Inaha ua taa ia tatou e te ora nei tatou i te mau mahana hopea, e tauturu te reira ia tatou ia tiatonu i te mau mea faufaa roa ˈˈe. A tapao na i te faahohoˈaraa ta Iesu i horoa i te Luka 12:15-21. (A taio.) No te aha i piihia ˈi teie taata taoˈa rahi e “neneva”? E ere no te mea e mea rahi ta ˈna mau taoˈa. No te mea râ aita o ˈna i haapao i te mau mea faufaa roa ˈˈe. Te na ô ra te Bibilia: “Ua haapue [o ˈna] i te taoˈa na ˈna iho, mea veve râ oia i te aro o te Atua.” Eaha mau na te fifi? Te na ô ra te Atua i teie taata: “Neneva, i teie po e ravehia ˈi to oe ora.” I teie mahana, a piri mai ai te hopea o teie nei ao, mea maitai ia feruri tatou i ta tatou mau fa: ‘Te faaite ra anei te reira e ua taa ia tatou eaha te mea faufaa roa ˈˈe o te oraraa? Eaha te mau fa ta ˈu e haapii nei i ta ˈu mau tamarii ia haamau? Te faaohipa ra anei au i to ˈu puai, to ˈu taime e ta ˈu mau faufaa no te haapue i te taoˈa na ˈu iho aore ra no te haapue i te taoˈa i te raˈi?’

14. E nafea te hiˈoraa o Miki e faataa ˈi i te faufaaraa ia haamanaˈo e te ora nei tatou i te mau mahana hopea?

¹⁴ Inaha ua taa ia tatou e te ora nei tatou i te mau mahana hopea, e tauturu te reira ia tatou ia rave i te mau faaotiraa maitai. A hiˈo na i te tupuraa o tuahine Miki. Te faatia ra o ˈna: “I muri aˈe i te haapiiraa tuarua, ua titau vau i te hoê ohipa no nia i te tuatapaparaa animara. Ua hinaaro atoa râ vau e riro mai ei pionie tamau e e tavini i te vahi e hinaaro-rahi-hia te tauturu. Ua tauturu mai râ te tahi mau taeae e tuahine o ta ˈu amuiraa ia ˈu. Ua parau mai ratou ia feruri maitai e maraa anei ia ˈu ia titau i te ohipa ta ˈu e hinaaro e i te hoê â taime ta ˈu mau fa pae varua. Ua haamanaˈo mai ratou e te fatata mai ra te hopea o teie nei ao. I roto râ i te ao apî, e fanaˈo vau i te ora mure ore. I reira ïa vau e haapii ai no nia i te mau animara atoa ta ˈu e hinaaro. Maiti atura vau i te hoê faaineineraa toroa poto noa. E ua tauturu mai te reira ia ˈu ia fanaˈo i te hoê ohipa a nehenehe atu ai au e tavini ei pionie tamau. I muri aˈe, ua haere au e ora i Équateur, te hoê fenua e hinaaro-rahi-hia te tauturu.” I teie mahana, te tavini nei Miki raua ta ˈna tane i roto i te tuhaa haaati i tera fenua.

15. Eaha paha te huru o te taata no nia i te parau apî oaoa? A horoa i te tahi hiˈoraa. (A hiˈo atoa i te hohoˈa.)

¹⁵ Eiaha roa ˈtu tatou ia toaruaru, aita anaˈe te taata e anaanatae ra i te parau apî oaoa. E nehenehe hoi ratou e taui. A hiˈo na ia Iakobo te taeae o Iesu. Ua ite o ˈna ia Iesu i te paariraa mai, i te riroraa mai ei Mesia e i ta ˈna huru haapiiraa. Noa ˈtu râ, aita Iakobo i pee oioi ia Iesu. Ua riro mai o ˈna ei pǐpǐ na Iesu i muri aˈe i to ˈna tia-faahou-raa e ua faaite o ˈna i te itoito rahi i roto i te pororaa.b (Ioa. 7:5; Gal. 2:9) No reira, mea faufaa ia tutava oe noa ˈtu aita to oe mau fetii e anaanatae ra i te parau mau. Ia tutava atoa oe i te farerei faahou i te taata tei ore i farii na i te poroi o te Faatereraa arii. A haamanaˈo e te ora nei tatou i te mau mahana hopea, e mea faufaa ïa ia tamau i te poro. Te mea ta oe e parau ia ratou i teie mahana, e haamanaˈo paha ratou i te reira a muri aˈe, peneiaˈe ia haamata anaˈe te ati rahi.c

IA MAURUURU NOA OE I TE MAU HAAMANAˈORAA A IEHOVA

16. Eaha te mau maitai ta tatou e fanaˈo maoti te mau haamanaˈoraa a Iehova? (A hiˈo atoa i te tumu parau tarenihia “A faaohipa i te reira no te tauturu ia vetahi ê.”)

¹⁶ Ua faaineinehia te tahi mau tumu parau no te feia aita i faaroo aˈenei i te pue parau mau Bibilia. Ei hiˈoraa, te vai ra te mau oreroraa parau, te mau tumu parau e video i nia i te jw.org, e vetahi o ta tatou mau vea no te feia e ere i te Ite no Iehova. No tatou atoa râ teie mau haamanaˈoraa. Maoti te reira, e puaihia to tatou here ia Iehova e to tatou tiaturi i ta ˈna Parau. Oia atoa e aravihi atu â tatou no te haapii i te Bibilia ia vetahi ê.—Sal. 19:7.

17. I roto i teihea mau tupuraa e haamanaˈo ai tatou i ta tatou i haapii ê na?

¹⁷ Ei Ite no Iehova, e oaoa tatou i te fanaˈo i te hoê haamaramaramaraa apî no nia i te hoê parau mau Bibilia. Tera râ, te oaoa atoa ra tatou i ta tatou i haapii ê na i te iteraa tatou i te parau mau, no te mea ua tauturu teie mau haapiiraa ia here tatou ia Iehova. No reira, ia fanaˈo tatou i te hoê aratairaa no ǒ mai i ta Iehova faanahonahoraa, eiaha roa ˈtu tatou e onoono i nia i to tatou mau manaˈo. E haamanaˈo anaˈe râ ma te haehaa o vai te aratai ra i teie faanahonahoraa oia hoi, to tatou ïa Atua poiete î i te paari e te Manahope. Ia û tatou aore ra te hoê fetii herehia i te fifi, e faaoromai anaˈe ma te haamanaˈo no te aha Iehova e vaiiho noa ˈi i te mauiui. E ia faaoti tatou e nafea ia faaohipa i to tatou taime e ta tatou mau faufaa, e haamanaˈo anaˈe e te ora nei tatou i te mau mahana hopea. Oia mau, ia riro te mau haamanaˈoraa a Iehova ei faaitoitoraa no tatou. Maoti te reira, e puaihia tatou e e riro mai tatou ei taata feruriraa paari.