E piti mero apî o te Tino aratai
I TE 5 no Atopa 2024, ua faaarahia i te rururaa matahiti e ua riro mai Jody Jedele raua Jacob Rumph ei mero o te Tino aratai a te mau Ite no Iehova. Mea maoro to raua taviniraa ia Iehova ma te taiva ore.
Jody Jedele e ta ˈna vahine o Damaris
Ua fanauhia taeae Jedele i Missouri, i Marite e ua paari o ˈna i roto i te parau mau. Ua ora o ˈna e to ˈna utuafare i te hoê vahi aita i rahi te mau Ite no Iehova. Noa ˈtu râ, ua farerei oia e rave rahi taeae e tuahine tei haere mai e turu i te ohipa pororaa i ǒ. Ua putapû taeae Jedele i to ratou here e auhoêraa. Bapetizohia ˈtura o ˈna i te 15 no Atopa 1983. E taurearea noa â oia i tera taime. Mea au roa na ˈna i te pororaa, e i te otiraa ta ˈna haapiiraa tuarua riro mai nei o ˈna ei pionie tamau i Tetepa 1989.
I to ˈna apîraa, pinepine to ˈna na metua i te afai ia raua to ˈna tuahine e mataitai i te Betela. Ǒ mai nei tera hinaaro e tavini i te Betela i roto ia raua. O ta raua ïa i rave. Ua haamata taeae Jedele i te Betela no Wallkill i Tetepa 1990. Ua ohipa na mua o ˈna i te Tuhaa tamâraa e i muri mai, ua tuuhia o ˈna i te Piha ohipa e haapao i te rapaauraa.
I tera roaraa, te rahi noa ˈtura te mau amuiraa reo Paniora e ua hinaarohia te mau taeae no te turu atu. Ua turu ïa taeae Jedele hoê o teie mau amuiraa e ua haapii oia i te reo Paniora. I muri mai, ua farerei o ˈna ia tuahine Damaris, te hoê pionie o te hoê â tuhaa haaati. Ua faaipoipo raua e ua apiti Damaris ia taeae Jedele i te Betela.
I 2005, ua vaiiho raua i te taviniraa i te Betela no te aupuru i to raua na metua tei paari roa. Ua rave ïa raua i te taviniraa pionie tamau. Ua tauturu atoa taeae Jedele ei taeae haapii i te Haapiiraa no te mau pionie, ei mero o te Tomite tuatiraa e te fare maˈi e ei rima tauturu o te Tomite paturaa.
I 2013, ua titau-manihini-hia raua tuahine Damaris i te Betela no te turu i te paturaa i Warwick. Ua tavini atoa raua i Patterson e i Wallkill. Ua ohipa taeae Jedele i te Tuhaa o te paturaa tiaauhia e te amaa e i te Tuhaa haamaramaramaraa i te pae rapaauraa i te Betela. I Mati 2023, ua tavini taeae ei mero tauturu i te Tomite taviniraa. A haamanaˈo ai i tera rahiraa hopoia ua parau o ˈna: “Ia horoahia mai te tahi hopoia, e puta mai paha te manaˈo eita e maraa ia oe. A haamanaˈo ïa i te turui noa i nia ia Iehova. Maoti Iehova e maraa iho â ia oe.”
Jacob Rumph e ta ˈna vahine o Inga
Ua fanauhia taeae Rumph i Kalifonia i Marite. I to ˈna nainairaa, ua faaea to ˈna mama i te haere i te putuputuraa e i te poro. Ua tutava noa râ to ˈna mama i te haapii ia ˈna i te parau mau. I te mau matahiti atoa, i haere na o ˈna e hiˈo i to ˈna mama ruau Ite no Iehova. Maoti ta ˈna mau parau, ua hinaaro taeae Rumph e haapii i te Bibilia. No reira i te 13raa o to ˈna matahiti, ua ani o ˈna i to ˈna mama i te hoê haapiiraa Bibilia. Bapetizohia ˈtura o ˈna i te 27 no Tetepa 1992. E taurearea noa â oia i tera taime. I muri iho, ua hoˈi mai to ˈna mama ia Iehova ra e ua nuu to ˈna papa, to ˈna taeae e tuahine apî aˈe i mua i te pae varua a bapetizo roa ˈtu ai.
I to ˈna apîraa, ua ite taeae Rumph i te oaoa o te mau pionie. I te otiraa ta ˈna haapiiraa tuarua rave ihora oia i te taviniraa pionie i Tetepa 1995. I 2000, ua haere o ˈna i Équateur, te hoê fenua e hinaaro-rahi-hia te feia poro. I reira to ˈna farereiraa ia tuahine Inga, hoê pionie no Kanada e ua faaipoipo raua i muri mai. Ua haamata raua i ta raua taviniraa i te hoê oire i Équateur, mea iti roa te feia poro. I teie râ mahana, e amuiraa to reira.
I muri aˈe, ua tavini taeae Rumph e ta ˈna vahine ei pionie taa ê e i roto i te tuhaa haaati. I 2011, ua apiti raua i te 132raa o te Piha haapiiraa no Gileada. I muri iho, ua tavini raua i e rave rahi mau fenua. Oaoa roa raua a tavini ai i te Betela, ei mitionare e i roto i te tuhaa haaati. Ua fanaˈo atoa taeae Rumph i te hopoia ei taeae haapii i te Haapiiraa no te feia poro i te parau apî oaoa o te Basileia.
No te maˈi parare COVID-19, ua hoˈi raua Inga i Marite. Titau-manihini-hia ˈtura raua i te Betela no Wallkill, i reira to taeae fanaˈoraa i te faaineineraa no te Tomite taviniraa. I muri iho, ua faahoˈihia raua i te amaa no Équateur e ua tavini taeae ei mero o te Tomite amaa. I 2023, ua tonohia raua i Warwick. I Tenuare 2024, ua riro mai taeae Rumph ei mero tauturu i te Tomite taviniraa. A haamanaˈo ai i tera rahiraa haamaitairaa ua parau oia: “Noa ˈtu ihea oe e tonohia ˈi, e ere te vahi te mea faufaa. Te mea faahiahia roa ˈˈe o te taata ta oe e farerei.”
Mauruuru roa tatou i teie mau taeae e rohi nei, e mea “poihere noa [na tatou] i teie huru taata.”—Phil. 2:29.