Mau melo apî o te Tino Aratai

I TE Mahana maa 2 no Atopa 1999, ua faaoti te Putuputuraa Matahiti a te Watch Tower Bible and Tract Society of Pennsylvania na roto i te hoê parau faaite manaˈo-ore-hia. Ua oaoa roa na 10 594 i putuputu mai aore ra i taaihia e te mau reni niuniu paraparau, i te faarooraa e e maha melo apî tei amuihia i te Tino Aratai a te mau Ite no Iehova. E mau Kerisetiano faatavaihia anaˈe te mau melo apî, te vai ra o Samuel F. Herd; M. Stephen Lett; Guy H. Pierce; e o David H. Splane.

• Ua haamata o Samuel Herd i te taviniraa pionie i te matahiti 1958, e mai te matahiti 1965 e tae atu i te matahiti 1997, tei roto oia i te ohipa haaati e mataeinaa. I muri aˈe, ua riro raua ta ˈna vahine o Gloria ei melo no te fetii o te Betela i te mau Hau Amui no Marite, i reira ua haa Taeae Herd i roto i te Tuhaa o te Taviniraa. Ua riro atoa oia ei tauturu i te Tomite o te Taviniraa.

• Ua haamata o Stephen Lett i te taviniraa pionie i te avaˈe Titema 1966, e mai te matahiti 1967 e tae atu i te matahiti 1971, ua tavini oia i te Betela i te mau Hau Amui no Marite. I te avaˈe Atopa 1971, ua faaipoipo oia ia Susan, e ua rave i te taviniraa pionie taa ê. Mai te matahiti 1979 e tae atu i te matahiti 1998, ua riro oia ei tiaau haaati. Mai te avaˈe Eperera 1998 mai, e melo raua Susan no te fetii o te Betela i te mau Hau Amui no Marite. I reira, ua haa oia i roto i te Tuhaa o te Taviniraa e ua tauturu i te Tomite o te Haapiiraa.

• Ua haapao o Guy Pierce i te hoê utuafare e i muri aˈe, ua rave raua ta ˈna vahine i te taviniraa pionie i te avaˈe Eperera 1982. E tiaau haaati oia mai te matahiti 1986 e tae atu i te matahiti 1997, e i muri iho, ua riro raua ta ˈna vahine o Penny ei melo no te fetii o te Betela i te mau Hau Amui no Marite. Ua riro atoa Taeae Pierce ei tauturu i te Tomite o te mau Rave ohipa.

• Ua haamata o David Splane i te taviniraa pionie i te avaˈe Setepa 1963. Ua noaa ta ˈna parau tuite i te 42raa o te piha haapiiraa no Gileada, ua tavini oia ei mitionare i Senegala, i Afirika, e i muri aˈe ei tiaau haaati i Kanada 19 matahiti i te maoro. Ua rave raua ta ˈna vahine o Linda i te ohipa i te Betela i te mau Hau Amui no Marite mai te matahiti 1990 mai, i reira ua haa Taeae Splane i roto i te mau tuhaa o te Taviniraa e o te Papairaa. Mai te matahiti 1998 mai, e tauturu oia i te Tomite o te Papairaa.

Taa ê noa ˈtu i na melo apî e maha o te Tino Aratai, te vai ra o C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, e o D. Sydlik. E hinaaro iho â te taatoaraa ia tamau noâ Iehova i te haamaitai e i te haapuai i te Tino Aratai, tei aano i teie nei, a tiaau noâ ˈi ratou i te mau ohipa a te nunaa o te Atua e ati aˈe te ao nei e a haapao noâ ˈi i ta ratou mau faufaa pae varua.