Tauturu no te taio i te Bibilia pauroa te mahana

No te rahi o te ohipa, mea fifi anei no oe ia taio i te Bibilia pauroa te mahana mai ta oe i faanaho? (Ios. 1:8) Mai te peu e e, teie te tahi mau manaˈo tauturu:

• A faataa i te tahi haamanaˈoraa. I nia i ta oe vini aore ra matini afaifai, a faataa i te hoê faaararaa i te hora ta oe i faaoti no te haamanaˈo mai i ta oe taioraa Bibilia.

• A vaiiho i ta oe Bibilia i te hoê vahi e ite atu oe. Ia taio oe i te Bibilia papie, a vaiiho ïa i te reira i te hoê vahi e ite atu oe pauroa te mahana.—Deut. 11:18.

• A faaroo i te mau haruharuraa. A raverave ai i ta oe ohipa, a faaroo i te taioraa Bibilia tei haruharuhia. Teie ta Tara, e pionie o te rave i te ohipa i te po, e parau ra: “A rave ai i ta ˈu mau ohipa i te fare, e faaroo vau i te mau haruharuraa taioraa Bibilia. Maoti te reira i tamau noa ˈi au i te taio i te Bibilia.”

• A tamau noa. No te tahi mau tupuraa manaˈo-ore-hia, eita iho â e haere ia oe ia pee i ta oe porotarama taioraa. Mea maitai râ ia taio oe maa irava Bibilia hou a taoto ai. Inaha, e faufaahia oe i ta oe taioraa noa ˈtu maa irava noa.—Pet. 1, 2:2.