O Iehova to tatou “oaoa hau ê”

1-2. (1) Eaha ta te taata e tapi ra i teie mahana? (2) Eaha ta tatou e hiˈopoa i roto i teie tumu parau?

I ROTO i teie nei ao, te tapi nei te rahiraa o te taata i te oaoa. Eita râ e noaa ia ratou te oaoa mau. Inaha, e rave rahi o te hepohepo ra. O te mau tavini a Iehova atoa te faaruru ra i te ahoaho. Eita tatou e maere no te mea te ora nei tatou i “te mau mahana hopea.” No reira tatou e û ai i te mau tupuraa mea “fifi ia faaruru.”—Tim. 2, 3:1.

² I roto i teie tumu parau, e ite mai tatou eaha te faaere nei ia tatou i to tatou oaoa, eaha atoa te rave no te oaoa faahou. Na mua râ, e hiˈo mai tatou o vai te Tumu o te oaoa mau.

TE TUMU O TE OAOA MAU

3. Eaha ta te mau mea tei poietehia e haapii mai ra no nia ia Iehova? (A hiˈo atoa i te hohoˈa.)

³ E Atua oaoa Iehova. I oaoa noa na o ˈna. E hinaaro atoa o ˈna ia oaoa tatou. E itehia tera huru maitai to ˈna na roto i te mau mea atoa ta ˈna i poiete. Ia hiˈo tatou i to tatou paraneta, mea nehenehe mau, ua rau te mau û, mea au na te mau animara e hauti, mea auhune te maa e mea monamona. E ô anaˈe teie o te faaoaoa ia tatou. Tapao faaite ïa mea here na Iehova ia tatou e te hinaaro ra o ˈna ia oaoa noa to tatou oraraa.

Fanauˈa elephani: Image © Romi Gamit/Shutterstock; fanauˈa pingouin: Vladimir Seliverstov/500px via Getty Images; fanauˈa puaaniho: Rita Kochmarjova/stock.adobe.com; piti ouˈa: georgeclerk/E+ via Getty Images

4. (1) No te aha Iehova e oaoa ˈi noa ˈtu ua ite o ˈna te mauiui ra te taata? (2) Eaha ta Iehova e horoa mai? (Salamo 16:11)

⁴ Noa ˈtu e “Atua oaoa” Iehova, ua ite maitai o ˈna i te mau fifi e te mau mauiui ta te taata e faaruru nei. (Tim. 1, 1:11) No te aha ïa o ˈna e oaoa ˈi? No te mea ua ite o ˈna eita tera mau mauiui e vai noa mai. E te tiai ru nei o ˈna i te faaore roa i te reira. Hau atu, ua taa maitai ia ˈna to tatou mau mauiui. E te hinaaro ra o ˈna e tauturu ia tatou. E nafea ïa? Ma te horoa mai ïa i te oaoa. (A taio i te Salamo 16:11.) E hiˈo mai ïa tatou i te hiˈoraa o Iesu.

5-6. No te aha Iesu i oaoa ˈi?

⁵ I roto i te mau mea atoa ta Iehova i poiete, o Iesu te mea oaoa roa ˈˈe. No te aha? E piti tumu. Na mua roa, (1) “o ˈna te hohoˈa o te Atua ite-ore-hia.” Te auraa, ua pee o ˈna i te huru o to ˈna Metua ma te tia roa. (Kol. 1:15; Tim. 1, 6:15) (2) O ˈna tei vai maoro roa ˈˈe i pihai iho ia Iehova, te Tumu o te oaoa mau.

⁶ Ua oaoa noa Iesu i te rave i ta to ˈna Metua i ani ia ˈna. (Mas. 8:30, 31; Ioa. 8:29) No reira, no to ˈna taiva ore, ua fanaˈo o ˈna i te farii maitai a Iehova.—Mat. 3:17.

7. E nafea ia fanaˈo i te oaoa?

⁷ E oaoa tatou ia faafatata tatou ia Iehova, te Tumu o te oaoa. Rahi atu â tatou i te haapii no nia ia ˈna e i te pee i to ˈna huru, rahi atu â ïa to tatou oaoa. E oaoa atoa tatou i te raveraa i to ˈna hinaaro e te iteraa te fanaˈo ra tatou i ta ˈna farii maitai.a (Sal. 33:12) I te tahi râ taime e hepohepo atoa tatou. Te auraa anei ïa aita Iehova e mauruuru ra ia tatou? Eita. No to tatou huru tia ore, e mauiui e e ahoaho tatou. E ua taa maitai ia Iehova te reira. (Sal. 103:14) I teie nei, e hiˈo mai tatou na te aha e faaere ia tatou i to tatou oaoa, e e nafea tatou e oaoa faahou ai.

EIAHA E VAIIHO I TE TAHI NOA ˈˈE MEA IA FAAERE IA OE I TO OE OAOA

8. Eaha to tatou huru ia û tatou i te fifi?

⁸ Te fifi o te oraraa. Ua rau te fifi ta tatou e faaruru nei, te hamani-ino-raa, te ati natura, te veve, te maˈi aore ra te ruauraa. I mua i teie mau tupuraa aita ta tatou e ravea, e ore roa to tatou oaoa. Te faaite ra hoi te Bibilia “te aau oto, e faatoaruaru ïa i te feruriraa.” (Mas. 15:13) Ta Babis ïa, hoê matahiapo i ite. Ua pohe to ˈna taeae e to ˈna na metua i roto noa e maha matahiti. Te na ô ra o ˈna: “Ua moˈemoˈe roa vau. I te tahi taime, e maemae roa vau no to ˈu tatarahapa rahi. Aita hoi au i nehenehe e farerei pinepine ia ratou hou ratou a pohe ai.” Oia mau, no te fifi o te oraraa, e tahua roa tatou.

9. Eaha te tauturu ia tatou ia oaoa faahou? (Ieremia 29:4-7, 10)

⁹ Te ravea. E farii anaˈe aita to tatou e mana i nia i te mau tupuraa atoa. Ia mauruuru atoa tatou no ta tatou e nehenehe e rave. E ere râ tera te manaˈo o te feia o teie nei ao. Ua faaitoito Iehova i te ati Iuda tei hopoi-ê-hia i Babulonia ia farii i to ratou tupuraa e ia tutava i te oaoa noa i reira. (A taio i te Ieremia 29:4-7, 10.) Eaha ïa te haapiiraa? A farii e ere iho â mea ohie to oe oraraa e a mauruuru no te mau maitai ta oe e fanaˈo ra. A haamanaˈo atoa eita Iehova e faarue ia oe. (Sal. 63:7; 146:5) A hiˈo na ia Effie. No te hoê ati aita ta ˈna i nehenehe faahou e haere. Te na ô ra o ˈna: “Ua tauturu mai Iehova, to ˈu utuafare e te amuiraa ia ˈu. Manaˈo ihora ïa vau mai te peu e autâ noa vau, mea mauruuru ore ïa vau. Aita râ, e hinaaro iho â vau e faaite ia ratou i to ˈu mauruuru rahi. E tutava ïa vau i te oaoa noa.”

10. No te aha tatou e oaoa ˈi noa ˈtu te fifi?

¹⁰ E nehenehe tatou e oaoa noa ˈtu ua roohia tatou i te ati aore ra mea fifi to tatou oraraa.b (Sal. 126:5) No te aha? No te mea e ere no to tatou huru oraraa e oaoa ˈi tatou. Te na ô ra Maria hoê pionie: “Ia û oe i te fifi, e nehenehe oe e oaoa noa. E ere râ te auraa aita to oe aau e mauiui ra. Te auraa râ, aita i moˈehia ia oe te mau parau fafau a Iehova. E tauturu mai Iehova ia tapea noa i tera oaoa.” A haamanaˈo, noa ˈtu te fifi ta oe e faaruru nei, eita te reira e vai noa e a muri noa ˈtu. A hiˈo na i te mau taahiraa avae i nia i te one. Ia tae anaˈe mai te miti, e moˈe roa te reira.

11. E nafea te hiˈoraa o Paulo e faaitoito ai ia oe?

¹¹ E puta mai paha te manaˈo ua tatara Iehova i ta ˈna haamaitairaa, no reira tatou e fifihia ˈi. I ǒ ïa tatou e haamanaˈo ai ua faaruru atoa te mau tavini taiva ore a Iehova i te fifi. A hiˈo na i te aposetolo Paulo. Ua maiti Iesu ia ˈna no te poro i te parau apî oaoa “i te mau nunaa ěê, i te mau arii e i te mau tamarii a Iseraela.” (Ohi. 9:15) Auê ïa haamaitairaa! Noa ˈtu râ, ua faaruru o ˈna e rave rahi fifi. (Kor. 2, 11:23-27) Te auraa anei ïa ua tatara Iehova i ta ˈna haamaitairaa? Eita roa ˈtu. Ua faaoromai tamau Paulo i tera rahiraa fifi, tapao faaite ïa e te haamaitai ra Iehova ia ˈna. (Roma 5:3-5) Teie nei, e feruri oe i to oe tupuraa. Te faaoromai tamau ra oe noa ˈtu te fifi ta oe e faaruru nei. Te auraa ïa, te haamaitai ra Iehova ia oe.

12. No te aha e ere mea oaoa aita anaˈe i naea ta tatou mau fa?

¹² Aita anaˈe i naea ta oe fa. (Mas. 13:​12) E haamau tatou i te mau fa pae varua no to tatou here e mauruuru ia Iehova. Tera râ, aita anaˈe te reira i tupu no te mea ua taui to tatou tupuraa, e toaruaru roa tatou. (Mas. 17:22) Te na ô ra Holly, hoê pionie: “I hinaaro na vau e haere i te Haapiiraa no te feia poro i te parau apî oaoa o te Basileia, e poro na te ara, e e apiti i te paturaa i Ramapo. Ua taui râ to ˈu tupuraa. Aita ˈtura ïa ta ˈu mau opuaraa i tupu. Ua oti roa vau i te hepohepo. E ere iho â mea oaoa ia hinaaro oe e rave i te tahi mau ohipa, eita râ ta oe e nehenehe.” E rave rahi o tatou e taa ra i te huru aau o Holly.

13. No te aha mea faufaa ia haamau i te mau fa e maraa ia oe?

¹³ Te ravea. A haamanaˈo e ere Iehova i te hoê Atua etaeta. Eita o ˈna e titau mai i te tahi mea eita e maraa ia tatou. To oe faufaa no Iehova, e ere tei ta oe e rave nei no ˈna. Ta ˈna noa e hinaaro, ia haere oe ma te aau faahaihai e ia vai taiva ore oe ia ˈna. (Mika 6:8; Kor. 1, 4:2) Inaha, o te rotoraa o to tatou aau ta Iehova e haafaufaa hau aˈe i ta tatou e rave nei no ˈna. No reira, mea tano anei ia titau rahi tatou ia tatou iho hau aˈe i ta Iehova e ani mai ra?c Eita ïa. No reira, a tutava i te haamau i te mau fa pae varua e maraa ia oe. Ei hiˈoraa, e nehenehe oe e faaite i te hiˈoraa maitai no te feia apî o ta oe amuiraa, e tauturu i te mau taeae e tuahine ruhiruhia. Ia toaruaru hoê hoa, a haere e farerei ia ˈna, a niuniu aore ra a hopoi atu i te hoê poroi no te faaitoito ia ˈna. Ia rave noa oe i teie mau ohipa, e haamaitai Iehova ia oe ma te horoa mai i te oaoa. Eiaha atoa e haamoˈe, i roto i te ao apî tatou e tavini ai ia Iehova ma te otia ore. Te na ô ra Holly, tei faahitihia na mua ˈtu: “Ia feruri au i te ora mure ore, e puta mai te mau mea atoa ta ˈu e nehenehe e rave no Iehova maoti ta ˈna tauturu.”

14. Eaha atoa te faaere ia tatou i to tatou oaoa?

¹⁴ E haapao noa i to tatou mau hinaaro. Te haaparare nei te taata na nia i te reni faahoaraa i te manaˈo mea tano ia haapao noa ia tatou iho no te ite i te oaoa mau. E nehenehe tatou e vare i teie parau. E manaˈo ïa tatou e oaoa tatou ia rave i ta tatou e au, ia hoo mai i ta tatou e hinaaro, e ia revareva na te ara. Papu, e ere mea ino teie mau ohipa. Te vai ra iho â tera hinaaro e faaanaanatae ia tatou, ua poietehia tatou mai tera. I muri iho râ, ua taa i te taata e rave rahi eita teie mau mea e hopoi mai i te oaoa mau. Te na ô ra Eva, hoê pionie: “Mai te peu tera aˈe ta oe fa i roto i to oe oraraa e haapao noa i to oe mau hinaaro, eita oe e oaoa hanoa.”

15. Eaha te haapii mai i te hiˈoraa o te arii Solomona?

¹⁵ A hiˈo na i te hiˈoraa o te arii Solomona. Ua rau te mau mea navenave ta ˈna i tamata. Ei hiˈoraa, ua amu o ˈna i te mau maa huru rau, ua faaroo i te mau himene nehenehe mau, e ua hoo mai i te mau mea moni rahi. Teie râ ta ˈna i parau: “Eita te mata e fiu i te hiˈo. Eita atoa te tariˈa e î ia faaroo atu.” (Koh. 1:8; 2:1-11) Oia mau, te manaˈo ra te taata mai te peu e moni ta ratou, e rave ratou mai ta ratou e hinaaro, e oaoa ïa ratou. Mea hape râ teie manaˈo. Eita teie mau mea e hopoi mai i te oaoa mau.

16. No te aha tatou e oaoa faahou ai ia tauturu tatou ia vetahi ê? (A hiˈo atoa i te hohoˈa.)

¹⁶ Te ravea. Ua haapii mai Iesu “e rahi aˈe te oaoa ia horoa ˈtu ia horoahia mai.” (Ohi. 20:35) Te na ô ra Alekos, hoê matahiapo: “Te tutava nei au i te tauturu ia vetahi ê. Rahi atu â vau i te horoa na ratou, rahi atu â ïa vau i te oaoa no te mea aita vau i haapao noa ia ˈu.” Eaha ïa ta oe e nehenehe e rave? Ia ite oe i te hoê taata e mauiui nei, a faaitoito ia ˈna. Papu, eita ta oe e nehenehe e faaore i to ˈna mau fifi. E nehenehe râ oe e tamahanahana ia ˈna, e horoa i te tariˈa faaroo, e faaite i te aumihi, a haamanaˈo atu ai ia ˈna ia huri i to ˈna fifi i nia ia Iehova. (Sal. 55:22; 68:19) A haamanaˈo ia ˈna aita Iehova i faarue ia ˈna. (Sal. 37:28; Isa. 59:1) E nehenehe atoa oe e faaineine i te maa na ˈna aore ra e faaori haere ia ˈna. A ani ia ˈna ia poro na muri ia oe. Papu roa, e itoitohia o ˈna. A vaiiho ia Iehova ia faaohipa ia oe no te tauturu ia vetahi ê. Oia mau, ia tâuˈa tatou i to vetahi ê maitai, i ǒ tatou e oaoa roa ˈi.—Mas. 11:25.

17. Ia aha tatou no te ite i te oaoa mau? (Salamo 43:4)

¹⁷ E oaoa tatou ia tamau tatou i te haapii no nia ia Iehova. Te haapapu mai ra te Bibilia o Iehova to tatou “oaoa hau ê.” (A taio i te Salamo 43:4.) No reira, noa ˈtu eaha te fifi ta tatou e faaruru ra, e faaea hau noa tatou. Eita roa ˈtu tatou e tatarahapa ia tiatonu tatou ia Iehova, te Tumu o to tatou oaoa.—Sal. 144:15.