1925: Hoê hanere matahiti i teie nei!

AITA I TUPU TEI MANAˈOHIA

Mea rahi te Feia haapii Bibilia tei manaˈo na e riro te fenua ei paradaiso i 1925. Inaha, teie ta taeae Albert Schroeder, tei riro ei mero o te Tino aratai i muri mai, i parau: “I manaˈo na matou i taua matahiti ra te toea o te mau pǐpǐ faatavaihia a te Mesia e haere ai i nia i te raˈi no te faatere i reira. Area te mau tane taiva ore i tahito ra, mai ia Aberahama, Davida e te vai ra ˈtu â, e faatiahia mai ïa ratou ei huiarii no te faatere i nia i te fenua.” Teie râ, a mairi ai te mau avaˈe, aita te reira i tupu e ua toaruaru vetahi.—Mas. 13:12.

Area te rahiraa o te Feia haapii Bibilia, ua tamau noa ïa i te poro noa ˈtu ua peapea atoa ratou. Ua taa riirii hoi ia ratou e o te pororaa i te parau mau no nia ia Iehova te ohipa faufaa roa ˈˈe e titauhia ia rave ratou. A hiˈo na mea nafea ratou i te faaohiparaa i te radio no te faatae i te parau mau i te mau vahi atea roa.

HAAPURORORAA RADIO

No te rahi o te taata e faaroo ra i tei haapurorohia na roto i te pu radio WBBR i 1924, hamani atura ïa te Feia haapii Bibilia i te tahi atu pu radio i Chicago, Illinois. Ua piihia taua pu radio ra WORD. Ua apiti atoa taeae Ralph Leffler i te hamaniraa o te reira. E ua parau o ˈna e i te mau po toˈetoˈe e faaroo mai to te mau vahi atea roa i teie haapurororaa radio. Teie te tahi hiˈoraa. Ua faaroo roa te hoê utuafare e faaea ra i te oire o Pilot, i Alaska, hoê o na haapurororaa matamua. Ua hau ïa i te 5 000 kilometera te atea. I muri iho, ua papai teie utuafare i te tahi rata haamauruururaa i te feia e rohi ra i te pu radio no te haapurororaa i te haapiiraa pae varua faaitoito mau.

Mea nafea teie haapurororaa i tae roa ˈi i te mau vahi atea? Teie ta Te Pare Tiairaa o te 1 no Titema 1925 (Beretane) e parau ra: “Te WORD, hoê teie o te mau pu radio puai roa ˈˈe i Marite. Inaha, to te pae hitia o te râ e to te pae tooa o te râ o Marite te nehenehe e faaroo i te haapurororaa. Oia atoa to Cuba e to te pae apatoerau roa o Alaska. Mea rahi tei ore i faaroo aˈenei i te parau mau, ua hinaaro ïa ratou e ite hau atu â. Auaˈe ïa ratou i faaroo i teie radio.”

I tera atoa taime, ua hinaaro te Feia haapii Bibilia ia faaohipahia te radio no te haaparare i te parau apî oaoa na Kanada. Hamanihia ˈtura te pu radio CHUC i Saskatoon, Saskatchewan i 1924. Hoê teie o te mau pu radio matamua tei haapuroro i te mau tumu parau Bibilia i Kanada. I 1925, ua faahaerehia teie pu radio nainai i te tahi atu vahi. Ua fatu mai te faanahonahoraa i tera pu radio, e haamauhia ˈtura te mau pu haapurororaa i te fare tahua Regent, e fare teata tahito teie i Saskatoon, ta ratou i hoo mai e i tataî no te reira.

Maoti teie pu radio CHUC, a tahi ra ïa te taata e ora ra na te mau tuhaa fenua o Saskatchewan i faaroo ai i te parau apî oaoa. Ei hiˈoraa, i te hoê oire atea, ua papai te hoê vahine no te ani i te tahi mau papai Bibilia i muri iho i to ˈna faarooraa hoê haapurororaa. Ua parau taeae George Naish e no te ru o ta ˈna aniraa ia hiˈohia, ua haponohia ïa na ˈna te taatoaraa o na ono buka Haapiiraa o te mau Papai (Beretane). Aita taua vahine ra i haamarirau i te haaparare i te poroi o te Faatereraa arii.

HAAMARAMARAMARAA NO NIA I TA TATOU MAU TIATURIRAA

I roto i Te Pare Tiairaa o te 1 no Mati 1925 (Beretane), te vai ra teie tumu parau faufaa “Fanauraa o te nunaa.” No te aha e tumu parau faufaa roa teie? Ua ite iho â te Feia haapii Bibilia e faanahonahoraa ta Satani, o ta ˈna ïa mau varua ino i te raˈi, oia atoa te mau haapaoraa hape, te mau hau faatere e te mau ona tapihoo i te fenua nei. Maoti râ teie tumu parau, ua tauturu “te tavini haapao maitai e te paari” i te mau taeae e tuahine ia taa e faanahonahoraa atoa ta Iehova. E ere roa ˈtu ta Iehova faanahonahoraa mai ta Satani, o te patoi atoa ia Satani e pauroa tei turu ra ia ˈna. (Mat. 24:45) Ua faataa atoa te tavini haapao maitai e ua haamauhia te Faatereraa arii a te Atua i 1914 e i tera atoa matahiti ua hurihia mai Satani e ta ˈna mau demoni i raro i te fenua i muri mai i ‘te tamaˈi tei tupu i nia i te raˈi.’​—Apo. 12:7-9.

Aita vetahi i farii i teie haamaramaramaraa apî. No reira i parauhia ˈi i roto i tera tumu parau: “Mai te peu aita vetahi feia taio o Te Pare Tiairaa e afaro ra i tei papaihia i ǒ nei, te faaitoito nei matou ia ratou ia tiai i te Fatu ma te hau, a tamau noa ˈi i te tavini ia ˈna ma te taiva ore.”

Mai te aha te huru o te rahiraa o te Feia haapii Bibilia? Teie ta Tom Eyre, hoê pionie no Beretane, e parau ra: “Ua oaoa roa te mau taeae i teie faataaraa o te Apokalupo 12. I to matou iho â taaraa e ua haamauhia aˈena te Faatereraa arii i te raˈi, ua oaoa roa matou i te faaite-haere-raa i teie parau apî oaoa. Ua turaihia matou ia poro atu â e ua taa ia matou e ohipa faahiahia mau ta Iehova e rave i mua nei.”

EI ITE NO IEHOVA

I teie mahana, ua matau maitai te mau Ite no Iehova i te Isaia 43:10 e na ô ra: “ ‘O outou to ˈu mau ite,’ te parau ra Iehova, ‘oia mau, ta ˈu tavini, ta ˈu i maiti.’ ” Teie râ, hou 1925, mea varavara roa teie irava i te faahitihia i roto i ta tatou mau papai. Ua taui râ i muri mai. I te roaraa o te matahiti 1925, ua hiˈopoahia te Isaia 43:10 e 12 i roto 11 Pare Tiairaa.

I te hopea o te avaˈe Atete 1925, ua putuputu te Feia haapii Bibilia i te hoê tairururaa i Indianapolis, i Indiana. I nia i te porotarama tairururaa, ua neneihia te hoê poroi farii popou i te mau manihini ta taeae Rutherford i papai. Teie ïa: “Ua tae mai tatou i teie tairururaa ia . . . puaihia tatou no te Fatu, a nehenehe atu ai tatou e hoˈi i roto i te taviniraa ma te itoito rahi ei ite no ˈna.” I te roaraa o tera tairururaa e vaˈu mahana, ua itoitohia te feia tei ruru mai no te faaite haere i te parau mau no nia ia Iehova i te mau taime atoa.

I te Mahana maa 29 no Atete, ua horoa taeae Rutherford i te oreroraa parau “Hoê pii ia ohipa.” Ua faataa o ˈna i te faufaaraa ia faaite haere i te parau mau, a na ô ai: “ ‘O outou ïa to ˈu mau ite,’ te parau ra Iehova, ‘e o vau te Atua.’ I muri iho, teie ta ˈna faaueraa puai mau: ‘A faatia i te tahi tapao no te mau nunaa.’ Aita ˈtu e nunaa i te fenua nei e faatia nei i te tahi tapao aore ra reva no te mau nunaa maori râ [ta ˈna iho mau tavini], oia hoi te feia tei ia ratou ra te varua o te Fatu, e ite atoa ratou no ˈna.”—Isa. 43:12; 62:10.

I muri mai i te oreroraa parau a taeae Rutherford, ua farii pauroa tei ruru mai i teie faaotiraa “Poroi o te tiaturiraa,” e haapapu ra o te Faatereraa arii a te Atua te ravea hoê roa no te fanaˈo i “te mau haamaitairaa o te hau, te ruperuperaa, te ea, te ora, te tiamâraa e te oaoa mure ore.” I muri mai, ua hurihia teie faaotiraa na roto e rave rahi reo e ua neneihia ei api parau. E 40 mirioni api parau tei operehia.

Aita â râ te Feia haapii Bibilia i amo atura i te iˈoa Ite no Iehova. Tau matahiti i muri mai te tupuraa te reira. Noa ˈtu râ, ua taa ˈtu â ia ratou ta ratou hopoia e riro ei Ite no ˈna.

FAREREI FAAHOU I TEI ANAANATAE MAI

No te mea te rahi noa mai ra te Feia haapii Bibilia na te ao nei, ua faaitoito te faanahonahoraa ia ratou ia farerei faahou i te feia tei anaanatae i te parau apî oaoa. I muri mai i te opereraahia te api parau Poroi o te tiaturiraa (Beretane), teie ta te Bulletina e faaue ra: “A hoˈi faahou i te mau fare aita te feia poro i vaiiho i te tahi papai, tera râ o te api parau Poroi o te tiaturiraa tei vaiihohia.”

I roto i te Bulletin no Tenuare 1925, teie ta hoê o te Feia Haapiiraa Bibilia no Plano i Texas i parau: “Ua putapû matou i te iteraa mea rahi aˈe te taata tei anaanatae mai na te tuhaa fenua mea pinepine i te porohia, i na te mau vahi a tahi ra a porohia ˈi. I na ahuru matahiti i mairi, e pae taime te pororaahia te poroi i te hoê oire nainai o ta matou tuhaa fenua. . . . Aita i maoro aˈenei, ua poro tuahine Hendrix e to ˈu mama na reira, e mea rahi aˈe te buka ta raua i vaiiho atu i na mua ˈˈe.”

E i te fenua Panama, teie ta te hoê pionie i papai: “Mea rahi tei ore i farii mai ia ˈu i te farereiraa matamua, ua taui râ ratou i to ˈu hoˈiraa ˈtu i ǒ ratou i te piti aore ra te toru o te farereiraa. Te rahiraa o ta ˈu ohipa i roto i te pororaa i teie matahiti, te farerei-faahou-raa ïa i te feia ta ˈu i poro na mua ˈˈe, e mea rahi te faatiaraa oaoa no nia vetahi o ratou.”

MEA RAHI ATU Â TE OHIPA

I roto i ta ˈna rata no te mau pionie, ua faataa poto noa taeae Rutherford eaha tei ravehia i te roaraa o te matahiti 1925, eaha atoa te ravehia i 1926. Ua parau oia: “I te roaraa o teie matahiti, ua fanaˈo outou i te haamaitairaa e tamahanahana e rave rahi e oto ra. Ua oaoa roa to outou aau no te reira . . . I teie matahiti i mua, e fanaˈo outou e rave rahi ravea no te faaite i te parau mau no nia i te Atua e ta ˈna Faatereraa arii, e no te faatia i to ˈna reva no te mau nunaa. . . . E tamau anaˈe ïa tatou pauroa i te faateitei i to tatou reo no te arue i to tatou Atua e to tatou Arii.”

A piri mai ai te hopea o te matahiti 1925, ua opua te mau taeae e faararahi i te Betela i Brooklyn. I 1926 ïa te haamataraa te paturaa rahi roa ˈˈe a te faanahonahoraa.