Te hinaaro ra Iehova ia tatarahapa te taata atoa

1. Eaha ta te hoê taata e rave ia tatarahapa o ˈna?

IA RAVE tatou i te ohipa ino, mea faufaa roa ia tatarahapa tatou. Te parau ra te Bibilia e tatarahapa te hoê taata i te taime e taui ai o ˈna i to ˈna feruriraa no nia i te mea ino e to ˈna haerea. E faaoti atoa o ˈna i te ore e tapiti.—A hiˈo i te taˈo “Tatarahapa” i roto i te Titionare o te mau taˈo Bibilia.

2. No te aha e titauhia ˈi ia haapii tatou no nia i te tatarahapa? (Nehemia 8:9-11)

² O tatou pauroa te titauhia ia haapii no nia i te tatarahapa no te mea e hara tatou i te mau mahana atoa. Ei huaai no Adamu raua Eva, ua roohia tatou pauroa i te hara e te pohe. (Roma 3:23; 5:12) E ere ïa mea ohie no tatou e no te feia atoa mea puai to ratou faaroo mai te aposetolo Paulo ia haavî i te hinaaro e rave i te hara. (Roma 7:21-24) Te auraa anei aita e ravea faahou? Oia te vai ra. E Atua aroha hamani maitai Iehova e te hinaaro ra o ˈna ia oaoa tatou. A hiˈo na i tei tupu no te ati Iuda i te tau o Nehemia. (A taio i te Nehemia 8:9-11.) Aita Iehova i hinaaro ia faahapa noa ratou ia ratou iho, ia tatarahapa râ e ia haamori faahou ia ˈna ma te oaoa. Tera ta Iehova e hinaaro ra e haapii mai. Ia tatarahapa tatou e faaore iho â o ˈna i ta tatou mau hara.

3. Eaha ta tatou e hiˈopoa i roto i teie tumu parau?

³ I roto i teie tumu parau e haapii atu â tatou no nia i te tatarahapa. E hiˈopoa tatou e toru manaˈo faufaa: A tahi, eaha ta Iehova i haapii i te nunaa Iseraela no nia i te tatarahapa. A piti, mea nafea oia i te tautururaa i te feia rave hara ia tatarahapa. E a toru, eaha ta Iesu i haapii i ta ˈna mau pǐpǐ no nia i te tatarahapa.

EAHA TA IEHOVA I HAAPII I TE NUNAA ISERAELA NO NIA I TE TATARAHAPA?

4. Eaha ta Iehova i haapii i te nunaa Iseraela no nia i te tatarahapa?

⁴ I to Iehova horoaraa i te mau ture i te nunaa Iseraela, ua fafau ratou i te auraro atu. Ia pee noa ratou i teie mau ture e paruru e e haamaitai Iehova ia ratou. Ua parau Iehova: “E ere hoi teie faaueraa ta ˈu e faaue nei ia [outou] i teie mahana i te mea fifi roa no [outou], e ere atoa mea atea ia [outou].” (Deut. 30:11, 16) Tera râ, ia faaroo ore te mau Iseraela, ei hiˈoraa ma te haamori i te tahi mau atua, e tatara Iehova i ta ˈna haamaitairaa e e mauiui roa ratou. E ere râ te auraa, e faarue o ˈna i to ˈna nunaa. E nehenehe ratou e hoˈi “ia Iehova to [ratou] Atua” e e faaroo faahou i to ˈna reo. (Deut. 30:1-3, 17-20) Te auraa, ia tatarahapa ratou e faafatata e e haamaitai faahou Iehova ia ratou.

5. Mea nafea Iehova i te faaiteraa aita o ˈna i faarue i to ˈna nunaa? (Te mau arii 2, 17:13, 14)

⁵ Pinepine to Iehova nunaa i te orure hau ia ˈna. Ua haamori ratou i te idolo e ua rave i te mau peu hairiiri. Ei faahopearaa, ua roohia ratou i te ati. Aita râ Iehova i faarue ia ratou. Ua tono noa o ˈna i ta ˈna mau peropheta no te faaitoito i to ˈna nunaa ia tatarahapa e ia haamori faahou ia ˈna.—A taio i Te mau arii 2, 17:13, 14.

6. Mea nafea Iehova i te faaohiparaa i ta ˈna mau peropheta no te haapii i to ˈna nunaa i te faufaaraa o te tatarahapa? (A hiˈo atoa i te hohoˈa.)

⁶ Pinepine Iehova i te faaohipa i te mau peropheta no te faaara e no te aˈo i to ˈna nunaa. Ei hiˈoraa, ua parau o ˈna na roto ia Ieremia: “A hoˈi mai, e Iseraela taiva e . . . Eita vau e hiˈo riri ia oe, e Atua taiva ore hoi au . . . Eita vau e inoino e a muri noa ˈtu. A faˈi noa mai ua hara oe, ua orure hau hoi oe ia Iehova.” (Ier. 3:12, 13) Ua parau atoa o ˈna na roto i te peropheta Ioela: “[A] hoˈi mai ia ˈu nei ma to outou aau atoa.” (Ioe. 2:12, 13) Ua faaite atoa Iehova na roto ia Isaia: “A tamâ ia outou. A faaea i te rave i ta outou mau ohipa iino i mua i to ˈu mata. Eiaha e rave faahou i te mea ino.” (Isa. 1:16-19) Na roto ia Ezekiela, ua ani Iehova: “Mea au anei na ˈu ia pohe te taata ino? . . . E ere anei mea au aˈe na ˈu ia fariu ê oia i to ˈna mau haerea a ora noa ˈtu ai oia? Eita roa vau e au ia pohe te taata . . . A fariu mai ïa e ia ora outou.” (Ezk. 18:23, 32) E oaoa Iehova ia tatarahapa te taata i ta ratou mau hara, no te mea te hinaaro ra oia ia ora ratou e a muri noa ˈtu. Tera râ, eita Iehova e tiai roa ia tatarahapa te taata rave hara no te tauturu ia ˈna. E hiˈo anaˈe i te tahi mau hiˈoraa.

7. Eaha ta Iehova i haapii i to ˈna nunaa na roto i te aamu o Hosea e ta ˈna vahine?

⁷ A hiˈo na eaha ta Iehova i haapii i to ˈna nunaa na roto i te aamu o te peropheta Hosea e ta ˈna vahine ra o Gomera. Ua faaturi Gomera e ua faarue ia Hosea no te haere na muri i te tahi atu tane. Tera râ, inaha ua ite Iehova eaha to roto i te aau, ua ani ïa o ˈna ia Hosea: “E here faahou oe i taua vahine ra o tei herehia e te hoê tane ê e o te faaturi ra, mai ia Iehova e here i te nunaa o Iseraela, area ratou, te fariu ra ïa i te mau atua ěê.” (Hos. 3:1; Mas. 16:2) A tapao na, te faaturi noa ra Gomera i to Iehova aniraa ia Hosea ia faaore i te hara a ta ˈna vahine e ia rave faahou mai ia ˈna.a Hoê â huru no Iehova, aita o ˈna i faarue i to ˈna nunaa. Noa ˈtu te rave noa ra ratou i te mau ohipa iino ua here noa Iehova ia ratou. Ua tono noa oia i te mau peropheta no te faaitoito i to ˈna nunaa ia tatarahapa e ia taui i to ratou haerea. Te haapii mai ra teie aamu e tauturu Iehova, o “te hiˈopoa i te aau,” i te taata o te rave noa ra i te hara ia tatarahapa. (Mas. 17:3) Ta tatou ïa e hiˈo mai.

E NAFEA IEHOVA E TAUTURU AI I TE FEIA RAVE HARA IA TATARAHAPA?

8. Mea nafea Iehova i te tautururaa ia Kaina ia tatarahapa? (Genese 4:3-7) (A hiˈo atoa i te hohoˈa.)

⁸ O Kaina te tamarii matahiapo a Adamu raua Eva e ua roohia o ˈna i te hara a to ˈna na metua. Te faaite ra te Bibilia: “E ohipa ino ta ˈna.” (Ioa. 1, 3:12) Tera paha te tumu i ore ai Iehova “i farii ia Kaina e ta ˈna ô.” I tera taime, ua nehenehe o ˈna e taui. Aita râ, “riri roa ihora Kaina e inoino ihora.” Eaha ïa ta Iehova i rave? (A taio i te Genese 4:3-7.) Ma te mǎrû ua haaferuri Iehova ia Kaina e haamaitai oia ia ˈna ia rave o ˈna i te mea maitai. Ua faaara atoa Iehova e ia ore o ˈna e haavî i to ˈna riri, e hara ïa o ˈna i te pae hopea. Aita râ Kaina i faaroo e aita o ˈna i farii i ta Iehova tauturu no te tatarahapa. Te auraa anei ïa eita faahou Iehova e tauturu i te tahi atu mau taata rave hara ia tatarahapa? Eita!

9. Mea nafea Iehova i te tautururaa ia Davida ia tatarahapa?

⁹ Mea here roa na Iehova i te arii Davida, “te tahi taata e au i to [ˈna] aau.” (Ohi. 13:22) Tera râ, e hara ino mau ta Davida i rave. Ua faaturi e ua haapohe oia i te hoê taata. Ia au i te Ture a Mose, e tano ia haapohehia o ˈna. (Lev. 20:10; Num. 35:31) Ua hinaaro râ Iehova e tauturu ia Davida.b Tono ihora oia i te peropheta Natana ia Davida ra noa ˈtu i tera taime, aita â oia i tatarahapa ˈtura. Ua faaohipa Natana i te hoê aamu o tei haaputapû roa i te aau o Davida. Taa ihora ia ˈna e ua haamauiui oia ia Iehova e tatarahapa ˈtura oia. (Sam. 2, 12:1-14) Ua papai o ˈna i te hoê Salamo no te faaite ua tatarahapa mau â oia. (Sal. 51, upoo parau) Ua tamahanahana teie Salamo e rave rahi taata hara e ua faaitoito ia ratou ia tatarahapa. Oia mau, te mauruuru nei tatou i to Iehova faaiteraa i to ˈna here ia Davida e to ˈna tautururaa ia ˈna ia tatarahapa.

10. Eaha to oe huru a feruri ai i to Iehova faaoromai e to ˈna hinaaro e faaore i ta tatou mau hara?

¹⁰ Mea au ore roa na Iehova i te hara, te mau huru hara atoa. (Sal. 5:4, 5) Tera râ, mea here na ˈna ia tatou. E tauturu mai o ˈna ia aro i te hara. Ua ineine noa o ˈna i te tauturu i te feia atoa tei rave i te hara ino mau ia tatarahapa e ia faafatata ia ˈna. E parau mahanahana teie! A feruri ai i to Iehova faaoromai e to ˈna hinaaro e faaore i ta tatou mau hara, e itoito atu â tatou i te vai taiva ore e i te tatarahapa oioi. I teie nei, e hiˈo tatou eaha ta Iesu i haapii i ta ˈna mau pǐpǐ no nia i te tatarahapa.

EAHA TA IESU I HAAPII I TA ˈNA MAU PǏPǏ NO NIA I TE TATARAHAPA?

11-12. Eaha ta Iesu i haapii i te taata no nia i te huru faaoreraa i te hara a to ˈna Metua? (A hiˈo atoa i te hohoˈa.)

¹¹ I te senekele matamua, ua tae te taime e fa mai ai te Mesia. Mai tei faahitihia i te tumu parau na mua ˈtu, ua faaohipa Iehova ia Ioane Bapetizo raua Iesu ia haapii i te taata i te faufaaraa ia tatarahapa.—Mat. 3:1, 2; 4:17.

¹² A ora ˈi i te fenua, ua haapii Iesu i te taata e ua ineine noa to ˈna Metua i te faaore i te hara. Ua faataa o ˈna i te reira na roto i te faahohoˈaraa o te tamaiti tei moˈe. Ua faarue teie tamaiti i te fare o to ˈna metua e ua rave oia i te ohipa haapaoraa ore. “Haamata ˈtura oia i te feruri maitai” e hoˈi atura i te fare. Eaha te huru o to ˈna metua tane? Te faaite ra Iesu e “tei te atea ê â [te tamaiti], ite maira to ˈna metua tane ia ˈna, aroha ihora, horo maira, tauahi maitai ihora ia ˈna e apa maira.” Ua ani teie tamaiti i to ˈna metua tane ia faariro ia ˈna ei rave ohipa. Ua pii noa râ te metua tane ia ˈna “ta ˈu tamaiti” e ua farii faahou ia ˈna i roto i to ˈna utuafare. Parau atura te metua tane: “I moˈe na oia e ua hoˈi mai.” (Luka 15:11-32) Hou Iesu a haere mai ai i nia i te fenua, ua ite oia i to ˈna Metua i te faaiteraa i te aumihi e te faaoreraa i te hara a te feia tatarahapa. Mea putapû mau teie faahohoˈaraa o te faaite ra i to Iehova aroha hamani maitai!

13-14. Eaha te haapiiraa ta Petero i huti mai e eaha ta ˈna i haapii ia vetahi ê? (A hiˈo atoa i te hohoˈa.)

¹³ Mea rahi te mau haapiiraa ta te aposetolo Petero i huti mai no nia i te tatarahapa e te faaoreraa i te hara. Pinepine o ˈna i te hapa e ua ineine noa Iesu i te faaore atu. Ei hiˈoraa, i muri iho i to Petero haavareraa e toru taime aita o ˈna i ite ia Iesu, ua hepohepo roa o ˈna. (Mat. 26:34, 35, 69-75) I muri iho i to Iesu tia-faahou-raa mai, ua fa ˈtu o ˈna ia Petero, e au ra e o ˈna anaˈe i tera taime. (Luka 24:33, 34; Kor. 1, 15:3-5) Eita e ore ua faaore Iesu i ta ˈna hapa e ua tamahanahana i ta ˈna aposetolo tei tatarahapa.

¹⁴ Ua taa ia Petero eaha te tupu ia tatarahapa e ia faaorehia te hara. Ua nehenehe ïa o ˈna e haapii ia vetahi ê no nia i te reira. I muri iho i te Penetekose, ua faataa Petero i te ati Iuda e ua haapohe ratou i te Mesia. Tera râ, ua faaitoito atoa o ˈna ia ratou ma te parau: “No reira, a tatarahapa e a fariu mai ia tumâhia ta outou mau hara, a horoa noa mai ai Iehova i te anotau haumârû.” (Ohi. 3:14, 15, 17, 19) Ua faaite Petero ia tatarahapa te hoê taata, e fariu mai o ˈna. Te auraa, e taui oia i to ˈna feruriraa e e faaea i te rave i te mea ino no te faaoaoa i te Atua. Ua faataa Petero e tumâ roa Iehova i ta ratou mau hara. Tau matahiti i muri aˈe, ua parau oia i te mau Kerisetiano: “Mea faaoromai râ [Iehova] ia outou, no te mea aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.” (Pet. 2, 3:9) Auê ïa parau mahanahana e faaore mau â Iehova i ta tatou mau hara noa ˈtu mea ino!

15-16. (1) Eaha ta Paulo i haapii mai no nia i te tatarahapa? (Timoteo 1, 1:12-15) (2) Eaha ta tatou e hiˈopoa i to muri nei tumu parau?

¹⁵ E rave rahi ohipa ino ta Saulo i rave. Ua hamani ino o ˈna i te mau pǐpǐ a Iesu. (Ohi. 7:58–8:3) Eita e ore ua manaˈo te rahiraa o te mau Kerisetiano i tera ra tau eita roa ˈtu o ˈna e taui. Ua ite râ Iesu e nehenehe Saulo e taui e e tatarahapa. Ua ite Iesu raua Iehova i to ˈna mau huru maitatai. Ua parau hoi Iesu: “E farii maitihia e au tera taata no te faaite i to ˈu nei iˈoa i te mau nunaa ěê.” (Ohi. 9:15) Hau atu, na roto i te hoê semeio ua tauturu Iesu ia ˈna ia tatarahapa. (Ohi. 9:1-9, 17-20) Tatarahapa ˈtura Saulo e riro maira o ˈna ei Kerisetiano. Ua piihia oia i muri mai te aposetolo Paulo. Pinepine o ˈna i te faaite i to ˈna mauruuru rahi ia Iesu raua Iehova no to raua aroha hamani maitai. (A taio i te Timoteo 1, 1:12-15.) Ua parau hoi oia: “Te hinaaro ra te Atua, no to ˈna hamani maitai, e aratai ia oe i te tatarahapa.”—Roma 2:4.

¹⁶ I te hoê taime, ua faaroo Paulo i te hoê fifi i roto i te amuiraa no Korinetia. Ua vaiiho-noa-hia te tahi Kerisetiano e rave ra i te peu taotoraa tia ore. Eaha ïa ta Paulo i parau ia ratou ia rave? E haapii mai tatou e faaite Iehova i to ˈna here ia aˈo o ˈna i ta ˈna mau tavini. E faaite atoa oia i to ˈna aroha hamani maitai ia tatarahapa ratou. E ite mai tatou e nafea ia pee i to Iehova hiˈoraa. E faataa ˈtu â to muri nei tumu parau i tei tupu i roto i te amuiraa no Korinetia.