Uiraa a te feia taio

Te parauhia ra i te Tesalonia 2, 3:14 ia “tapao” i te tahi taata. E aratairaa anei teie no te mau matahiapo aore ra no te mau Kerisetiano tataitahi?

Ua papai te aposetolo Paulo i te mau Kerisetiano no Tesalonia: “Ia ore . . . te tahi ia faaroo i ta matou parau i roto i teie rata, a tapao ia ˈna.” (Tes. 2, 3:14) Na mua ˈˈe, ua parau tatou no te mau matahiapo teie aratairaa. Ia tamau noa te hoê taata i te tâuˈa ore i te mau aˈoraa Bibilia, e horoa ïa te mau matahiapo i te hoê oreroraa parau faaararaa i te amuiraa. I muri iho, eita te feia poro e amuimui faahou i te hoê mero tei tapaohia.

E titauhia râ te hoê faatanoraa. E au ra e ua horoahia teie aratairaa i te mau Kerisetiano tataitahi o te amuiraa. Na ratou e faaoti eaha te rave i roto i te tahi mau tupuraa. Eita ïa e titauhia i te mau matahiapo ia horoa i te hoê oreroraa parau faaararaa. No te aha teie faatanoraa? E hiˈo mai tatou i te mau irava tapiri o te Tesalonia 2, 3:14.

Ua parau Paulo “e haerea tano ore” to vetahi i roto i te amuiraa. Aita ratou e tâuˈa ra i te mau aˈoraa Bibilia. I to ˈna tere na mua ˈtu, ua horoa oia i teie aˈoraa: “Ia ore te tahi ia hinaaro e rave i te ohipa, eiaha atoa ïa e tamaa.” Oia mau, te vai ra tei ore i hinaaro e rave i te ohipa noa ˈtu e nehenehe ta ratou. Hau atu, e faaô ratou i roto i ta vera ma ohipa. Eaha ïa te huru o te mau Kerisetiano i nia i te tahi taata e haerea tano ore to ˈna?—Tes. 2, 3:6, 10-12.

Ua parau Paulo: “A tapao ia ˈna.” Ia au i te taˈo Heleni, e titauhia ia haapao maitai i tera huru taata. Ua horoa Paulo i teie aratairaa i te amuiraa taatoa, eiaha noa i te mau matahiapo. (Tes. 2, 1:1; 3:6) No reira, na te mau Kerisetiano tataitahi e maiti “eiaha faahou e amuimui” i te hoê Kerisetiano tei ore i auraro i te mau aˈoraa.

E titauhia anei râ ia faariro i te hoê Kerisetiano e haerea tano ore to ˈna mai te hoê taata tei tuuhia i rapae i te amuiraa? Eita. Ua parau hoi Paulo: “E tamau noa râ i te aˈo ia ˈna mai te taeae ra te huru.” E tamau noa ïa te mau Kerisetiano tataitahi i te amuimui ia ˈna i te mau putuputuraa e te pororaa, eiaha râ i te mau taime faaanaanataeraa. No te aha? Ua parau Paulo “ia haama oia.” Oia mau, ia na reira ratou e haama paha ïa oia no ta ˈna i rave e e taui o ˈna i to ˈna haerea.—Tes. 2, 3:14, 15.

E nafea te mau Kerisetiano i teie mahana e tapao ai i te tahi taata? Na mua roa, ia papu ia tatou e “haerea tano ore” iho â to ˈna mai ta Paulo i parau. Aita o ˈna i parau no te feia tei rave i te faaotiraa aita e tuati ra i to tatou manaˈo haava. Aita hoi te mau aratairaa Bibilia i ofatihia. Aita atoa o ˈna i parau no te feia o tei haamauiui ia tatou. Ua parau râ Paulo no te feia o tei patoi i te mau aratairaa no ǒ mai i te Atua.

I teie mahana, ia ite tatou i te hoê Kerisetiano e feruriraa auraro ore to ˈna,a na tatou tataitahi e faaoti eiaha e amuimui faahou ia ˈna i te taime faaanaanataeraa. Inaha e faaotiraa na tatou, eita ïa tatou e faaite haere ia vetahi ê. E tamau noa râ tatou i te amuimui ia ˈna i te mau putuputuraa e te pororaa. Ia taui râ o ˈna i to ˈna haerea, e nehenehe ïa tatou e amuimui faahou ia ˈna i te mau taime atoa.