Ta Iehova i rave no te faaora i te taata i te hara e te pohe

1-2. (1) Eaha te hara, e nafea tatou e upootia ˈi i nia i te hara? (A hiˈo atoa “No te taa maitai atu â.”) (2) Eaha ta tatou e hiˈopoa i roto i teie tumu parau e to muri nei? (A hiˈo atoa “No te feia taio” i roto i teie vea.)

MEA here anei na Iehova ia oe? E ite oe i te pahonoraa ia haapii oe mea nafea o ˈna i te faatiamâraa ia oe i te hara e te pohe. E enemi riaria mau te hara.a Eita e haere ia oe ia aro i te hara o oe anaˈe. E hara hoi tatou pauroa i te mau mahana atoa e no te hara tatou e pohe ai. (Roma 5:12) Teie râ, ua fafau Iehova i te faaora ia tatou i te hara e te pohe. Maoti noa ta ˈna tauturu e upootia ˈi tatou i nia i te hara!

² Fatata 6 000 matahiti to Iehova tautururaa i te taata ia tavini ia ˈna noa ˈtu mea hara ratou. Mea here hoi na ˈna ia tatou mai te omuaraa mai iho â. Mea rahi ta ˈna i rave no te tauturu mai. Ua ite te Atua e pohe tatou no te hara. Aita o ˈna e hinaaro ra ia pohe tatou, ia fanaˈo râ tatou i te ora mure ore. (Roma 6:23) O ta Iehova ïa e hinaaro no oe. I roto i teie tumu parau, e pahono tatou i teie na uiraa: (1) Eaha te tiaturiraa ta Iehova i horoa i te taata? (2) I tahito ra, eaha ta te taata i rave no te faaoaoa ia Iehova e no te riro ei hoa no ˈna? (3) Eaha ta Iesu i rave no te faaora i te huitaata i te hara e te pohe?

EAHA TE TIATURIRAA TA IEHOVA I HOROA I TE TAATA?

3. Eaha tei turai ia Adamu raua Eva ia hara?

³ I to Iehova poieteraa i te tane e te vahine matamua, ua hinaaro o ˈna ia oaoa noa raua. Ua horoa oia i te hoê nohoraa nehenehe mau, ua faaipoipo ia raua e ua horoa i te tahi hopoia faahiahia. Ua anihia raua ia faaî i te fenua, ta raua e faariro ei paradaiso mai te ô i Edene. Hoê noa faaueraa ta ˈna i horoa ˈtu. Ua faaara Iehova ia raua e ia faaroo ore raua e pohe raua. Ua ite tatou eaha tei tupu. Ua faahema te hoê melahi ino ia Adamu raua Eva. Aita hoi o ˈna e here ra i te Atua e i te taata. Hema ˈtura Adamu raua Eva a hara ˈtu ai. Aita raua i tiaturi i to raua Metua î i te here. Ei faahopearaa, ua mauiui roa raua, ua ruauhia, ua maˈihia e ua pohe atura raua. Ua tano iho â ïa ta Iehova i parau.—Gen. 1:28, 29; 2:8, 9, 16-18; 3:1-6, 17-19, 24; 5:5.

4. No te aha mea au ore na Iehova i te hara? (Roma 8:20, 21)

⁴ Ua tuu mai Iehova i teie aamu ei haapiiraa na tatou no te tauturu mai ia taa no te aha mea au ore na ˈna i te hara. E haafifi te hara i to tatou auhoaraa e o Iehova. Hau atu, e pohe tatou no te hara. (Isa. 59:2) Mea hae roa na Satani ia Iehova e te taata, no reira o ˈna i faahema ˈi ia Adamu raua Eva. Te faahema noa ra oia i te taata e tae roa mai i teie mahana. Ua manaˈo paha ïa Satani e ua upootia oia i te ô i Edene. Ua hape râ o ˈna. Aita roa ˈtu Iehova i taui i ta ˈna opuaraa no te huaai o Adamu raua Eva no to ˈna here rahi. Oioi o ˈna i te horoa ˈtu i te tiaturiraa. (A taio i te Roma 8:20, 21.) Ua ite o ˈna e te vai ra te taata o te maiti i te here e i te faaroo ia ˈna. Ua rave Iehova i te faanahoraa ia faafatata ˈtu ratou ia ˈna e ia tiamâ mai i te hara e te pohe. Eaha ïa tera faanahoraa?

5. Eaha te tiaturiraa ta Iehova i horoa? A faataa. (Genese 3:15)

⁵ A taio i te Genese 3:15. Na roto i teie parau tohu, ua horoa Iehova i te hoê tiaturiraa. Ua parau hoi o ˈna e haamou oia ia Satani. Ua tohu te Atua e fa mai te hoê “huaai” o te faaora i te huitaata. E haamou teie huaai ia Satani e e faaore oia i te mau fifi atoa ta ˈna i faatupu i Edene. (Ioa. 1, 3:8) Teie râ, e tairi Satani i taua huaai ra ma te haapohe ia ˈna. E haamauiui roa te reira ia Iehova. Noa ˈtu râ, ua ineine Iehova e tera huaai i te mauiui no te faaora mai i te taata i te hara e te pohe.

MEA NAFEA TO VETAHI I TAHITO RA FAAOAOARAA IA IEHOVA?

6. Eaha ta Abela, Noa e te tahi atu i rave no te riro ei hoa no Iehova?

⁶ I te roaraa o te tau, ua faaite Iehova e nafea te taata hara e nehenehe ai e riro ei hoa no ˈna. O Abela te teina a Adamu raua Eva, te taata matamua tei tiaturi ia Iehova. Ua pûpû o ˈna i te tahi tusia ia Iehova no to ˈna here ia ˈna. Ua hinaaro atoa o ˈna e faaoaoa ia Iehova e e riro ei hoa no ˈna. Ei tiai mamoe, ua pûpû ïa Abela i te tahi mau fanauˈa mamoe ia Iehova. ‘Ua farii Iehova ia Abela e ta ˈna ô.’ (Gen. 4:4) Ua farii atoa o ˈna i te tusia a te tahi atu mau taata tei here e tei tiaturi ia ˈna mai ia Noa. (Gen. 8:20, 21) A farii ai Iehova i ta ratou mau tusia, ua faaite o ˈna e nehenehe te taata e faaoaoa ia ˈna e e riro ei hoa no ˈna.b

7. Ua ineine Aberahama i te pûpû i ta ˈna tamaiti ei tusia. Eaha te haapii mai i to ˈna hiˈoraa?

⁷ Ua ani Iehova ia Aberahama, te hoê taata faaroo puai, ia rave i te tahi ohipa fifi mau, oia hoi ia pûpû ia Isaaka ta ˈna tamaiti otahi ei tusia. Ua tapea râ Iehova ia Aberahama ia haapohe i ta ˈna tamaiti. Ua ite maitai hoi o ˈna e mauiui roa Aberahama ahani o ˈna i haapohe ia Isaaka. Te haapii mai ra teie hiˈoraa eaha ta Iehova e rave i muri aˈe. E pûpû o ˈna i ta ˈna Tamaiti otahi ei tusia no to ˈna here rahi i te taata.—Gen. 22:1-18.

8. Eaha te haapii mai i te mau tusia pûpûhia i raro aˈe i te Ture a Mose? (Levitiko 4:27-29; 17:11)

⁸ I to Iehova horoaraa i te Ture a Mose i te nunaa Iseraela, ua ani oia ia ratou ia pûpû i te animara ei tusia no ta ratou mau hara. (A taio i te Levitiko 4:27-29; 17:11.) Te faaite ra teie mau tusia e horoa Iehova i te hoê tusia maitai aˈe, hoê tusia ïa o te faaora i te taata i te hara. Ua aratai te Atua i te mau peropheta ia tohu no nia i te huaai fafauhia, oia hoi te Tamaiti a te Atua. Ua faataa ratou e haamauiuihia e e haapohehia o ˈna. (Isa. 53:1-12) A feruri na, ua fafau Iehova e pûpû o ˈna i ta ˈna Tamaiti here ei tusia no te faaora i te huitaata, ia oe atoa, i te hara e te pohe.

EAHA TA IESU I RAVE NO TE FAAORA I TE HUITAATA?

9. Eaha ta Ioane Bapetizo i parau no Iesu? (Hebera 9:22; 10:1-4, 12)

⁹ I te matahiti 29, a ite ai Ioane Bapetizo ia Iesu ua parau o ˈna: “A hiˈo na i te Arenio a te Atua o te faaore roa i te hara a to te ao nei!” (Ioa. 1:29) Te haapapu ra teie parau e o Iesu iho â te huaai ta te Atua i fafau. E horoa Iesu i to ˈna ora ei tusia. I teie nei, te vai ra te hoê tiaturiraa papu no te taata hara atoa inaha ua tae mai te huaai fafauhia no te faaora i te huitaata.—A taio i te Hebera 9:22; 10:1-4, 12.

10. Mea nafea Iesu i te tautururaa i te feia rave hara?

¹⁰ Ua hinaaro Iesu e tauturu i te feia iho â râ o tei rave i te hara ia riro ratou ei pǐpǐ na ˈna. Ua ite hoi oia no te hara e mauiui ai te taata. No reira o ˈna i tauturu ai i tei rave i te hara. Ua parau hoi Iesu: “E ere te taote no te feia oraora maitai, no te feia maˈi râ.” Ua na ô atoa o ˈna: “Ua haere mai hoi au e titau i te feia rave hara ia tatarahapa, eiaha râ te feia parau-tia.” (Mat. 9:12, 13) Ua rave iho â Iesu mai ta ˈna i parau. Ua faaore oia i te mau hara a te hoê vahine o tei horoi i to ˈna avae i to ˈna roimata. (Luka 7:37-50) Ua haapii Iesu i te parau mau i te hoê vahine no Samaria, noa ˈtu ua ite oia e faaturi o ˈna. (Ioa. 4:7, 17-19, 25, 26) No te hara e pohe ai te taata. Ua horoa râ te Atua ia Iesu i te mana no te faatia faahou i te tane, te vahine e te tamarii mai te pohe mai.—Mat. 11:5.

11. No te aha te feia hara e faafatata ohie noa ˈi ia Iesu?

¹¹ Eita tatou e maere ia ite no te aha te taata e faafatata ohie noa ˈi ia Iesu. Ua faaite Iesu i te aumihi. No reira ratou e ore ai e taiâ i te paraparau ia ˈna. (Luka 15:1, 2) Ua haapopou atoa o ˈna i te feia o tei faatupu i te faaroo ia ˈna. (Luka 19:1-10) Ua faaite o ˈna i te aroha hamani maitai mai to ˈna Metua ra o Iehova. (Ioa. 14:9) Na roto i ta ˈna mau parau e ohipa ua faaite Iesu mea aumihi Iehova e mea here na ˈna i te taata. E hinaaro atoa o ˈna e tauturu ia ratou ia upootia i nia i te hara. No reira Iesu i tauturu ai i te feia hara ia taui i to ratou haerea e ia pee ia ˈna.—Luka 5:27, 28.

12. Eaha ta Iesu i parau i ta ˈna mau pǐpǐ no nia i to ˈna pohe?

¹² Ua ite Iesu e titauhia ia pûpû o ˈna i to ˈna ora ei tusia. Ua parau o ˈna i ta ˈna mau pǐpǐ e tuuhia o ˈna i te rima o te enemi e e haapohehia o ˈna i nia i te pou. (Mat. 17:22; 20:18, 19) E nehenehe to ˈna tusia e hopoi ê i te hara a to te ao, mai ta Ioane i faaite e mai ta te mau peropheta i tohu. Ua parau atoa Iesu e maoti to ˈna tusia, e faafatata mai o ˈna i “te mau huru taata atoa” ia ˈna. (Ioa. 12:32) E nehenehe ïa te taata hara e faaoaoa ia Iehova ma te faatupu i te faaroo ia Iesu e ma te pee i ta ˈna mau faaueraa. Ia na reira ratou, e tiamâ mai ratou i te hara. (Roma 6:14, 18, 22; Ioa. 8:32) No reira Iesu i farii ai i te faaruru i te hoê pohe mauiui mau.—Ioa. 10:17, 18.

13. Eaha tei tupu hou Iesu a pohe ai, e eaha ta te reira e haapii mai ra no nia ia Iehova? (A hiˈo atoa i te hohoˈa.)

¹³ Ua tuuhia Iesu i te rima o te enemi, ua tapeahia, ua tuhihia, ua pari-haavare-hia, ua faautuahia e ua hamani-ino-hia o ˈna. Ua patitihia ˈtura oia e te mau faehau i nia i te pou no te haapohe ia ˈna. Ua faaoromai maite o ˈna i te mauiui iti rahi. O Iehova râ tei mauiui roa ino. E mana hoi to ˈna no te tapea i te reira. No te aha ïa o ˈna i vaiiho noa ˈi? No to ˈna ïa here ia tatou. Ua parau Iesu: “No to ˈna here rahi i to te ao i horoa mai ai te Atua i ta ˈna Tamaiti otahi ia ore ia mou te taata atoa o te faatupu i te faaroo ia ˈna, ia roaa râ ia ratou te ora mure ore.”—Ioa. 3:16.

14. Eaha ta te tusia o Iesu e faaite ra no nia ia Iehova?

¹⁴ O te tusia o Iesu te haapapuraa rahi roa ˈˈe e mea here na Iehova i te huaai o Adamu raua Eva, ia oe atoa ïa. Ua tae roa hoi o ˈna i te pûpû i ta ˈna Tamaiti here ei tusia e i te faaruru i te mauiui iti rahi no te faaora ia oe i te hara e te pohe. (Ioa. 1, 4:9, 10) Oia mau, te hinaaro ra Iehova e tauturu ia tatou tataitahi ia aro i te hara e ia upootia.

15. Eaha te rave e faaorehia ˈi ta tatou mau hara?

¹⁵ Maoti te tusia o ta ˈna Tamaiti otahi e faaorehia ˈi ta tatou mau hara. E tuhaa atoa râ ta tatou. Eaha ïa? Ua parau Ioane Bapetizo: “A tatarahapa, ua fatata mai hoi te Faatereraa arii o te raˈi.” Ta Iesu atoa ïa i parau. (Mat. 3:1, 2; 4:17) No reira, mea faufaa roa ia tatarahapa tatou no te riro ei hoa no Iehova e ia faaorehia ta tatou mau hara. Eaha râ te auraa e tatarahapa? E nafea te reira e tauturu mai ai ia aro i to tatou huru tia ore? E pahono mai to muri nei tumu parau.