Eaha te tauturu mai ia taui oe i te amuiraa?

E fifi ê ta Nicolas raua Céline i farerei. Ua tono te amaa no Farani ia raua i roto i te hoê amuiraa apî. Te na ô ra raua: “I te omuaraa ua oaoa roa mâua. I muri aˈe râ, ua mihi mâua i to mâua mau hoa. Aita â hoi to mâua e hoa atura i roto i te amuiraa apî.”a Eaha te tauturu mai ia taui oe i te amuiraa? E nafea vetahi ê e tauturu mai ai? Eaha te mau haamaitairaa ta oe e fanaˈo e e faafanaˈo i ta oe amuiraa apî?

MAHA ARATAIRAA O TE TAUTURU IA OE

1. A turui i nia ia Iehova. (Sal. 37:5) A hiˈo na ia Kazumi no Tapone, ua taui o ˈna i te amuiraa ta ˈna i matau e 20 matahiti no te mea ua tonohia ta ˈna tane i te tahi atu vahi no te ohipa. Mea nafea to ˈna vaiihoraa na Iehova e aratai ia ˈna? Te na ô ra o ˈna: “Ua faaite au ia Iehova i to ˈu haapeapearaa, moˈemoˈe e ahoaho. Ua tauturu noa mai o ˈna.”

E nafea ia turui noa i nia ia Iehova? Ia tupu maitai te hoê raau, e titauhia te pape e te mau maitai o te repo. Hoê â huru no to tatou faaroo, e titauhia ia atuatu maitai. Ua puaihia to Nicolas tiaturi ia Iehova i to ˈna feruriraa i te hiˈoraa o Aberahama, Iesu, e Paulo tei rave i te haapaeraa rahi i roto i ta ratou taviniraa. E tauturu mai ta oe iho haapiiraa Bibilia ia faaruru i te mau tauiraa o te nehenehe e tupu e ia faaitoito i te mau taeae e tuahine o ta oe amuiraa apî.

2. Eiaha e faaau i ta oe amuiraa na mua aˈe i ta oe amuiraa apî. (Koh. 7:10) Ua haere Jules no Bénin e faaea i Marite. Mea taa ê roa te taˈere i ǒ. Te na ô ra o ˈna: “Mai te huru ra e e titauhia ia ˈu ia faaite o vai au i te taata atoa ta ˈu e farerei.” No te mea aita â oia i matau atura i te mau taeae e tuahine i ǒ, haamata ihora oia i te faaatea ê ia ˈna. A matau mai ai râ ia ratou, taui aˈe nei Jules i ta ˈna huru hiˈoraa. Te na ô ra oia: “Noa ˈtu nohea mai tatou, hoê â tatou pauroa. O te huru noa te taa ê. Mea faufaa roa ia farii i te reira.” Eiaha roa ˈtu ïa e faaau i ta oe amuiraa na mua aˈe i ta oe amuiraa apî. Te na ô ra Anne-Lise, hoê pionie tamau: “Aita vau i haere i roto i te hoê amuiraa apî no te mihi i te amuiraa ta ˈu i vaiiho atu, no te apo atu â râ i te haapiiraa.”

E ara te mau matahiapo atoa ia ore e faaau i te amuiraa na mua aˈe i te amuiraa apî. E ere no te mea mea taa ê te raveraa i roto i te amuiraa apî mea hape ïa. E haerea paari ia ite eaha te huru oraraa i taua vahi ra, hou a horoa ˈi i to oe manaˈo. (Koh. 3:1, 7b) Mea maitai aˈe ia faaite i te hiˈoraa maitai, i te faahepo i te mau taeae ia pee i to oe mau manaˈo.—Kor. 2, 1:24.

3. A turu maite i ta oe amuiraa apî. (Phil. 1:27) Noa ˈtu e titauhia te tutavaraa e e rave rahi taime ia taui oe i te amuiraa, mea faufaa roa te mau putuputuraa e ia haere tino roa ˈtu mai te peu e nehenehe. E nafea hoi te mau mero o ta oe amuiraa apî e nehenehe ai e tauturu ia oe, aita â anaˈe ratou i farerei atura ia oe? Ua haere Lucinda e ta ˈna e piti tamahine i Afirika apatoa. Te na ô ra o ˈna: “Ua faaitoito mai to ˈu mau hoa ia piri noa i te mau mero o ta ˈu amuiraa apî, ia poro na muri ia ratou e ia apiti i te mau putuputuraa. Ua pûpû atoa matou i to matou fare no te putuputuraa no te pororaa.”

Na roto i te “rohi-amui-raa” e te mau taeae e tuahine o ta oe amuiraa apî i roto i te taviniraa, e puai atu â to oe “faaroo i te parau apî oaoa.” Ua faaitoito te mau matahiapo ia Anne-Lise ia poro na muri i te mero tataitahi o te amuiraa. Te na ô ra o ˈna: “E tauturu rahi mai te reira ia matau maitai i ta oe amuiraa apî.” E nehenehe atoa oe e apiti i te tahi atu mau ohipa mai te tamâraa e te atuaturaa o te Piha a te Basileia. E faaiteraa ïa e te turu nei oe i ta oe amuiraa. Ia na reira oe, e matau maitai te mau taeae e tuahine ia oe e e piri atu â oe ia ratou.

4. A faahoa i te mau taeae e tuahine. (Kor. 2, 6:11-13) Te ravea maitai no te faahoa, o te tâuˈaraa ïa ia vetahi ê. A tapiri atu i te mau mero o te amuiraa hou a haamata ˈi te putuputuraa e ia oti. Ia tutava oe i te haamanaˈo i to ratou iˈoa e i te faafatata ia ratou, e piri mai ratou ia oe a riro atu ai outou ei hoa rahi.

A faaite i te mau taeae e tuahine o ta oe amuiraa apî o vai mau â oe. Te na ô ra Lucinda: “Ma te titau manihini i te mau taeae e tuahine o ta ˈu amuiraa apî i to matou fare, ua riro matou ei hoa rahi.”

A FARII MAITAI TE TAHI I TE TAHI

E taiâ vetahi ia tomo i roto i te hoê Piha a te Basileia aita anaˈe ratou i matau i te mau taata tei putuputu mai. E nafea ïa oe e nehenehe ai e tauturu atu? Ua faaitoito Paulo: “Mai te Mesia i farii maitai ia outou, e farii maitai anaˈe ïa te tahi i te tahi.” (Roma 15:7) Ma te pee i te hiˈoraa o te Mesia, e farii maitai te mau matahiapo i tei tae apî mai i roto i te amuiraa. (A hiˈo i te tumu parau tarenihia “Tauturu ia taui oe i te amuiraa.”) O te amuiraa taatoa râ, te tamarii atoa, te nehenehe e faahoa ia ratou.

Mea faufaa ia farii maitai ia vetahi ê i roto i te amuiraa ma te titau manihini ia ratou i to fare e ma te tauturu atu. Ua rave te hoê tuahine i te taime no te faataa i te tahi tuahine tei tae apî mai eaha te faanahoraa o te mau pereoo mataeinaa e te tahi atu faurao. Ua putapû roa teie tuahine e na te reira i tauturu ia ˈna ia oaoa i roto i ta ˈna amuiraa apî.

HOÊ RAVEA NO TE NUU I MUA I TE PAE VARUA

A paari mai ai te vivi, e matara to ˈna iri e rave rahi taime hou o ˈna a nehenehe ai e maurere. Hoê â huru ia taui oe i te amuiraa, e titauhia ia oe ia haapae i te mau haapeapearaa o te tapea ia oe ia rave hau atu â i roto i ta oe taviniraa. Ua faufaahia Nicolas raua Céline i to raua haereraa i roto i te amuiraa apî. Te na ô ra raua: “Ua titauhia ia faatupu mâua i te tahi mau huru maitatai no te haamatau i te taata e i teie vahi apî. Ua riro teie tupuraa ei faaineineraa na mâua.” Ua faufaa-atoa-hia Jean-Charles e to ˈna utuafare. Te na ô ra oia: “I roto i ta matou amuiraa apî, ua nehenehe ta ˈu mau tamarii e nuu i mua i te pae varua e ua piri atu â ratou ia Iehova. Tau avaˈe noa i muri iho, ua rave ta mâua tamahine i te tumu parau i te putuputuraa hebedoma e ua riro ta mâua tamaiti ei taata poro bapetizo-ore-hia.”

Eaha râ te rave mai te peu eita oe e nehenehe e tavini i te vahi e hinaarohia te tauturu? A faaohipa ïa i teie mau manaˈo tauturu i roto i ta oe amuiraa. A turui noa ˈi i nia ia Iehova, a turu maite i ta oe amuiraa ma te apiti ia vetahi ê i roto i te taviniraa, a faahoa i te mau taeae e tuahine aore ra ia piri atu â oe i to oe mau hoa e tia ˈi. E nehenehe paha ta oe e tauturu i tei tae apî mai aore ra tei faaruru ra i te fifi. I te mea e o te here te tapao o te mau Kerisetiano mau, ia na reira oe e nuu atu â oe i te pae varua. (Ioa. 13:35) Ia papu ia oe “e mauruuru . . . te Atua i taua mau huru tusia ra.”—Heb. 13:16.

Noa ˈtu e ere mea ohie, ua oaoa vetahi mau Kerisetiano i roto i ta ratou amuiraa apî. E nehenehe atoa ïa oe! Te faatia ra Anne-Lise: “A taui ai i te amuiraa, ua matau atu â vau e rave rahi taeae e tuahine.” Te na ô ra Kazumi: “Ua taa ia ˈu i teie nei e ia taui oe i te amuiraa, e tauturu Iehova ia oe ma te ravea huru rau, ta oe i ore i manaˈo aˈenei.” Ua parau Jules: “Ua tauturu mai to ˈu mau hoa apî ia ore au e moˈemoˈe faahou. Mea here roa na ˈu i ta ˈu amuiraa apî, e mauiui roa vau mai te peu e titauhia ia faarue vau ia ratou.”