E taui anei outou i te faaearaa?
Mai te peu e oia, e rave rahi mau mea e titauhia ia imi outou e vetahi ê i te ravea. Ia pee outou i te mau taahiraa avae matamua e faahitihia ra i muri nei, e matau oioi ïa outou i ta outou amuiraa apî.
1) Ia papu ia outou te vahi e faaea ˈi outou, e nehenehe te papai parau o ta outou nei amuiraa e ite mai i te vahi o te Piha no te Basileia o ta outou amuiraa apî. Ia tae outou i taua vahi ra, a imi teihea te piha e a ani maitai i te mau hora o te mau putuputuraa. Mai te peu e e putuputu e rave rahi mau amuiraa i roto i taua Piha no te Basileia ra, a ani i te mau matahiapo ia haapapu ia outou e te noho ra outou i roto i te tuhaa fenua a teihea amuiraa. A haere i te mau putuputuraa ma te ore e haamaoro e a haamatau atu i te mau matahiapo.
2) E rave amui te mau papai parau o ta outou nei amuiraa e to te amuiraa apî i te ohipa no te hapono i ta outou tabula Taviniraa a te taata poro e tae noa ˈtu ta te utuafare. E faatae-atoa-hia te hoê rata faaiteraa i te mau matahiapo o ta outou amuiraa apî. (Hiˈo Te taviniraa o te Basileia no Febuare 1991, Pahonoraa i ta outou mau uiraa.) E faaara te tomite tiaauraa o taua amuiraa apî ra i to outou taeraa mai i te tiaau o te haapiiraa buka e tano ia nehenehe oia e paraparau ia outou e e haapapu atu ia outou i te vahi o ta outou haapiiraa buka apî.—Roma 15:7.
3) E tuhaa faahiahia roa ta te feia poro atoa o ta outou amuiraa apî: te haamatauraa ia outou e te tautururaa ia maitai outou. (Hiˈo i te Ioane 3, 8.) Papu maitai e ia hinaaro outou e fanaˈo i te mau faaitoitoraa te tahi e te tahi o te patu e te mau taeae e tuahine, e tia ïa ia outou ia haere i te mau putuputuraa.
4) Eiaha roa ˈtu outou e tiai ia oti roa te mau ohipa tauiraa i te faaearaa no te haere e poro e ta outou amuiraa apî. A tuu i te mau faufaa o te Basileia i te parahiraa matamua, e manuïa iho â te toea; hau atu â, e maitai outou i roto i to outou vahi oraraa apî. (Mat. 6:33) Ia nahonaho outou i roto i to outou faaearaa apî, e hinaaro paha outou e titau manihini vetahi mau melo o te amuiraa no te haamatau maitai ia ratou.—Roma 12:13b.
E faatupu te tauiraa i te faaearaa e rave rahi mau ohipa. Ia pee râ te feia atoa tei roto i teie tupuraa i te mau faaueraa, e ore taua mau ohipa ra e haafifi i te pae varua. E papu roa ïa ia tatou paatoa e tei roto tatou i te hoê utuafare fetii Kerisetiano rahi î i te here.