Te maitai e te ino: E aratairaa papu te Bibilia

E HINAARO IHO Â TATOU I TE ARATAIRAA

I roto i te Bibilia, te faataa ra te Atua ra o Iehovaa e hinaaro iho â te taata i ta ˈna tauturu no te aratai ia ratou. (Ieremia 10:23) No reira o ˈna i horoa mai ai i ta ˈna mau ture aveia i roto i te Bibilia. Mea here na ˈna i te huitaata nei e aita o ˈna e hinaaro ra ia rave tatou i te mau faaotiraa tano ore, a fifi atu ai to tatou oraraa. (Deuteronomi 5:29; Ioane 1, 4:8) Hau atu â, ei Atua poiete, tei ia ˈna ra te paari e te ite no te horoa mai i te mau aˈoraa maitai roa ˈˈe. (Salamo 100:3; 104:24) Tera râ, eita Iehova e faahepo i te taata ia ora ia au i ta ˈna mau ture aveia.

Ua horoa Iehova i na taata matamua ra o Adamu raua Eva i te mau mea atoa ta raua e hinaaro mau â no te oaoa noa. (Genese 1:28, 29; 2:8, 15) Ua horoa atoa o ˈna i te tahi mau aratairaa ohie ia auraro raua. E ua vaiiho o ˈna e na raua e faaoti e pee anei aore ra eita. (Genese 2:9, 16, 17) Tera râ, ua faaoti Adamu raua Eva e rave mai ta raua i hinaaro. (Genese 3:6) Eaha te faahopearaa? Ua maitai mai anei te oraraa o te taata a faaoti ai ratou iho eaha te mea maitai e te mea ino? Aita. I te roaraa o te tau, ua ite-maitai-hia eita te tâuˈa-ore-raa i te mau ture aveia a te Atua e hopoi mai i te hau e te oaoa.—Koheleta 8:9.

Te horoa ra te Bibilia i te aratairaa ta tatou e hinaaro mau ra no te rave i te mau faaotiraa î i te paari, noa ˈtu ihea tatou e faaea ˈi. (Timoteo 2, 3:16, 17; a hiˈo i te tumu parau tarenihia “Te hoê buka no te mau taata atoa.”) E hiˈo anaˈe eaha ta te Bibilia e parau ra.

No te ite atu â no te aha mea tano ia piihia te Bibilia “te parau . . . a te Atua,” a mataitai i te video O vai te Fatu o te Bibilia? i nia i te jw.org.—Tesalonia 1, 2:13.

TE FAAITE RA TE BIBILIA EAHA TA TE ATUA E TITAU RA IA TATOU

Te faahiti ra te Bibilia i te mau haaraa a te Atua i nia i te taata mai te omuaraa mai â. E tauturu te Bibilia ia tatou ia taa eaha to te Atua manaˈo no nia i te mea maitai e te mea ino. (Salamo 19:7, 11) E fanaˈo atoa tatou i te mau aratairaa papu no te rave i te faaotiraa maitai i te mau mahana atoa.

A hiˈo na i te aˈoraa i roto i te Maseli 13:​20: “Te taata e haere ra e te feia paari, e paari ïa, te taata râ e amuimui e te maamaa, e fifi ïa.” Ua tano teie aˈoraa i tahito ra, e tano atoa râ i teie mahana. Mea rahi te faaueraa tumu papu mai teie i roto i te Bibilia.—A hiˈo i te tumu parau tarenihia “Te mau aratairaa Bibilia î i te paari no te mau tau atoa.”

E ui paha oe: ‘E nafea e papu ai ia ˈu e faufaahia vau i te mau aratairaa a te Bibilia?’ E faahiti to muri nei tumu parau i te mau hiˈoraa no to tatou nei tau.