E nafea ia fanaˈo i te hoê a muri aˈe papu?

Mai ta tatou i ite mai i roto i te mau tumu parau na mua ˈtu, ua tuu te taata i to ratou tiaturi i roto i te mau ohipa maere mau, te ite rahi, te taoˈa rahi e te riroraa ei taata maitai no te fanaˈo i te hoê oraraa maitai aˈe. E ere roa ˈtu râ tera huru feruriraa i te mea tano! Te auraa anei ïa aita e aratairaa papu no te fanaˈo i te hoê oraraa maitai aˈe?

TE MAU ARATAIRAA PAARI I ROTO I TE HOÊ BUKA

Ia rave tatou i te mau faaotiraa, e ani na mua tatou i te aratairaa a te hoê taata paari aˈe ia tatou. Hoê â huru no te fanaˈo i te hoê oraraa maitai, e imi tatou i te aratairaa paari e te papu. E nehenehe tatou e fanaˈo i tera mau aratairaa i roto i te hoê buka tei papaihia a 3 500 matahiti i teie nei, oia hoi te Bibilia.

No te aha e tiaturi ai i te Bibilia? No te mea no ǒ mai te reira i te Tumu o te paari. O ˈna tei parauhia “ To te mau Mahana Tahito ra,” “mai tahito mai â e a muri noa ˈtu.” (Daniela 7:9; Salamo 90:2) O ˈna “Te Atua poiete i te raˈi, te Atua mau, Tei hamani i te fenua.” (Isaia 45:18) O Iehova to ˈna iˈoa e ua faaite o ˈna i te reira i te taata.—Salamo 83:18.

No ǒ mai te Bibilia i te Atua tei poiete i te huitaata, aita ïa tera buka e haafaufaa rahi aˈe i te hoê nunaa i te tahi atu. O te mau taata atoa te faufaahia i te mau aˈoraa e vai ra i roto. Teie te buka huri-roa ˈˈe-hia e opere-roa ˈˈe-hia na te ao nei.a Te auraa ïa o te mau taata atoa te nehenehe e taio, e taa e e faufaa i te reira. Ta te Bibilia iho â e parau ra:

“E ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.”—OHIPA 10:34, 35.

Mai te hoê metua o te here e o te tauturu i ta ˈna mau tamarii, te tauturu ra Iehova, to tatou Metua î i te here, ia tatou maoti ta ˈna Parau, te Bibilia. (Timoteo 2, 3:16) E nehenehe tatou e tiaturi i ta ˈna Parau no te mea na ˈna i poiete ia tatou e o ˈna anaˈe tei ite eaha te mea maitai aˈe no tatou.

TE MAU ARATAIRAA PAPU

E nehenehe tatou e tiaturi i ta te Bibilia e parau ra no nia i te tupu a muri aˈe no te mea te ite nei tatou i te mau tupuraa tei tohuhia a 2 000 matahiti i teie nei.

TUPURAA

“E aro te tahi nunaa i te tahi atu nunaa e te tahi faatereraa i te tahi atu faatereraa. E tupu te aueueraa fenua rahi, e i tera e tera vahi te oˈe e te maˈi pee.”—LUKA 21:10, 11.

HURU FERURIRAA O TEIE AO

“I te mau mahana hopea, e tau ino mau ïa e te fifi ia faaruru. E haapao noa te taata ia ratou iho, e nounou i te moni, e faateitei, e teoteo, e faaino, e faaroo ore i te metua, e mauruuru ore, e taiva, e au ore te taata te tahi i te tahi, e etaeta, e pari haavare, e haavî ore ia ratou iho, e iria, e au ore i te maitai, e haavare, e farii ore i te aˈoraa, e faaoru, mea au na ratou i te mau mea navenave eiaha râ i te Atua.”—TIMOTEO 2, 3:1-4.

Eaha to outou manaˈo a ite ai e te tupu ra te mau parau i tohuhia na i roto i te Bibilia i teie mahana? Aita e ore, hoê â manaˈo to outou i to Leung, te hoê tane no Hong Kong. Te na ô ra o ˈna: “Ua papaihia te mau parau tohu Bibilia e rave rahi matahiti i teie nei. Eita roa ˈtu e haere i te hoê taata ia tohu i te taua mau tupuraa ra ma te tano roa. Ua papu ia ˈu, no te paari rahi e vai ra i roto, e ere te mau parau o te Bibilia i te manaˈo taata noa, e puai paari aˈe râ tei aratai ia ratou.”

Ua tupu aˈe na e rave rahi parau tohu papaihia i roto i te Bibilia.b E haapapuraa te reira e no ǒ mai te Bibilia i te Atua ra. Te na ô ra Iehova: “O vau te Atua, e aita ˈtu mai ia ˈu.” “Mai te haamataraa, e tohu vau i te hopearaa.” (Isaia 46:9, 10) E tumu papu ïa to tatou e tiaturi i ta te Bibilia e parau ra no a muri aˈe.

TE MAU ARATAIRAA E FAUFAAHIA OUTOU I TEIE NEI Â E A MURI NOA ˈTU

E faufaahia outou a pee ai i te mau aratairaa e itehia i roto i te Bibilia. Teie mai te tahi.

FERURIRAA TANO NO NIA I TE MONI E TE OHIPA

“Mea au aˈe hoê apu rima î i te faafaaearaa i e piti apu rima î i te ohipa rohirohi e te aˈuaˈuraa mataˈi.”—KOHELETA 4:6.

TE HOÊ ORARAA UTUAFARE OAOA

“Ia here te tane faaipoipo tataitahi i rotopu ia outou i ta ˈna vahine mai ta ˈna e here ia ˈna iho. Area te vahine faaipoipo ra, ia faatura maite ïa i ta ˈna tane e tia ˈi.”—EPHESIA 5:33.

TE HURU O TE TAATA

“A tuu i te riri e a faarue i te riri rahi. Eiaha e inoino a rave atu ai i te mea ino.”—SALAMO 37:8.

Ia ora outou ia au i ta te Bibilia e haapii ra, e faufaahia outou i teie nei â e a muri aˈe. I roto i te Bibilia, e itehia te mau parau fafau a te Atua no nia i te hoê a muri aˈe faahiahia mau

TE HAU E TE ATI ORE

“E au roa ratou i te rahi o te hau.”—SALAMO 37:11.

TE NOHORAA E TE MAA NO TE TAATOARAA

“E hamani ratou i te fare e e ora ratou i roto. E tanu ratou i te vine e e amu ratou i te hotu.”—ISAIA 65:21.

AITA FAAHOU TE MAˈI E TE POHE

“E ore roa te pohe, e ore atoa te oto e te auê e te mauiui.”—APOKALUPO 21:4.

Eaha te rave no te fanaˈo i teie mau haamaitairaa? E pahonohia tera uiraa i roto i to muri nei tumu parau.

a No te ite atu â no nia i te huriraa e te piaraa o te Bibilia, a hiˈo i te reni natirara www.jw.org/ty e a pata i nia HAAPIIRAA BIBILIA > TE BIBILIA I TE ROARAA O TE TAU.

b No te ite atu â, a hiˈo i te pene 9 o te buka La Bible: Parole de Dieu ou des hommes? piahia e te mau Ite no Iehova e itehia i nia i te reni www.jw.org/fr. A pata i nia BIBLIOTHÈQUE > LIVRES & BROCHURES.