Mea faufaa noa anei ta te Bibilia e haapii ra no nia i te mea maitai e te mea ino?
E rave rahi taata e tae noa ˈtu te feia o te tiaturi i te Atua o te manaˈo ra, aita te mau faaueraa a te Bibilia no nia i te taatiraa i te pae tino e te faaipoiporaa e tano faahou ra no teie tau. No reira te tahi mau haapaoraa i taui ai ta ratou haapiiraa. Mea faufaa noa anei ta te Bibilia e haapii ra no nia i te mea maitai e te mea ino? Papu roa. Teie te tahi mau tumu.
Mea faufaa ia haapao te taata eaha te mea maitai e te mea ino i te aro o te Atua
Ua hamanihia te taata ia arataihia ratou e te Atua. Te na ô ra te Bibilia: “Aita e tiaraa to te taata e haere ra ia aratai i to ˈna mau taahiraa.” (Ieremia 10:23) Noa ˈtu ua horoa mai Iehovaa i te tiaraa ia maiti, aita o ˈna i horoa mai i te tiaraa no te faaoti eaha te mea maitai e te mea ino. No reira o ˈna e hinaaro ai ia turui tatou i nia ia ˈna.—Maseli 3:5.
I roto i te Bibilia tatou e ite ai eaha te mea maitai e te mea ino i te aro o te Atua. Teie e piti tumu o te haapapu ra mea faufaa noa â ta ˈna mau aratairaa.
Na te Atua i hamani ia tatou. (Salamo 100:3) Ua ite maitai ïa Iehova eaha te mea maitai no to tatou ea, to tatou tino, to tatou feruriraa e no to tatou aau. Ua ite atoa o ˈna eaha te mau faahopearaa ino ia ore noa ˈtu tatou e haapao i ta ˈna aratairaa. (Galatia 6:7) Te hinaaro ra Iehova i to tatou maitai. No reira te Bibilia e parau ai o “Iehova te Atua, tei haapii ia oe ia faufaahia oe, tei aratai ia oe i te eˈa ia haere oe.”—Isaia 48:17.
E nehenehe to tatou aau e haavare mai. E rave rahi taata o te manaˈo nei e taa ia ratou eaha te mea maitai e te mea ino mai te peu e vaiiho ratou na to ratou aau e aratai atu. Tera râ, te parau ra te Bibilia: “Mea haavarevare aˈe te aau i te tahi atu mau mea atoa e mea atâta roa.” (Ieremia 17:9) Mai te peu aita to tatou aau i arataihia e te paari o te Atua, e turai mai te reira ia rave i te mea e tatarahapa ˈi tatou.—Maseli 28:26; Koheleta 10:2.
Mea tano anei ia huna te mau tia haapaoraa i ta te Bibilia e parau ra no nia i te mea maitai e te mea ino?
E ere i te mea tano! Te haapii ra te Bibilia i te parau mau no nia i te Atua e i ta ˈna e hinaaro ra ia rave tatou. (Korinetia 1, 6:9-11; Galatia 5:19-23) Te hinaaro ra te Atua ia noaa i te taata atoa te ite papu i te parau mau. (Timoteo 1, 2:3, 4) No reira te tanoraa mau, mea titauhia ia haapii te tavini a te Atua ia vetahi ê i ta te Bibilia e parau ra.—Tito 1:7-9.
E rave rahi taata o te ore e hinaaro e tâuˈa i te mau faaueraa a te Bibilia. E imi ïa ratou i te mau tia haapaoraa o “te parau mai i ta ratou e hinaaro e faaroo.” (Timoteo 2, 4:3, nota) Teie râ te faaararaa a te Parau a te Atua: “Ua ati te feia e parau ra mea ino te maitai, e mea maitai te ino.” (Isaia 5:20) Oia mau, e faautua te Atua i te mau tia haapaoraa o tei ore i haapii i te parau mau ia vetahi ê no nia i te mea maitai e te mea ino i te aro o te Atua!
Te faaitoito ra anei te Bibilia ia au ore i te taata?
Aita. Ia hinaaro tatou ia mauruuru mai te Atua, mea titauhia ia pee tatou i te hiˈoraa e te mau haapiiraa a Iesu Mesia. E ua haapii oia i ta ˈna mau pǐpǐ ia ore e haava ia vetahi ê, ia here e ia faatura râ ratou i te mau taata atoa.—Mataio 5:43, 44; 7:1.
Ua haapii Iesu i ta ˈna mau pǐpǐ ia haapao i ta te Atua mau aratairaa i roto i to ratou oraraa. Ua faaite atoa râ o ˈna ia ratou eita vetahi e na reira. (Mataio 10:14) Aita o Iesu i parau i ta ˈna mau pǐpǐ ia faahepo i te taata ia farii i ta te Atua mau aratairaa.—Ioane 17:14, 16; 18:36.
Eaha te tahi mau maitai ia haapao tatou i ta te Bibilia mau aratairaa?
Te feia atoa o te tutava i te haapao i te mea maitai e te mea ino i te aro o te Atua, e fanaˈo ïa i te maitai i teie nei â e a muri aˈe. (Salamo 19:8, 11) Teie te tahi mau maitai:
a O Iehova te iˈoa o te Atua i roto i te Bibilia.—Salamo 83:18.