2 | “Te tamahanahanaraa a te mau Papai”

TA TE BIBILIA E PARAU RA: “Te mau parau atoa hoi i papaihia mai tahito mai â, ua papaihia ïa ei haapiiraa ia tatou e ia noaa atoa te tiaturiraa na roto i te faaoromai tamau e te tamahanahanaraa a te mau Papai.”—ROMA 15:4.

Eaha te auraa?

Maoti te mau manaˈo mahanahana i roto i te Bibilia, e noaa ia tatou te puai e te faaoromai tamau ia faaruru tatou i te mau manaˈo faatoaruaru. Te haapapu atoa mai ra te Bibilia e ia tae i te hoê mahana, e faaore-roa-hia teie mau manaˈo toaruaru.

E nafea te reira e tauturu ai?

O tatou pauroa te faaruru nei i te hepohepo. Tera râ, no te taata aau toaruaru e te taata aau ahoaho, e faaruru ratou i teie mauiui i te mau mahana atoa. E nafea te Bibilia e tauturu ai?

E rave rahi manaˈo maitatai i roto i te Bibilia o te nehenehe e mono i te mau manaˈo faatoaruaru. (Philipi 4:8) Maoti te Bibilia, e î to tatou feruriraa i te manaˈo tamahanahana o te tauturu ia tatou ia haavî i to tatou mau huru aau.—Salamo 94:18, 19.
E tauturu te Bibilia ia tatou ia patoi i te manaˈo e mea faufaa ore tatou.—Luka 12:6, 7.
E rave rahi irava Bibilia o te haapapu mai ra e ere o tatou anaˈe, tei pihai iho atoa Iehova ia tatou. Te taa maitai ra ia ˈna eaha to roto i to tatou aau.—Salamo 34:18; Ioane 1, 3:19, 20.
Te fafau ra te Bibilia e fatata Iehova i te faaore i te mau manaˈo e haamauiui ra ia tatou. (Isaia 65:17; Apokalupo 21:4) Ia mauiui tatou no te mau manaˈo horuhoru, na teie parau fafau e horoa mai i te puai no te faaoromai tamau.

E nafea te Bibilia e tauturu ai?—Jessica

To ˈu faarururaa i te manaˈo faatoaruaru

“I te 25raa o to ˈu matahiti, ua roohia vau i te maˈi faatoaruaru ino mau. E haamanaˈo noa vau i te mau tupuraa mauiui ta ˈu i faaruru. E puta noa mai teie mau manaˈo i roto i to ˈu feruriraa e eita te reira e vî ia ˈu. Ua faataa mai te mau taote i te tumu o to ˈu maˈi. Ua ora vau i te tahi mau tupuraa mauiui mau, i muri iho ua manaˈonaˈo noa vau i te reira. Taa ê atu i te mau raau i horoahia mai, e aparau vau e te hoê taote no te faatitiaifaro i to ˈu huru feruriraa.”

E nafea te Bibilia e tauturu ai ia ˈu?

“Ia uˈana roa to ˈu maˈi, e mau roa to ˈu hutiraa aho, e ahoaho roa vau e eita te taoto e topa faahou. Pinepine i te po, e rohirohi roa vau, inaha e rahi roa mai to ˈu mau manaˈo tapitapi. Mai ta te Salamo 94:19 e faataa ra, e nehenehe te Atua e tamahanahana ia tatou ia rahi roa to tatou ahoaho. No reira, i pihai iho i to ˈu roˈi, e tuu noa vau i ta ˈu Bibilia e te hoê buka papai e irava faaitoito to roto. Ia ore to ˈu taoto e topa, e taio vau i te tahi mau irava Bibilia. A na reira ˈi, te vaiiho ra ïa vau i te mau manaˈo o te Atua ia tamahanahana ia ˈu.

“Te faaitoito mai ra te Bibilia ia patoi i te mau manaˈo o te ore e tuati ra i to te Atua. Na mua ˈˈe, ua manaˈo vau e mea faufaa ore au e eita te taata e here ia ˈu. Ua haapii râ vau i roto i te Bibilia e ere te reira i te manaˈo tano, inaha e Atua here e e Metua aumihi o Iehova e te haapeapea atoa nei oia no tatou tataitahi. Ua noaa mǎrû noa ˈtura ia ˈu i te haavî i to ˈu feruriraa. Ua hiˈo vau ia ˈu iho mai ia Iehova e hiˈo mai ra. Ua tauturu rahi mai te reira ia taui i ta ˈu huru hiˈoraa ia ˈu iho.

“Te tiai ru nei au i te taime e faaorehia ˈi te mau manaˈo haamauiui e faatoaruaru e te mau maˈi manava atoa. E horoa mai te reira i te puai no te faaoromai tamau a tiai noa ˈtu ai i te taime eita faahou vau e aro i teie maˈi.”