Te tâuˈa mai ra to tatou Atua poiete î i te here ia tatou

1. TE FAAHITI RA TO TATOU ATUA POIETE I TE MAHANA

A feruri na i te hoê oraraa aita e mahana. Nehenehe anei? Te horoa nei te mahana i te ito i te mau tumu raau ia uaa te mau rauere e te mau tiare, ia hotu mai te maa e te mau huero. E huti mai teie mau tumu raau i te pape i roto i te repo fenua maoti te mau aˈa, a afai atu ai i te reira i te mau rauere ra e a faarue atu ai i roto i te reva ei ata pape.

Hoê hohoˈa o te hoê faaapu ti heeuri maitai i te pae mouˈa.

2. TE HAAMAIRI RA TO TATOU ATUA POIETE I TE ÛA

E ô faufaa roa te ûa ta te Atua i horoa mai ia nehenehe te fenua e faatupu i te maa. E haamairi mai te Atua i te ûa mai te raˈi mai e te tau auhune ia nehenehe tatou e fanaˈo i te maa e ia î roa to tatou aau i te oaoa.

Te hoê manu o te tia ra i nia i te tahi amaa raau a tamata ˈi i te haru i te hoê maa hotu.

3. TE HOROA MAI RA TO TATOU ATUA POIETE I TE MAA E TE AHU

E rave rahi metua tane o te haapeapea nei no nia i te mau hinaaro o to ratou utuafare i te pae o te maa aore ra te ahu. A tapao na i ta te Bibilia e parau ra: “A hiˈo maitai na i te mau manu o te reva. Eita ratou e ueue i te huero, e ooti e e haaputu i te maa. Teie râ, te faaamu ra to outou Metua i te raˈi ia ratou. E ere anei mea faufaa aˈe outou ia ratou?”—Mataio 6:25, 26.

“A hiˈo maitai na i te mau tiare, e nafea ratou e tupu ai. . . . Te parau atu nei râ vau e aita te ahu o te arii Solomona, noa ˈtu to ˈna unauna rahi, i hau aˈe i te nehenehe i to te hoê o teie mau tiare. Te faaahu nei te Atua i teie mau tiare. . . . E hau atu â ïa oia i te faaahu ia outou!”—Mataio 6:28-30.

Inaha e nehenehe ta te Atua e horoa mai i te maa e e faaahu ia tatou, papu atoa ïa e tauturu mai oia ia noaa i te tahi atu mau mea e hinaarohia i roto i te oraraa. Ia tutava tatou i te rave i to te Atua hinaaro, e haamaitai mai oia i ta tatou mau tutavaraa ia tanu i te maa e ia hotu mai aore ra e tauturu mai oia ia fanaˈo i te hoê ohipa ia nehenehe tatou e hoo i te mea e hinaarohia.—Mataio 6:32, 33.

Oia mau, ia feruri tatou no nia i te mahana, te ûa, te mau manu o te raˈi e te mau tiare, mea rahi te mau haapapuraa e turai ia tatou ia here i te Atua. E faaite mai to muri iho nei tumu parau e mea nafea te Atua poiete i te paraparauraa mai i te huitaata.