E haamaitai te Atua i te feia e tauturu i te taata i roto i te ati

Mea rahi te taata i roto i teie nei ao o te hinaaro ra i te maa e te nohoraa. Area no vetahi, e hinaaro noa ratou i te tahi tiaturiraa no a muri aˈe. Nafea to tatou tautururaa i teie mau taata e faaoaoa ˈi i te Atua a fanaˈo atu ai tatou i ta ˈna haamaitairaa?

TA TE BIBILIA E PARAU RA

“O tei hamani maitai i te taata rii ra, ua horoa oia i te taoˈa na Iehova; e na ˈna e hopoi mai i ta ˈna utua.”—MASELI 19:17.

EAHA TE AURAA IA TAUTURU I TE TAATA I ROTO I TE ATI?

Ua faatia Iesu i te parabole o te hoê taata tei rave-ino-hia e te feia eiâ e tei vaiihohia ma te manaˈo e ua pohe oia. (Luka 10:29-37) Ua tae mai râ hoê taata ěê e ua aupuru oia i teie taata tei rave-ino-hia. Ua na reira oia noa ˈtu e no te tahi fenua ê oia.

Aita teie taata maitai i aupuru noa i te taata tei pêpê i te pae o te ea e i te pae moni. Ua rave hau atu â oia ma te tamahanahana ˈtu.

Eaha ta tatou e haapii mai i teie parabole? Ua faaite Iesu e e titauhia ia tatou ia rave i tei maraa ia tatou no te tauturu i te feia i roto i te ati. (Maseli 14:31) Te haapii mai ra te Bibilia e fatata te Atua i te faaore i te veve e te mauiui. Te na ô ra paha tatou: Nafea e afea te Atua e na reira ˈi? E hiˈopoa tatou i te mau haamaitairaa ta to oe Atua î i te here e horoa na oe no a muri aˈe i roto i to muri nei tumu parau.