“E hotu rahi mai ai te fenua, e na te Atua, na to tatou iho Atua, e haamaitai mai ia tatou nei.”—SALAMO 67:6

Ia oaoa noa oe i te mau haamaitairaa a te Atua e a muri noa ˈtu

Ua fafau te Atua i te peropheta Aberahama e e maitai mai “te mau fenua atoa o te ao nei” na roto i te hoê o to ˈna huaai. (Genese 22:18) O vai ïa teie taata?

A 2 000 matahiti aˈenei, ua horoa te Atua i te mana ia Iesu, e huaai ïa oia na Aberahama, no te faatupu i te mau semeio faahiahia roa. Ua faaite teie mau semeio e na roto ia Iesu e faatupuhia ˈi te parau fafau faahitihia ia Aberahama, oia hoi e maitai mai te mau fenua.—Galatia 3:14.

Ua tauturu teie mau semeio ta Iesu i faatupu ia taa e o o ˈna te taata ta te Atua i maiti no te haamaitai i te huitaata. Ua faaite atoa te reira nafea te Atua e faaohipa ˈi ia Iesu no te haamaitai i te mau taata a muri noa ˈtu. A tapao na nafea te mau semeio ta Iesu i faatupu e haafaufaa ˈi i te tahi o to ˈna mau huru maitatai faahiahia roa.

Te mǎrû: Ua faaora Iesu i te feia maˈi.

I te hoê taime, ua taparu te hoê taata lepera ia Iesu ia faaora ˈtu oia ia ˈna. Ua tapea ˈtura Iesu ia ˈna a na ô ai: “E tia ia ˈu!” I tera iho â taime, ua ora to ˈna maˈi.—Mareko 1:40-42.

Te aau horoa noa: Ua faatamaa Iesu i tei poia.

Aita Iesu i hinaaro ia hoˈi te taata ma te ore e tamaa. E rave rahi taime, ua faatupu Iesu i te hoê semeio no te faatamaa tau tausani taata ma te vahi i te faraoa e te iˈa. (Mataio 14:17-21; 15:32-38) Ua paia roa ratou pauroa e ua toe atoa mai te maa.

Te aumauiui: Ua faatia mai Iesu i te feia pohe.

“Aroha ihora” Iesu i te hoê vahine ivi tei oto no te mea ua ere oia i ta ˈna tamaiti otahi. Aita hoê taata faahou no te aupuru ia ˈna. Ua faatia ïa Iesu i teie tamaiti mai te pohe mai.—Luka 7:12-15.

TE MAU HAAMAITAIRAA I NIA I TE FENUA E A MURI NOA ˈTU

Ua faaite aˈena Iesu e e mana to te Atua no te haamaitai i te huitaata. Mai ta Iesu i fafau, ia hoˈi mai oia, e faaohipa te Mana hope ia ˈna no te faatupu i te mau semeio hau atu â i te faahiahia na te ao nei!

Mai te aha te huru o te oraraa i te taime a faatupu ai te Atua i ta ˈna i fafau ia Aberahama? “E parahi” te feia e here e e faatura ra i te Atua “i te fenua” e e “oaoa ratou i te rahi o te hau ra.” (Salamo 37:11) “E ore roa te pohe, e ore atoa te oto e te auê e te mauiui.”—Apokalupo 21:4.

E oaoa roa tatou ia ora ma te hau i nia i te fenua e a muri noa ˈtu! Te titau manihini nei matou ia oe ia ite atu â no nia i te mau haamaitairaa ta te Faatereraa arii a te Atua e fatata i te faatupu. No te na reira, a haere i nia www.jw.org/ty.