A haapii ia vetahi ê maoti te buka rairai Parau apî oaoa
1. Eaha te fa o te buka rairai Parau apî oaoa?
1 Mai tei tauaparauhia i roto i Ta tatou taviniraa i te Basileia no Tiurai, e mauhaa faufaa te buka rairai Parau apî oaoa a te Atua no te haapii ia vetahi ê. Aita te mau parau o te mau irava i papaihia i roto i teie buka rairai. E nehenehe ïa te taata e ite roa i te reira i roto i te Bibilia. Ua neneihia e rave rahi o ta tatou mau papai haapiiraa ia nehenehe te taata e haapii o o ˈna anaˈe. Ua neneihia râ teie buka rairai ia nehenehe te taata e tauaparau e te hoê taata haapii. Ia pûpû ïa tatou i te reira, e titauhia ia tutava tatou i te faaite i te taata e nafea te haapiiraa e faaterehia ˈi. E ite ïa te taata e e mea faahiahia roa ia haapii i te mau parau apî oaoa o te Bibilia.—Mat. 13:44.
2. E nafea tatou e faaohipa ˈi i te buka rairai Parau apî oaoa i te farereiraa matamua?
2 I te farereiraa matamua: E parau paha oe: “Tei ô nei au no te mea e rave rahi taata o te tapitapi nei no te a muri aˈe o te huitaata. No oe, e maitai anei te oraraa? [A vaiiho ia ˈna ia pahono.] I roto i te Bibilia, e itehia te mau parau apî oaoa o te horoa nei ia tatou i te hoê tiaturiraa. Teie te tahi mau uiraa ta te Bibilia e pahono nei.” A horoa i te buka rairai i te taata e a ani ia ˈna ia maiti i te tahi uiraa i te api hopea. I muri iho, a faaite atu i te tereraa o te haapiiraa ma te faaohipa i te paratarafa matamua o te haapiiraa ta ˈna i maiti. E nehenehe atoa oe e tuu i te hoê uiraa anaanatae mau niuhia i nia i te hoê haapiiraa ta oe i maiti. I muri iho, a faaite atu e nafea te buka rairai e tauturu ai ia ˈna ia ite i te pahonoraa a te Bibilia. Ia tano te tahi video i nia jw.org i te haapiiraa maitihia, e nehenehe vetahi taata poro e faaite i te reira.
3. A faataa e nafea ia faatere i te hoê haapiiraa maoti te buka rairai Parau apî oaoa.
3 Nafea ia faatere i te haapiiraa: (1) A taio i te uiraa tei papai-meumeu-hia e numera to mua noa mai no te tauturu i te taata ia ite eaha te manaˈo tumu. (2) A taio i te paratarafa i raro aˈe i teie uiraa. (3) A taio i te irava papai-faahipa-hia e a faaohipa i te mau uiraa tano no te tauturu i te taata ia ite e nafea te mau irava e pahono ai i te uiraa e numera to mua noa mai. (4) Mai te peu e te vai ra te tahi atu paratarafa i raro aˈe i teie noâ uiraa, a pee faahou â i te mau aratairaa 2 e 3. Ia tano te tahi video i te uiraa e aita anaˈe oe i faaite ê na i te reira, a rave ïa i te taime no te hiˈo i tera video. (5) I te pae hopea, a ani i te taata eaha te pahonoraa o te uiraa tei tapaohia te numera i mua no te haapapu e ua taa anei ia ˈna te reira.
4. Eaha te tauturu ia tatou ia faaohipa i teie mauhaa faufaa ma te aravihi?
4 A tutava i te ite maitai e nafea ia faaohipa i teie mauhaa faufaa. A faaohipa i te reira i te mau taime tano atoa. Hou te haapiiraa taitahi, a feruri eaha te tano no te piahi Bibilia e eaha te ravea maitai aˈe no te haaferuri ia ˈna ma te faaohipa i te mau irava o te haapiiraa. (Mas. 15:28; Ohi. 17:2, 3) A aravihi atu â ˈi oe i te faaohiparaa i teie buka rairai, e riro te reira hoê o te mau mauhaa ta oe e au roa ˈˈe no te haapii i te parau mau ia vetahi ê!