Tauturu i te feia aitâ i farii atura i te buka Bibilia haapii
1. E farii oioi anei te taata atoa i te buka Bibilia haapii? A faataa.
1 Ia riro te hoê taata ei tavini na Iehova, mea faufaa roa ia ite oia i ta te Bibilia e haapii ra. No te tahi râ, e ere te Bibilia i te Parau a te Atua no te mea e ere ratou i te Kerisetiano. Aita roa te tahi atu e tiaturi ra i te Atua e e faatura ra i te Bibilia. Te vai ra te tahi mau ravea o tei tauturu i teie mau taata tei ore i farii oioi i te buka Bibilia haapii. Ua niuhia te mau manaˈo tauturu i muri nei i nia i te mau faatiaraa a te tahi mau taata poro no e 20 fenua.
2. Ia ite tatou i te aha ia faaite mai te hoê taata e aita oia e tiaturi ra i te Atua, e no te aha?
2 Te feia aita e tiaturi ra i te Atua: Mea maitai ia ite i te tumu e ore ai te hoê taata e tiaturi i te Atua. Te tiaturi ra paha oia i te tauiuiraa o te mau mea ora. Peneiaˈe no te mau ohipa tano ore na te ao nei aore ra no te haavarevare o te haapaoraa. Te ora atoa ra paha oia i te hoê fenua mea opanihia ia tiaturi i te Atua. E farii paha oia e te vai ra te Atua, no ˈna râ e ere i te mea faufaa ia tiaturi ia ˈna. Ia faataa mai te taata no te aha oia e ore ai e tiaturi i te Atua, e rave rahi taata poro tei ui: “Ua manaˈo noa anei oe mai tera?” A faaroo e eiaha e tâpû i te parau. Ia ite tatou no te aha, e ite ïa tatou e nafea ia pahono e eaha te papai e pûpû atu.—Mas. 18:13.
3. E nafea ia faatura i te taata e ta ˈna mau tiaturiraa?
3 A haapao maitai ia pahono oe ia ore hoi te taata e manaˈo e te patoi ra oe i ta ˈna mau tiaturiraa. Teie te tahi manaˈo tauturu no Marite mai: “Mea faufaa roa ia faatura i to te taata tiamâraa e maiti i ta ˈna e tiaturi. Eiaha e imi i te haapapu e ua tano tatou. A tuu râ i te mau uiraa ia feruri te taata, a huti mai ai oia i ta ˈna iho faaotiraa.” I muri aˈe i te faarooraa i te pahonoraa a te taata, e ui pinepine te hoê tiaau ratere: “Ua feruri ê na anei oe i teie manaˈo?”
4. E nafea ia poro i te feia e pee ra ia Bouddha?
4 Mea rahi te taata e pee ra ia Bouddha e ore ra e tiaturi i te Atua. Mea au na vetahi taata poro no Beretane e faaohipa i te buka rairai La paix et le bonheur durables: comment les trouver. I muri aˈe i te hiˈopoaraa i te omuaraa o tera papai, e hiˈopoa ratou i na tuhaa “Existe-t-il vraiment un Créateur Très-Haut?” e “Un guide bénéfique pour tous les humains.” I muri iho, e pûpû atu paha te taata poro i te buka Bibilia haapii ma te parau atu: “Noa ˈtu e aita oe e tiaturi ra i te Atua, e faufaahia oe i te haapii i te Bibilia no te mau aratairaa au mau e vai ra i roto.” Teie ta te tahi pionie no Marite e poro ra i roto i te tuhaa fenua reo Tinito i parau: “E rave rahi taata o ta matou tuhaa fenua o te au roa i te taio. Ua taio ê na ïa ratou i te papai i pûpûhia hou matou a hoˈi mai ai. Tera râ aita paha ratou i ite eaha te haapiiraa Bibilia. I te farereiraa matamua, mea au na ˈu e horoa i te buka rairai Parau apî oaoa, o tei papaihia ia tupu te aparauraa.” Te na ô ra te tahi tiaau haaati e tavini ra i roto i te tuhaa haaati reo Tinito i Marite e e nehenehe e pûpû i te buka Bibilia haapii i te farereiraa matamua. Mea maitai aˈe râ ia haamata i te haapiiraa i te pene 2 no nia i te Bibilia, eiaha râ i te pene 1 no nia i te Atua.
5. No te aha mea faufaa ˈi ia faaoromai?
5 Eita te hoê taata e tiaturi oioi noa i te Atua. Mea faufaa roa ïa ia faaoromai. I te mau aparauraa matamua, eita paha oia e farii e te vai ra te hoê Atua Poiete. Peneiaˈe râ i muri iho e farii oia e te vai ra paha. E parau atoa mai paha oia e te taa ra ia ˈna no te aha vetahi e tiaturi ai e te vai ra te hoê Atua Poiete.
6. No te aha paha vetahi e ore ai e anaanatae i te Bibilia?
6 Te feia aita e anaanatae ra aore ra e tiaturi ra i te Bibilia: Te farii ra paha te hoê taata e te vai ra te Atua. E pinepine râ oia i te ore e anaanatae i ta te Bibilia e haapii ra. No te mea no ˈna e ere te Bibilia i te Parau a te Atua. Peneiaˈe te ora ra oia i te hoê fenua aita e Kerisetiano, e no ˈna na te Amuiraa faaroo Kerisetiano anaˈe te Bibilia. Te ora ra paha oia i te hoê fenua e te parau ra te taata e e Kerisetiano ratou, aita râ e tâuˈa ra i te mau ohipa faaroo. Te manaˈo atoa paha ra oia e eita oia e faufaahia i ta te Bibilia e haapii ra. E nafea ia tauturu i tera mau taata ia anaanatae i te Bibilia e ia farii i te tahi haapiiraa i nia i te buka Bibilia haapii?
7. E pinepine eaha te ravea maitai no te tauturu i te taata ia anaanatae i te Bibilia?
7 Ua papai te amaa no Heleni: “Te ravea maitai roa ˈˈe no te tauturu i te feia aita e anaanatae ra i te Bibilia, o te iriti-noa-raa ˈtu ïa i te Bibilia e te faaiteraa ˈtu i tei papaihia i roto. Mea rahi te taata poro tei ite e noa ˈtu eaha ta ratou e parau, mea puai aˈe te ohiparaa a te poroi o te Bibilia i nia i te aau o te taata. (Heb. 4:12) I to ratou iteraa i te iˈoa o te Atua i roto i te Bibilia, mea rahi tei hinaaro e haapii i te Bibilia.” Ua papai te amaa no Initia: “Mea au roa na te feia e haamori ra i te mau atua Initia i te parau mau no nia i te ora e te pohe. Oia atoa ïa te parau fafau Bibilia o te hoê ao aita e hiˈo-ino-raa i te pǔpǔ ê.” Ma te faahiti i te mau fifi o te fenua, e pinepine te feia poro i te faaite i ta te Bibilia e parau ra, oia hoi na te Basileia o te Atua e faaafaro i te reira.
8. Eaha te parau i te feia e manaˈo tano ore to ratou i te Bibilia no ta te Amuiraa faaroo Kerisetiano e rave nei?
8 E manaˈo tano ore paha to te hoê taata i te Bibilia no ta te Amuiraa faaroo Kerisetiano e rave nei. E faaite anaˈe ïa e ua faaino te Amuiraa faaroo Kerisetiano i te Bibilia e ta te reira e haapii ra. Teie ta te amaa no Initia i papai: “I te tahi taime, e titauhia ia faataa matou i te taata e e ere na te mau ekalesia anaˈe te Bibilia.” Ua parau te amaa e e pinepine te feia e haamori ra i te mau atua Initia i te maere i te tuhaa 4 o te buka rairai Eaha te tumu o te oraraa? Nafea outou e ite ai i te reira? Te faataa ra teie tuhaa e ua tamata te mau ekalesia i te taviri e te faaore i te Parau a te Atua. Teie ta te hoê pionie i Beresilia e parau i te taata: “No te aha e ore ai e hiˈo eaha ˈtu â to roto i te Bibilia? Mea rahi o te na reira nei ma te feruriraa farii noa ˈtu e aita ta ratou e haapaoraa. E maere oe i ta oe e ite mai.”
9. No te aha eiaha ˈi e taora i te tauera ia ore vetahi e anaanatae i ta te Bibilia e haapii ra?
9 E hiˈo Iehova i te aau o te taata taitahi. (Sam. 1, 16:7; Mas. 21:2) E faatae mai oia ia ˈna ra i te feia aau farii i te haamoriraa mau. (Ioa. 6:44) Mea rahi o ratou aita i ite aˈenei o vai te Atua aore ra aita i ite maitai i te Bibilia. Maoti ta tatou taviniraa e nehenehe ai ratou e ‘ora e e ite i te parau mau.’ (Tim. 1, 2:4) No reira, ia ore vetahi e anaanatae i ta te Bibilia e haapii ra, eiaha e taora i te tauera! A faaohipa hoê o te mau ravea e vai ra na roto i to oe reo ia anaanatae mai ratou. I muri iho, e nehenehe e faahaere i te aparauraa i nia i te buka Eaha ta te Bibilia e haapii mau ra? ta tatou e faaohipa nei no te faatere i te mau haapiiraa Bibilia.
[Tumu parau tarenihia i te api 4]
Ia na ô mai te hoê taata e aita oia e tiaturi ra i te Atua, a tamata i teie:
• No te ite eaha te tumu, a ui: “Ua manaˈo noa anei oe mai tera?”
• Te pee ra oia ia Bouddha, a faaohipa ïa i te buka rairai La paix et le bonheur durables: comment les trouver, api 9-12.
• Te tiaturi ra oia e e tauiui noa te mau mea ora, a faaohipa i:
Te tumu parau “Mea poietehia anei?” o te A ara mai na!
Te DVD Les merveilles de la création révèlent la gloire de Dieu
Na buka rairai Une vie pleinement satisfaisante: comment? tuhaa 4; La vie a-t-elle été créée? e Cinq questions à se poser sur l’origine de la vie
• Ua faaea oia i te tiaturi i te Atua no te mau ohipa tano ore e te mauiui, a faaohipa i:
Te buka Y a-t-il un Créateur qui se soucie de vous? pene 10
Na buka rairai Te haapao mau ra anei te Atua ia tatou? tuhaa 6 e Eaha te tumu o te oraraa? tuhaa 6
• Ia farii te taata e te vai ra paha te Atua, a rave i te buka Bibilia haapii. Mea maitai ia haamata i te pene 2 aore ra te tahi atu tumu parau e tano.
[Tumu parau tarenihia i te api 5]
Ia ore te taata e tiaturi i te Bibilia:
• A hiˈopoa i na pene 17 e 18 o te buka La vie: comment est-elle apparue? Évolution ou création?
• No te feia e haamori ra i te mau atua Initia, a faaohipa i te buka rairai Pourquoi adorer Dieu en amour et en vérité?
• No te mau ati Iuda, a faaohipa i te buka rairai Connaîtrons-nous un jour un monde sans guerre?, api 3-11.
• A faataa i te mau maitai ia pee i te mau aratairaa Bibilia. Ia ite te taata i te faufaaraa o te Bibilia, teie te tahi mau ravea:
Te tumu parau “Tauturu no te utuafare” o te A ara mai na!
Te DVD La Bible, une force dans votre vie
Na buka rairai Parau apî oaoa a te Atua, haapiiraa 9 e 11; Un livre pour tous, api 22-26; Une vie pleinement satisfaisante: comment? tuhaa 2
No te feia e pee ra ia Bouddha, a faaohipa i te buka rairai La voie qui mène à la paix et au bonheur, api 3-7.
No te mau Mahometa, a faaohipa i te buka rairai La vraie foi: le chemin qui mène au bonheur, tuhaa 3.
Ia poro outou i te feia e manaˈo tano ore to ratou i te Bibilia, a tiai rii i te faaite atu nohea mai ta oe mau parau paari. Mea maitai aˈe i muri iho tau aparauraa.
• A faataa i te mau parau tohu Bibilia tei tupu maoti:
Te DVD La Bible. Un récit historique exact, des prophéties dignes de foi
Te buka rairai Un livre pour tous, api 27-29
• Ia ui mai te taata eaha ta te Bibilia e haapii ra i nia e rave rau tumu parau, a rave i te buka Bibilia haapii.
[Tumu parau tarenihia i te api 6]
Ia na ô mai te taata: “Aita vau e tiaturi ra i te Atua,” a pahono atu:
• “E nehenehe anei au e faataa poto noa ˈtu no te aha vau nei e tiaturi ai i te hoê Atua Poiete?” A faaite atu i te tahi mau manaˈo o te buka Haaferuriraa api 316-318, aore ra a rave i te mau faanahoraa no te afai mai i te hoê papai ua au oe i te taioraa.
• “Ahani e te vai ra te hoê Atua, teihea huru Atua e au oe?” Te hoê ïa Atua î i te here, parau-tia, aroha e te paetahi ore. Ta te rahiraa ïa e pahono mai. A faaite atu i roto i te Bibilia e mai tera te Atua. (E nehenehe atoa e hiˈo i te pene 1 o te buka Bibilia haapii, mai te paratarafa 6 atu.)
Ia na ô mai te taata: “Aita vau e tiaturi ra i te Bibilia,” a pahono atu:
• “Mea rahi te taata mai ia oe. No vetahi, mea tano ore te Bibilia i te pae aivanaa aore ra te mau aratairaa i roto. Ua taio ê na anei oe i te Bibilia? [A vaiiho ia ˈna ia pahono, a faaite atu i te omuaraa o te buka rairai Un livre pour tous, api 3 e a pûpû atu i te reira.] Mea rahi aita e tiaturi ra i te Bibilia no te mea ua faaino te haapaoraa i te mau haapiiraa i roto. E hinaaro vau e faaite atu i te hoê hiˈoraa i na api 4 e 5 i te tahi atu taime.”
• “Mea rahi te manaˈo atoa ra mai ia oe. E hinaaro vau e faaite atu i te tahi mea no nia i te Bibilia ua maere au. [A taio i te Ioba 26:7 aore ra Isaia 40:22 o te faataa ra e mea tano te Bibilia i te pae aivanaa.] E parau paari atoa to roto i te Bibilia o te tauturu i te mau utuafare. E hinaaro vau e faaite atu i te hoê hiˈoraa i te tahi atu taime.”
• “Mauruuru no to oe manaˈo. Mai te peu e ua papai iho â te Atua i te hoê buka no te huitaata, i to oe manaˈo eaha to roto?” A faaite atu i te tahi mea i roto i te Bibilia e tuati i ta ˈna pahonoraa.