O vai te rave nei i to Iehova hinaaro i teie mahana?
1. Afea tatou e hiˈopoa ˈi i te buka rairai O vai te rave nei i to Iehova hinaaro i teie mahana? e e nafea tatou e faufaahia ˈi?
1 Mai te hebedoma o te 28 no Atopa ˈtu, o te buka rairai O vai te rave nei i to Iehova hinaaro i teie mahana? te hiˈopoahia i te Haapiiraa Bibilia a te amuiraa. Ua matara mai tera papai apî i te tairururaa mataeinaa “A tiai i to aau!” no te aratai i te piahi i ta Iehova faanahonahoraa. Ia hiˈopoahia te reira, e rahi atu â te mauruuru ei melo o tera faanahonahoraa a ite roa ˈtu ai tatou i te faaohipa i teie mauhaa faufaa no te taviniraa.—Sal. 48:13.
2. E nafea te buka rairai e hiˈopoahia ˈi i roto i te amuiraa?
2 E nafea ia hiˈopoa i te reira? Ia haapao maitai te taeae faatere e nafea oia e opere maite ai i te taime no te hiˈopoa i te haapiiraa taitahi. No na 28 haapiiraa, e haamata oia ma te taio i te uiraa i nia roa, te reira hoi te upoo parau. I muri iho, e ani oia i te tahi atu taeae ia taio i te omuaraa parau. I muri aˈe, e horoa oia i te uiraa ta ˈna i faaineine no tera tuhaa. Ia oti, e taiohia tei papai-meumeu-hia e te mau paratarafa i raro noa ˈtu a tauaparau ˈtu ai. E ani te taeae faatere ia faataa e nafea tera mau reira e pahono ai i te upoo parau, te uiraa ïa i nia roa. E rave rahi hohoˈa te nehenehe e faataa. Ia taimehia, e mea tia ia taio i te mau irava faufaa. Hou a hiˈopoa ˈi i to muri atu haapiiraa, e faahiti te taeae faatere i te uiraa i raro i te api ei haamanaˈoraa. Te vai ra anaˈe te tumu parau tarenihia “Hau atu â,” e taiohia te reira a ani atu ai e nafea te tahi piahi Bibilia e faufaahia ˈi i te haapao i tera manaˈo tauturu. Ia taimehia, ia hope te haapiiraa, e faaohipa paha te taeae faatere i te uiraa o te mau upoo parau ei haamanaˈoraa. A haapao maite e eita e titauhia ia pee i teie tereraa no te haapiiraa a te tahi piahi.
3. E nafea tatou e faufaahia ˈi i te haapiiraa i teie buka rairai?
3 Ia faufaa-mau-hia tatou i te reira, hou a haere ai i te putuputuraa, a faaineine maitai ia tatou. E tutava anaˈe i te horoa i te mau pahonoraa. I te roaraa o te haapiiraa, a feruri e nafea te mau piahi e faufaahia ˈi i te hiˈopoahia ra. Ma te haafaufaa i teie buka rairai apî e nehenehe ai tatou e tauturu ia vetahi ê ia rave i te hinaaro o Iehova a tia ˈtu ai ratou no te ora e a muri noa ˈtu.—Ioa. 1, 2:17.