A tiai i to manaˈo
1. Eaha te manaˈo tumu o te tairururaa haaati no te matahiti taviniraa 2013 e e tauturuhia tatou ia aha?
1 Ua faaue Iesu i ta ˈna mau pǐpǐ ia here ia Iehova ma to ratou aau e manaˈo atoa. (Mat. 22:37, 38) E tauturu mai te mau tairururaa mataeinaa e haaati o teie matahiti ia haamaitai i to tatou huru taata taatoa. Ei haamanaˈoraa, “A tiai i to aau!” te manaˈo tumu o te tairururaa mataeinaa, “A tiai i to manaˈo haava” to te mahana tairururaa taa ê no te matahiti taviniraa 2013. E no te mau tairururaa haaati o te haamata i te avaˈe i mua nei, “A tiai i to manaˈo” te manaˈo tumu niuhia i nia i te Mataio 22:37. Ua faaineinehia teie porotarama no te tauturu ia tatou taitahi ia hiˈopoa i to tatou mau manaˈo ia au roa mai Iehova.
2. Ia imi tatou i te mau pahonoraa o teihea mau uiraa i te roaraa o te porotarama?
2 Eaha te vauvauhia? A faaroo noa ˈi tatou i te tairururaa haaati, e imi anaˈe i te mau pahonoraa o teie mau uiraa, e manaˈo faufaa hoi:
• E nafea e ore ai e pee i te ‘manaˈo taata’?
• E nafea ia iriti i te paruru e haapouri ra i te feruriraa o te feia aau faaroo ore?
• Ia pee tatou i to vai manaˈo?
• Eaha te maitai ia feruriruri ma te tano?
• E nafea ia vaiiho ia Iehova ia aratai i to tatou manaˈo?
• Ia aha te mau tane e vahine faaipoipo, metua e tamarii e oaoa ˈi te utuafare?
• E nafea ia ineine no to Iehova mahana?
• Eaha te auraa ia itoito to tatou manaˈo no te taviniraa?
• Eaha te mau haamaitairaa a te feia e faaohipa ra i ta ratou e haapii ra?
3. No te aha mea faufaa ˈi ia tae i na mahana tairururaa haaati e piti, ia faaroo maitai, e ia faaohipa i ta tatou e haapii?
3 Te tutava nei Satani i te haaviivii i to tatou feruriraa. (Kor. 2, 11:3) E paruru anaˈe ïa i to tatou mau manaˈo e e tutava anaˈe i te tiai i to tatou feruriraa ia au roa mai Iehova. E faaite noa anaˈe i te manaˈo o te Mesia e e patoi anaˈe i te mau manaˈo tia ore o teie ao ino. (Kor. 1, 2:16) Ia tae atu iho â ïa tatou i na mahana tairururaa haaati e piti e ia faaroo maitai atoa tatou. E itoito atu â to tatou manaˈo no te taviniraa ia Iehova ia faaohipa tatou i te haapiiraa faufaa e horoahia mai.—Pet. 1, 1:13.