“E riro oe ei pionie maitai!”

1. Eaha te manaˈo o te hoê tuahine i ta ˈna taviniraa pionie?

¹ “Aita ˈtu ohipa ta ˈu i ite o tei hopoi mai i te mauruuru rahi aore ra tei riro ei mea faahiahia aˈe i te pae varua,” ta Kathe Palm ïa i parau. Ma te aau tae, ua poro oia tau ahuru matahiti ei pionie mai te tahi pae o Tireni, i Marite Apatoa, i te tahi atu pae. Ma te manaˈo i te oraraa faahiahia o te mau taeae e tuahine i roto i te taviniraa taime taatoa, ua parau mai paha vetahi ia outou: “E riro oe ei pionie maitai!”

2. A faataa no te aha e noaa mai ai te oaoa rahi i te mau ohipa pae varua.

² Te hoê huru oraraa mauruuru: Ua itea ia Iesu, to tatou Hiˈoraa, te faaitoitoraa mau ma te rave i te hinaaro o to ˈna Metua. (Ioa. 4:34) No reira Iesu i haapii ai i ta ˈna mau pǐpǐ e e mauruuru mau ratou ia apiti roa ˈtu ratou i te mau ohipa taaihia i te haamoriraa ia Iehova. E oaoa tatou ua î anaˈe to tatou oraraa i te mau ohipa e auhia e Iehova. Ia horoa ˈtu â tatou i to tatou taime, itoito, e ta tatou mau faufaa no te tauturu ia vetahi ê, hau atu â ïa tatou i te oaoa.—Ohi. 20:31, 35.

3. Eaha te oaoa e itehia ia poro rahi atu â?

³ Hau atu â tatou i te oaoa i te haamata e te faatere i te mau haapiiraa Bibilia ia poro rahi atu â tatou. E mea tâuˈa ore paha te taata e rave rahi o te hoê tuhaa fenua. A aravihi ai râ tatou i roto i te taviniraa e au atura e mea manuïa aˈe te pororaa i ta tatou i manaˈo na. E nehenehe te mau pionie e faaohipa i ta ratou i haapii i te Haapiiraa no te taviniraa pionie, te fanaˈohia i muri aˈe hoê matahiti taviniraa. (Tim. 2, 2:15) Ia tamau tatou, e aravihi aˈe ïa tatou i te tanu i te mau huero o te parau mau o te hotu mai.—Koh. 11:6.

4. Ia feruri te feia apî fatata i te faatuitehia i te aha?

⁴ Feia apî: Te oti ra ta outou tau haapiiraa? Ua feruri maite anei outou i to outou ananahi? Tae roa mai i teie nei, te rahiraa o to outou taime, no te mau ohipa haapiiraa ïa. Na te aha e mono i tera taime ua oti anaˈe ta outou tau haapiiraa? E tapi anei outou i te hoê toroa i roto i teie nei ao? No te aha e ore ai e feruri i roto i te pure e riro ei pionie tamau? E faufaahia outou i roto i to outou oraraa taatoa i te mau aravihi te noaa ia outou: te pororaa i te taata taˈere ê, te faarururaa i to outou iho mau haafifiraa, te tutavaraa i te haavî ia outou iho, e te haamaitairaa i to outou ite i te haapii atu.

5. E nafea te mau metua e te amuiraa e faaitoito ai i te taviniraa pionie?

⁵ E te mau metua, te faaitoito ra anei outou i ta outou mau tamarii ia rave i te taviniraa taime taatoa? E tauturu mau ta outou mau parau e to outou hiˈoraa maitai ia ratou ia tuu i te mau faufaa o te Basileia i te parahiraa matamua. (Mat. 6:33) Te haamanaˈo ra Ray, tei riro ei pionie i te otiraa ta ˈna haapiiraa tuarua: “No to ˈu mama, o te taviniraa pionie te huru oraraa mauruuru roa ˈˈe.” E nehenehe te amuiraa taatoa e faaitoito i te taviniraa pionie ma ta ratou mau parau e turu. Te parau ra Jose no Paniora: “No ta ˈu amuiraa, o te taviniraa pionie te toroa maitai roa ˈˈe no te feia apî. Maoti ta ratou mau parau e manaˈo maitai no te taviniraa pionie e ta ratou turu i ohie aˈe ai no ˈu ia rave i te taviniraa taime taatoa.”

6. Eaha te rave aita anaˈe tera hinaaro e riro ei pionie?

⁶ Faarururaa i te mau haafifiraa: Te parau ra paha outou e, ‘Aita ta ˈu tera hinaaro e riro ei pionie.’ Mai te peu e tera na mua to outou manaˈo, a pure ia Iehova no nia i to outou huru aau e a parau ia ˈna, ‘Aita vau i ite e no ˈu anei tera taviniraa, te hinaaro nei râ vau e rave i tei au ia oe.’ (Sal. 62:8; Mas. 23:26) E a imi i ta ˈna aratairaa i roto i ta ˈna Parau e ta ˈna faanahonahoraa. Ua “tamata” na mua e rave rahi pionie tamau i tera taviniraa ei pionie tauturu. E no te oaoa ta ratou i fanaˈo i tamau ai ratou i roto i te taviniraa taime taatoa.—Sal. 34:8.

7. E nafea aita anaˈe i papu ia tatou e e naea anei ia tatou na hora e 70 tei titauhia?

⁷ Aita paha outou e papu e e naea anei ia outou na hora e 70 tei titauhia, e nafea ïa? No te aha e ore ai e paraparau atu i te mau pionie hoê â tupuraa to ratou e to outou? (Mas. 15:22) E i nia i te hoê papie, a tuu atu i te tahi mau porotarama ta outou e nehenehe e pee. E ite paha outou e e mea ohie ia rave i te taime na mua ˈˈe no te mau ohipa e ere i te mea faufaa roa no te taviniraa.—Eph. 5:15, 16.

8. No te aha e hiˈopoa tamau ai i to tatou oraraa?

⁸ A hiˈopoa faahou i to outou oraraa: Pinepine to tatou tupuraa i te taui. E mea maitai ïa ia hiˈopoa tamau i to outou oraraa. Ei hiˈoraa, ua fatata anei ta outou faatuhaaraa? Te na ô ra Randy tei faatuhaa-oioi-hia: “Maoti teie faaotiraa i haamata ˈi au i te taviniraa pionie tamau e ta ˈu vahine, ua nehenehe ïa mâua e haere e tavini i te vahi e hinaaro-rahi-hia te tauturu. Ua haamaitai-rahi-hia vau no ta ˈu faaotiraa, te haamaitairaa rahi roa ˈˈe râ, o te hoê ïa manaˈo haava maitai.”

9. Ia feruri te feia faaipoipo i te aha?

⁹ I muri aˈe i te feruri-maitai-raa, ua faaoti vetahi feia faaipoipo e e nehenehe hoê e faaea i ta ˈna ohipa. E titauhia iho â ia faaohie te utuafare i to ratou oraraa, e mea hoona râ. Te faaite ra John, no faarue noa ˈtura ta ˈna vahine i ta ˈna ohipa no te faaaano i ta ˈna taviniraa: “Aita e huru aau maitai aˈe i te ite e te haa ra ta ˈu vahine i roto i te taviniraa a Iehova i te mahana taatoa.”

10. Na te aha e turai i te mau Kerisetiano ia feruri i te taviniraa pionie?

¹⁰ Te faaiteraa o te here e te faaroo: No Iehova, o te pororaa te ohipa faufaa roa ˈˈe te tia ia tatou paatoa ia rave. Fatata teie ao i te haamouhia, o te feia anaˈe te tiaoro i te iˈoa o Iehova te ora ˈtu. (Roma 10:13) No to tatou here hohonu ia ˈna e to tatou mauruuru rahi no ta ˈna i rave no tatou e auraro ai tatou i te faaueraa a ta ˈna Tamaiti e poro ma te itoito rahi. (Mat. 28:19, 20; Ioa. 1, 5:3) Oia atoa, ia tiaturi tatou e te ora nei iho â tatou i te mau mahana hopea, e haa rahi ïa tatou i roto i te taviniraa, eita râ e rave hope i teie nei ao.—Kor. 1, 7:29-31.

11. E nafea tatou e hiˈo ai i tera taviniraa ia parau mai te tahi e e riro tatou ei pionie maitai?

¹¹ E ere te taviniraa pionie tamau i te poro-noa-raa e rave rahi hora, e faaiteraa râ o to tatou ati-maite-raa i te Atua. Ia parau mai te tahi e “E riro oe ei pionie maitai!,” e faaitoitoraa te reira. A feruri ïa e a pure no nia i te neheneheraa outou e apiti i te mau taeae e tuahine tei rave i teie taviniraa mauruuru.

[Parau iti faaôhia i te api 4]

E te mau metua, te faaitoito ra anei outou i ta outou mau tamarii ia rave i te taviniraa taime taatoa?

[Parau iti faaôhia i te api 5]

No Iehova, o te pororaa te ohipa faufaa roa ˈˈe te tia ia tatou paatoa ia rave.