E tia anei ia oe ia tavini hau atu â?
1. Eaha te hinaaro-ru-hia ra i roto i te taviniraa, e no te aha?
1 A ite ai Iesu i te anaanatae o te taata e rave rahi i te parau apî maitai o te Basileia, ua faaue oia i ta ˈna mau pǐpǐ ia “pure . . . i te Fatu o te ohipa ia tono â oia i te rave ohipa ei ooti.” (Mat. 9:37, 38) I te mea e tei te mau taime hopea tatou o te tau ootiraa, e mea ru roa ˈtu â ïa ta tatou ohipa. Ia feruri ïa tatou i roto i te pure e nafea tatou e apiti maite atu â ˈi i te taviniraa e tia ˈi.—Ioa. 14:13, 14.
2. Mea nafea vetahi i te pahonoraa i te aniraa ia rahi atu te rave ohipa?
2 E tavini hau atu â: Ma te aratairaa e te tauturu a Iehova, ua nehenehe e rave rahi e riro mai ei pionie. (Sal. 26:2, 3; Phil. 4:6) Ua tutava taa ê vetahi i te tavini ei pionie tauturu hoê avaˈe aore ra hau atu i te matahiti hoê. Ua riro te reira ei ravea maitai no te tavini hau atu â. No te oaoa ta ratou i fanaˈo ei pionie tauturu, ua feruri vetahi o ratou e riro mai ei pionie tamau.—Ohi. 20:35.
3. E feruri maite oe i te aha i teie nei, mai te peu e i pionie na oe?
3 E tia anei ia oe ia rave faahou i te taviniraa pionie?: I pionie na oe? Mea papu e te haamanaˈo maitai ra oe i tera ra tau. Ua feruri anei oe i roto i te pure i te neheneheraa e riro faahou mai ei pionie? Aita paha te mau tupuraa i faaea ˈi oe i ta oe taviniraa e haafifi faahou ra ia oe. Ua tae paha te taime e nehenehe ai oe e oaoa â i tera fanaˈoraa taa ê.—Ioa. 1, 5:14, 15.
4. Eaha te ohipa taa ê i pûpûhia ia tatou paatoa?
4 Te ooti nei tatou, fatata râ tera ohipa i te hope. (Ioa. 4:35, 36) Ia hiˈopoa ïa tatou paatoa i to tatou huru tupuraa. E nehenehe anei tatou e faatano i ta tatou mau ohipa o te mau mahana atoa no te apiti maite atu â i te taviniraa? Mai te peu e eita iho â e nehenehe, e imi anaˈe ïa i te tahi atu ravea. (Mar. 12:41-44) E fanaˈoraa taa ê mau â teie no te feia e nehenehe, ia apiti atu i te taviniraa pionie!—Sal. 110:3.