Opereraa taa ê o te titau-manihini-raa no te Oroa haamanaˈoraa!

1. E apiti te mau taata poro i te Basileia i te aha na te ao atoa nei mai te 21 no Mati 2009 atu, e no te aha?

¹ I te Mahana maha 9 no Eperera 2009 na te ao atoa nei, e putuputu tatou, te mau taata haamori i te Atua ra o Iehova, no te haamanaˈo i te ohipa aroha rahi roa ˈˈe ta ˈna i rave no te taata. (Roma 5:6-8) Ia apiti mai e mirioni taata ia haamanaˈo tatou i te pohe o Iesu, e operehia te hoê titau-manihini-raa taa ê no te Oroa haamanaˈoraa na te ao nei mai te 21 no Mati atu.

2. Ia haamanaˈo oe i te aha ia horoa oe i te titau-manihini-raa i te taata?

² Ta tatou e haamanaˈo: A faaohipa hope i te mau hohoˈa, te mau uiraa, e te irava faahitihia i nia i te titau-manihini-raa. Ei hiˈoraa, e nehenehe oe e faaite i te titau-manihini-raa a parau atu ai: “Ua hinaaro vau e titau manihini ia oe ia haamanaˈo i te pohe o Iesu e o matou, i te Mahana maha 9 no Eperera 2009.” I reira, a faahiti i te upoo parau o te titau-manihini-raa e to muri iho mau uiraa. A haapapu i te fatu fare e e nehenehe atoa oia e titau manihini i to ˈna utuafare e i te mau taata atoa ta ˈna e hinaaro ia haere mai.

3. E nafea ia haapapu i te hoê titau-manihini-raa i ravehia i te omuaraa o te opereraa?

³ Mai te peu e e tuhaa fenua rahi ta ta oe amuiraa, e parau atu paha te mau matahiapo ia oe ia vaiiho i te mau titau-manihini-raa i te mau fare aita e taata. I te hopea hebedoma, a pûpû atu i te titau-manihini-raa e te mau vea. A haamau ei fa e titau manihini i te feia ta oe e farerei faahou, ta oe mau piahi Bibilia, to oe fetii, to oe mau hoa haapiiraa, hoa ohipa, te feia tapiri, e vetahi atu feia ta oe i matau. I te matahiti i mahemo, ua titau manihini hoê tuahine e 30 fetii o ta ˈna i haamanaˈo tamau i te faufaaraa o tera oroa. Auê ïa oia i te oaoa i to e 25 fetii haereraa ˈtu i te oroa, e a farii ai e 4 o ratou i te hoê haapiiraa bibilia i muri iho!

4. Teihea faanahoraa e mea tia ia rave tatou i teie nei, e no te aha?

⁴ A faanaho i teie nei: E nehenehe e rave rahi taata poro e poro rahi atu â i Mati e Eperera. Mai te peu e e tamarii aore ra e piahi Bibilia ta oe e haere maitai ra i mua, e taime maitai roa paha te reira no ratou no te riro mai ei taata poro bapetizo-ore-hia. Teie te taime no te haamata i te faanaho i te apiti hope i teie opereraa taa ê o te faaite ra i te haamanaˈoraa i na ohipa aroha rahi roa ˈˈe e piti.—Ioa. 3:16; 15:13.