‘A faaite hua ˈtu’—ma te poro i roto i te mau fare tahua
1. E nafea ia “faaite hua ˈtu i te evanelia”?
1 Mai te aposetolo Paulo, te hinaaro ra tatou e “faaite hua ˈtu i te evanelia.” (Ohi. 20:24) No reira tatou e faaitoito ai i te faaite i te poroi o te Basileia i te taata e rave rahi o ta tatou tuhaa fenua, oia atoa i te taata e rave rahi roa e noho ra i roto i te mau fare tahua. I te tahi taime, e mea fifi ia farerei ia ratou. I te mea e mea rahi te taata i roto i te mau fare tahua, mea rahi ïa ta tatou ravea no te haaparare i te evanelia.
2. No te aha e titauhia ˈi ia ara maite e ia haroaroa maitai ia poro tatou i roto i te mau fare tahua?
2 No te haamǎtaˈuraa a te ohipa ino e te haavîraa uˈana, te rahi noa ˈtura te fare tahua ua opanihia te tomoraa e te vai ra te mau tiai aore ra te mau taviri hohoˈa hiˈopoaraa. (Tim. 2, 3:1, 2) E haamau paha te taata faatere i te hoê faatureraa o te opani i te feia aita i titau-manihini-hia ia tomo mai. E parau mai paha te hoê taata faatere ia tatou ia haere, ia autâ iho â râ te hoê taata e noho ra i reira. No reira, e mea faufaa ia ara maite e ia haroaroaraa maitai.
3. Eaha te taime maitai aˈe no te poro i roto i te mau fare tahua, e no te aha?
3 Afea e poro ai: Mai no te tahi atu â mau huru tuhaa fenua, e mea maitai aˈe ia poro i roto i te mau fare tahua to reira te feia tarahu piha. E nehenehe tatou e manaˈo-ino-hia mai te peu e to reira tatou e aita te rahiraa i reira. Mea rahi te taata poro tei manuïa i te farerei i te taata i ǒ ratou i te ahiahi e i te avatea Mahana maa. E nehenehe te taata e autâ i nia i te taata faatere ia poro tatou i te aahiata roa, i te hopea hebedoma iho â râ.
4, 5. E nafea ia tomo i roto i te mau fare tahua ua opanihia te tomoraa?
4 No te tomo atu: Eiaha te feia poro e farerei i te tiai aore ra te tahi atu rave ohipa o te fare tahua hou a poro ai. Mai te peu e e interphone to rapaeau mai i te fare tahua ua opanihia te tomoraa, e nehenehe tatou e faaohipa ˈtu no te ite i te hoê taata o te farii ia tomo atu tatou no te paraparau ia ˈna. Ia au i te huru fare tahua, e nehenehe paha tatou e patoto i te tahi atu mau piha i muri aˈe i te paraparauraa i te taata o tei faatomo mai ia tatou. I roto râ i te tahi atu mau tupuraa, e haerea paari ia hoˈi i te interphone no te farerei i te tahi atu taata. E mea tia ia haroaroa maitai tatou no te faaoti ehia rahiraa taata tarahu piha ta tatou e niuniu i te hoê â taime.
5 Mea au aˈe na vetahi ia faaite atu oe i to oe tere na roto i te interphone. A faaite atu ïa o vai oe ma te auhoa. A faaohipa i te iˈoa o te taata mai te peu e te vai ra i nia i te tapura iˈoa o te feia noho. A faahiti maitai i ta oe tumu parau. Ua tia ia vetahi ia taio i te hoê omuaraa parau i roto roa i te buka Haaferuriraa.
6. Eaha ta tatou e rave ia poro tatou i roto i te hoê fare tahua te vai ra te tiai uputa?
6 Mai te peu e eita te tiai uputa e faatia ia tatou ia farerei i te feia i reira, e nehenehe tatou e tutava i te poro ia ˈna. Mea au na te tiai uputa e rave rahi e taio i ta tatou mau papai. E nehenehe atoa paha tatou e haamata i te hoê haapiiraa bibilia i te vahi tomoraa. Ia faatia te tiai uputa ia tatou ia farerei i te hoê taata tarahu piha taa maitai o tei faaite i te anaanatae, e mea maitai aˈe eiaha e patoto i te tahi atu mau uputa.
7. Eaha ta tatou e haamanaˈo no nia i ta tatou pute pororaa?
7 Faaneheneheraa e peu maitai: E hiˈohia tatou ia rave tatou i te mau pute rarahi e te aano. No reira, e rave paha tatou i te hoê pute nainai aˈe aore ra eita roa ˈtu. E tuu te tahi feia poro i te mau papai ta ratou e faaite i roto i te hoê vairaa rairai e ta ratou Bibilia i roto i to ratou rima aore ra to ratou pute ahu.
8. E nafea ia faanaho i te pǔpǔ no te poro i roto i te mau fare tahua?
8 E mea maitai aˈe eiaha te mau pǔpǔ rahi e ruru i te vahi tomoraa aore ra i te vahi tapearaa pereoo iho â râ, a hiˈo mai hoi te taata. E mea tia ia haapao maitai ia poro tatou i roto i te mau fare tahua i te mau vahi mea rahi te ohipa ino. (Mas. 22:3) Ei hiˈoraa, e maha aore ra e ono taata poro te nehenehe e rave i te hoê â tahua ma te ore e faaatea roa te tahi i te tahi. Peneiaˈe e piti te patoto a tiai ai te toea, e te reira te tahi i muri aˈe i te tahi.
9. E nafea ia faaite i te peu maitai, e no te aha e mea faufaa ˈi?
9 Ia tomo oe i roto i te hoê fare tahua, a horoi i to oe tiaa e a tapiri maitai i te opani. Ma te faaite i taua peu maitai ra, e faaiti mai oe i te mau tumu e autâ ˈi te feia tarahu piha. I roto, a haere tia ˈtu i te piha utaraa taata aore ra i te tahua o te porohia, eiaha râ e faataere i te vahi tomoraa. Eita ïa te feia na reira e hiˈo maere ia oe.
10. E nafea ia ape i te maniania faufaa ore i te mau vahi haereraa taata?
10 I roto e rave rahi fare tahua, e faaroohia te maniania i roto i te mau vahi haereraa taata. No reira, ia faaroo maitai te taata tarahu piha ia oe, aita e faufaa ia paraparau puai roa. Ia paraparau oe e te tahi atu feia poro, ia mǎrû to outou reo, ma te toparaa reo hau e te au noa râ ia ore te taata e hiˈo maere ia outou. No te ore e haapeapea roa ino i te feia tarahu piha, e haamata te tahi feia poro na te hoê hopea o te vahi haereraa taata, i muri iho e haere ratou i te tahi atu hopea, e ia oti roa te tahua, eita râ ratou e patoto i tera i tera uputa. Hau atu â, e nehenehe te patoto-puai-raa aore ra te tupaipairaa i te opani e faariaria i te feia i roto mai.
11. Eaha te tahi mau manaˈo o te tauturu mai ia patoto tatou i te hoê opani e apoo to nia iho?
11 Mai te peu e e apoo to te opani, a tia i mua ia ite te taata i roto mai ia oe e i to oe hoa pororaa. A hiˈo roa ˈtu i te apoo, e ia ite oe e te hiˈo maira te tahi taata, a aroha ˈtu e a haamata i ta oe faaiteraa. Ia ui te taata, ‘O vai tera?’ e mea maitai aˈe ia faaite i to oe iˈoa e to te taata poro e apee ra ia oe. Eita paha ïa taua taata ra e taiâ i te iriti i te opani. Aita anaˈe ra, e nehenehe oe e tamau i ta oe faaiteraa.
12. E nafea tatou e ape ai i te mau fifi ia vaiiho tatou i te mau papai i te mau piha aita e taata?
12 Aita anaˈe e taata: E autâ pinepine te tahi mau tiai i te mea e e ohi ratou i te mau papie i te vahi haereraa taata aore ra e ati aˈe te fare tahua. E nehenehe te mau papai tei vaiihohia i te opani e topa ohie, a riro atu ai ei pehu. No reira i te mau piha aita e taata, a tuu atu i te tahi papai i te hoê vahi eita e itehia e te mau taata e haere na reira.
13. Eaha ta tatou e rave ia riri mai te taata?
13 Feia e riri mai: Ia farerei tatou i te hoê taata o te riri mai e o te hinaaro e pii i te tiai, e mea maitai aˈe ia faarue i taua tahua ra e ia hoˈi atu i te tahi atu taime. I roto i te tahi atu mau tupuraa, e haerea paari ia faarue roa i te fare tahua no te ape i te faaû i te tiai. Noa ˈtu e aita tera taata i parau roa mai eiaha e hoˈi faahou atu, e mea maitai aˈe ia tapao i nia i te tapura tuhaa fenua i te numera o to ˈna piha ma te na ô e aita o ˈna e hinaaro ra ia farerei-faahou-hia o ˈna. E mea maitai ia farerei tamau ia ratou, e te tahi atu mau taata i tapaohia, no te ite i to ratou mau hinaaro.
14, 15. Eaha ta tatou e rave ia parau mai te hoê taata haapao i te fare tahua ia haere?
14 Ia parauhia ia oe ia haere: Ia parau te tiai, te feia haapao i te panoonoo ore, te feia haapao i te atuaturaa, aore ra te tahi atu taata haapao i te fare tahua ia oe ia faarue i te fare tahua a poro ai oe, e haerea paari ia haere i reira iho. Ia nehenehe, e hinaaro tatou e ape i te faaû atu, aˈunei hoi tatou e haamǎtaˈuhia ˈi i te tahi hororaa e i te mutoi. I te rahiraa o te taime, e ere te mau rave ohipa o te fare tahua i te mea patoi i te mau Ite no Iehova, te rave noa ra râ ratou i ta ratou ohipa.
15 I te tahi taime, ia parau te hoê taata haapao i te fare tahua ia oe ia haere, e nehenehe oe e faataa ma te hamani maitai e te faatano i te parau i te tumu o to oe tere. (Pet. 1, 3:15) E farii tatou i ta ˈna hopoia e haapao i te hinaaro o te feia e noho ra i reira e te panoonoo ore o te fare tahua. Peneiaˈe e faatia o ˈna ia oe ia faaea mai. Ia ore râ, a haere ïa ma te auhoa. Ia au i te mau tupuraa, e nehenehe oe e ani i te parau faatia no te vaiiho tamau i te mau papai i te vahi tomoraa aore ra i te vahi puˈaraa ahu. (Kol. 4:6) E mea maitai ia faaite i teie mau tupuraa i te tiaau no te taviniraa.
16. Eaha ta tatou e rave ia tamau te mau fifi a tamata ˈi tatou i te poro i roto i te mau fare tahua?
16 Peneiaˈe i muri aˈe i te hoê tau au noa, e nehenehe te feia poro e tamata ma te hau i te poro i roto i te fare tahua. Ia tamau râ te mau fifi, e ani te mau matahiapo i te mau aˈoraa i te amaa, eiaha râ e na te feia poro iho e tamata i te faaafaro i te reira. Mai te peu e eita ta te feia poro e nehenehe e haa i roto i te fare tahua, e nehenehe e tutava i te poro i te feia tarahu piha na roto i te tahi atu mau ravea, mai te niuniu paraparau aore ra te rata. E poro te tahi feia poro na te aroâ i mua aore ra na pihai iho i te fare tahua i te poipoi e i te ahiahi, e pinepine i te mau hora e haere ai te taata i te ohipa e e hoˈi ai i ǒ ratou.
17. No te aha e mea faufaa ˈi ia poro i roto i te mau fare tahua?
17 Ua fatata teie nei ao ino i te mou. O te feia noa o te tiaoro i te iˈoa o Iehova te ora. “Eaha ra te taata nei e tia ˈi ia tiaoro atu ia ˈna, i tei ore i faaroohia e ratou ra? e eaha hoi ratou e tia ˈi ia faaroo ia ˈna, i tei ore ratou i ite ia ˈna?” (Roma 10:13, 14) Mea rahi te taata “[aau farii e tano] no te ora mure ore” e noho ra i roto i te mau fare tahua. (Ohi. 13:48; MN) Ma te ara maite e te haroaroa maitai, e nehenehe tatou e faaite i te evanelia ia ratou.