E taoˈahia oe!
1. No te aha e tavini ai ei pionie tamau?
1 Te imi ra anei oe i te oaoa e te mauruuru rahi aˈe i roto i to oe oraraa? Te au ra e te mauruuru ra anei oe i te tautururaa ia vetahi ê? Te hinaaro ra anei oe e faarahi i ta oe taviniraa ia Iehova? Mai te peu e e pahono oe e i teie mau uiraa, e nehenehe ïa oe e tavini ei pionie tamau. Parau mau, e mea tia ia haapao i te hopoia utuafare e te tahi atu mau hopoia bibilia, oia atoa te ea e te mau taotiaraa i te pae tino.
2. A faahiti vetahi mau taoˈa pae varua ta te mau pionie tamau e fanaˈo.
2 Te faatuati ra ta Solomona mau papai i faaurua e te Atua i te mau haamaitairaa a Iehova e te mau taoˈa materia. (Mas. 10:22) I teie mahana, no roto mai na mua roa te mau taoˈa pae varua i te mau haamaitairaa a Iehova. E pue noa taua mau taoˈa ra no te mau pionie tamau. Ei hiˈoraa, te fanaˈo ra ratou i te oaoa rahi aˈe i te horoaraa na vetahi ê ma te ‘faaherehere i te taime’ i nia i ta ratou iho mau tapiraa. (Kol. 4:5; Ohi. 20:35) Te tapao ra e te haafaufaa ra Iehova i ta ratou mau ohipa o te here. Eita roa ˈtu te faufaaraa o te reira mau ‘taoˈa i nia i te raˈi’ e iti mai. (Mat. 6:20; Heb. 6:10) Hau atu â, i te mea e te tapea ra te mau pionie i ‘te mata maitai’ e te tiaturi ra ratou ia Iehova no te horoa mai i te mau mea hinaaro-mau-hia, te puai noa ˈtu ra to ratou taairaa e o ˈna.—Mat. 6:22, 25, 32; Heb. 13:5, 6.
3. Eaha te taa-ê-raa i rotopu i te titauraa i te mau taoˈa pae varua e te titauraa i te mau taoˈa materia?
3 E pinepine te titauraa i te mau taoˈa materia i te aratai atu i te “nounou maamaa e rave rahi, e ino ai te taata.” (Tim. 1, 6:9, 10; Iak. 5:1-3) E ere roa ˈtu ïa mai tera no te haamaitairaa a Iehova. E tauturu te horoaraa i te hoê tuhaa rahi o to ratou taime i roto i te taviniraa i te mau pionie tamau ia vai faito noa i te pae varua e ia mau maite noa to ratou feruriraa i nia i te mau mea i hau i te maitai. (Phil. 1:10) Ua faarue te hoê taeae i to ˈna toroa îite haapau taime no te riro ei pionie. Ua parau oia e: “E mea ahoaho ta ˈu ohipa. Te taviniraa pionie, e ere ïa. I teie nei, te tauturu ra vau i te taata e te haapii ra ia ratou i te parau mau. E mea oaoa e mea anaanatae aˈe te reira.”
4. E nafea te mau pionie tamau e haamaitaihia ˈi a hopoi ai ratou i te maitai na vetahi ê?
4 Haamaitairaa ia vetahi ê: I teie mahana, te faaruru ra te taata atoa i “te mau taime ati rahi faaruru atâ.” (Tim. 2, 3:1, MN) Te hinaaro ru ra te taata i te mau vahi atoa i te tiaturiraa. E oaoa te feia poro i te Basileia i te ite roa ˈtu e e nehenehe te mata hepohepo o te taata e taui ei mata tiaturi a farii ai ratou i te parau apî maitai. Auê te rahi o te oaoa o te mau pionie tamau o te rave nei hau atu i te 800 hora i te mau matahiti atoa no teie ohipa faaoraraa!—Tim. 1, 4:16.
5, 6. Eaha te tauturu ia oe ia riro ei pionie tamau?
5 Te feruri maitai ra anei oe i te taviniraa ei pionie tamau? E titau paha te reira ia “faaherehere maite i te taime” i nia i te mau tapiraa e ere i te mea faufaa roa. (Eph. 5:15, 16) Ua na reira e rave rahi e ua faahaehaa i to ratou oraraa, na roto i te faaitiraa mai i ta ratou ohipa no te horoa rahi i te taime no te mau faufaa a te Basileia. E nehenehe anei oe e faanaho i ta oe mau ohipa no te apiti atu ia ratou?
6 A ani i te paari no ǒ mai ia Iehova ra no te haamau i te hoê porotarama e au ia faaohipa. (Iak. 1:5) Teihea haamaitairaa ta oe e nehenehe e tiai? Te mau taoˈa pae varua pue noa! E haamaitai atoa Iehova ia oe i te pae materia i ta oe e hinaaro mau. (Mat. 6:33) E fanaˈo te feia e tamata ia Iehova i roto i teie tuhaa i “te taoˈa rahi roa ei maitai no [ra]tou.”—Mal. 3:10.