“Ia ineine no te mau ohipa maitatai atoa”
1 I to Iesu haamataraa i te hoê ohipa pororaa apî, ua rave oia i te taime no te faaineine i ta ˈna mau pǐpǐ. (Mat. 10:5-14) Noa ˈtu e mea ohipa roa tatou paatoa, e tauturu mai te raveraa tau minuti no te faaineine ia tatou hou a apiti ai i te taviniraa i tera fare i tera fare, ia ooti i te mau faahopearaa maitatai.—Kor. 2, 9:6.
2 E nafea ia faaineine: E haamata te faaineineraa maitai e te iteraa i te mau tumu parau i roto i te papai ta tatou e opua ra i te pûpû. E mea tia atoa ia manaˈo tatou i te mau taata o ta tatou tuhaa fenua. Teihea mau tumu parau e haapeapea ra ia ratou? Eaha te mau tiaturiraa faaroo ta tatou paha e farerei? E nehenehe tatou e hiˈo i te mau hohoˈa faaiteraa i roto i Ta tatou taviniraa i te Basileia e i te buka Haaferuriraa i nia i te mau Papai no te tahi mau manaˈo.
3 E tauturu atoa te faaroo-maitai-raa i te mau faahiˈoraa ravehia i te Putuputuraa no te taviniraa ia tatou. A aravihi atu â ˈi tatou i te faaohipa i ta tatou faaiteraa, e iti mai ïa te taime hinaarohia no te faaineine. Teie râ, mai te peu e e feruri tatou i te taime taitahi hou a haere ai i roto i te pororaa, i te mea ta tatou e parau e e tamau â i te haamaitai i ta tatou faaiteraa, e manuïa ˈtu â ïa tatou. E titauhia atoa ia rave tatou i te taime no te hiˈo e to roto i ta tatou pute te mau papai atoa e hinaarohia.
4 Eaha te tauturu ia tatou ia haamanaˈo i ta tatou faaiteraa? O te parauraa i ta tatou faaiteraa ma te reo puai te hoê ravea e mau ai i roto i to tatou feruriraa ta tatou e hinaaro e parau. Te au ra vetahi i te rave i te mau faaineineraa i te taime o ta ratou haapiiraa utuafare. Ua ite vetahi atu e e tauturu te papairaa i te hoê haapotoraa o ta ratou faaiteraa i nia i te hoê api iti e te hiˈo-oioi-raa ˈtu hou rii a haere ai i te hoê fare.
5 No te aha e mea faufaa ˈi: E rahi atu â to tatou aravihi e to tatou oaoa i roto i te taviniraa ua faaineine-maitai-hia anaˈe. E tauturu te reira ia tatou ia vai mǎrû noa e ia iti mai te taiâ i te pae opani. E nehenehe tatou e haapao rahi aˈe i te fatu fare, eiaha râ e manaˈo noa i ta tatou e parau. Hau atu â, e tauturu te ite-maitai-raa i te papai ia tatou ia pûpû i te reira ma te aau tae atu â.
6 Te faaitoito ra te mau Papai ia tatou “[ia ineine no] te mau ohipa maitatai atoa.” (Tito 3:1; MN) Aita e ohipa maitai aˈe i te pororaa i te parau apî maitai! Ma te faaineine maitai, e faatura tatou i te fatu fare o te farii i te faaroo mai, e ia Iehova, te Atua ta tatou e tia ra.—Isa. 43:10.