“A rave mai i tau zugo i nia ia outou”
1 I roto i te hoê ao î i te faaheporaa e te ahoaho, ua fanaˈo tatou i te tamǎrûraa mau ma te pahono i te titau-manihini-raa mahanahana a Iesu no te ite i te tamahanahanaraa i raro aˈe i ta ˈna zugo. (Mat. 11:29, 30, MN) Te fariiraa i te zugo ei pǐpǐ na Iesu, o te apiti-atoa-raa ïa i te hoê ohipa e ere noa i te mea fifi, e mea tamahanahana atoa râ. E titau te reira i te pororaa i te parau apî maitai o te Basileia e te tautururaa ia vetahi ê ia noaa te tamahanahanaraa e o tatou i raro aˈe i ta Iesu zugo mǎrû.—Mat. 24:14; 28:19, 20.
2 Tamahanahanaraa no roto mai i te taviniraa: Aita o Iesu i ani i ta ˈna mau pǐpǐ ia amo i ta ratou hopoia e ta ˈna atoa. Ua titau oia ia ratou ia taui i ta ratou hopoia teimaha no ta ˈna hopoia mâmâ. Aita tatou e teimaha faahou ra i te mau ahoaho e te ereraa i te tiaturiraa a teie faanahoraa o te mau mea; aita atoa ïa tatou e ohipa ra no te mau taoˈa rahi papu ore. (Luka 21:34; Tim. 1, 6:17, MN) Noa ˈtu e e ohipa ta tatou e e mea tia ia haa tatou ia noaa mai te mau mea faufaa roa o to tatou oraraa, e niu tatou i to tatou oraraa i nia i te haamoriraa a te Atua. (Mat. 6:33) E ite noa tatou i te tamahanahanaraa i roto i te taviniraa, eiaha te teimaharaa, mai te peu e e tapea tatou i te manaˈo maitai i nia i te mea faufaa roa ˈˈe.—Phil. 1:10.
3 E oaoa iho â tatou i te paraparau no nia i te mau hinaaro atoa o to tatou aau. (Luka 6:45) Te tâuˈa hohonu nei te mau Kerisetiano atoa ia Iehova e te mau haamaitairaa a te Basileia ta ˈna i fafau. No reira, auê i te mea tamahanahana ia paraparau no nia i te “evanelia o te maitai ra” e ia vaiiho i muri ia tatou i te mau tapitapi o te mahana hoê a apiti ai tatou i te taviniraa! (Roma 10:15) Parau mau, e rahi atu â tatou i te na reira, e aravihi atu â ïa tatou e e oaoa ˈtu â. No reira, e hopoi mai te horoaraa hau atu â i te taime no te taviniraa, ia nehenehe tatou, i te tamahanahanaraa hau. E e mea tamahanahana iho â ia farii te tahi mau taata i ta tatou pororaa! (Ohi. 15:3) Ia farerei atoa tatou i te tâuˈa ore aore ra te patoiraa, e hopoi mai te taviniraa i te tamahanahanaraa pae varua mai te peu e e haamanaˈo noa tatou e e faaoaoa ta tatou mau tutavaraa ia Iehova e na ta ˈna haamaitairaa e faatupu i te mau faahopearaa maitai atoa.—Ohi. 5:41; Kor. 1, 3:9.
4 Ma te farii i te titau-manihini-raa a Iesu, e fanaˈo tatou i te haamaitairaa taa ê e tavini e o ˈna ei Ite no Iehova. (Isa. 43:10; Apo. 1:5) Aita ˈtu mea tamahanahana aˈe i te reira!