Pahonoraa i ta outou mau uiraa

◼ Eaha te huru ahu e tano no te mataitai i te mau vahi e faaohipahia ra no te taviniraa a Iehova?

E ati aˈe te ao nei, e vahi taa ê pûpûhia te mau Piha a te Basileia, te mau Piha tairururaa, e te mau Betela no te taviniraa a Iehova. E mea au noa te reira mau vahi, mea mâ, e mea faanaho-maitai-hia, o te faaite i te tura. E mea taa ê roa ïa i ta tatou e ite pinepine ra i roto i ta Satani faanahoraa o te mau mea. Ia ite-atoa-hia ïa te feia o te haere e mataitai i te mau vahi faaohipahia no te taviniraa a Iehova ei taata no Iehova, ei taata o te rave nei i to ˈna hinaaro.

Ei Kerisetiano, ‘te faaite hua nei tatou ia tatou iho ei rave ohipa na te Atua’ i te mau mea atoa nei, tae noa ˈtu i to tatou ahuraa e faaneheneheraa rouru au noa e tano. (Kor. 2, 6:3, 4) E titau-atoa-hia ia faaite noa tatou i te haerea maitai. I te mau taime atoa, ia faaite to tatou ahuraa e faaneheneheraa rouru i te peu mâ e te tura e au i te mau tavini a te Atua ra o Iehova. E mea faufaa roa ˈtu te reira ia haere tatou e mataitai i te pu rahi i New York e te mau amaa atoa e ati aˈe te ao nei.

No nia i te faufaaraa o te ahuraa e te faaneheneheraa rouru e tano, te parau ra te Organisés pour faire la volonté de Jéhovah no nia i te faufaaraa o te mâraa pae tino, te ahuraa e au, e te faanehenehe-maitai-raa i te rouru a apiti ai tatou i te taviniraa e a haere ai i te mau putuputuraa Kerisetiano. I te api 138, paratarafa 3, te na ô ra te buka e: “A haamanaˈo, te auraa o te iˈoa Betela oia hoi ‘Fare o te Atua.’ E titauhia ïa ia tuea to tatou ahuraa, faaneheneheraa rouru, e haerea i tei titauhia ra ia tatou ia haere tatou i te mau putuputuraa no te haamoriraa i te Piha a te Basileia.” E mea tia ia haapao te feia poro i te Basileia i te reira ture aveia teitei a haere ai ratou e mataitai i te Betela i to ratou vahi faaearaa oia atoa te feia no te mau vahi atea ˈtu â. Ma te na reira, e faaite te taata mataitai i te mauruuru e te faatura e tano.—Sal. 29:2.

Ia faaite to tatou ahu ia tatou ei feia ‘e parau ra e faatura i te Atua’ e tia ˈi. (Tim. 1, 2:10, MN) E ohipa maitai te ahuraa e te faaneheneheraa rouru e tano i nia i ta vetahi ê hiˈoraa i te haamoriraa mau a Iehova. Ua tapaohia râ e ia mataitai te tahi mau taeae e tuahine i te mau vahi faaohipahia no te taviniraa a Iehova e oomo ratou i te mau ahu mahana roa, haapaoraa ore, aore ra e itehia te rotoraa. Aita teie huru ahu e tano ra no te mau Kerisetiano i te mau taime atoa. I roto i teie huru tupuraa mai i roto i te tahi atu mau tuhaa atoa o to tatou oraraa Kerisetiano, te hinaaro nei tatou e faatura i te mau ture aveia teitei o te faataa ê nei i te nunaa o te Atua i teie nei ao, ma te rave i te mau mea atoa no te faahanahana i te Atua.—Roma 12:2; Kor. 1, 10:31.

Ia mataitai outou i te pu rahi i New York aore ra te tahi atu amaa, no te hoê mataitairaa opuahia anei aore ra no te hoê tere i te tau faafaaearaa i te hoê vahi auhia e te mau ratere, a uiui ia outou iho e: ‘Te faaite ra anei to ˈu ahu e to ˈu faaneheneheraa rouru i te huru au noa, te mâ e te tura o te vahi o ta ˈu e mataitai? Te faahohoˈa maitai ra anei te reira i te Atua ta ˈu e haamori ra? E haapeapea anei aore ra e huru ê anei vetahi ê na roto i to ˈu faaahuraa?’ Ia vai “nehenehe” noa ïa ‘te [haapiiraa] a te Atua a to tatou Ora ra i te mau mea atoa’ na roto i to tatou faaahuraa e to tatou faaneheneheraa rouru!—Tito 2:10; MN.