E nafea tatou e tauturu ai i tei tae mai i te Oroa haamanaˈoraa?
1. Eaha te faaiteraa puai e horoahia i te 22 no Mati 2008?
1 I te 22 no Mati 2008, e fanaˈo te mau mirioni taata e ati aˈe te ao i te hoê faaiteraa puai. E faaroo te feia e tae mai i te Oroa haamanaˈoraa i te aroha rahi o Iehova i to ˈna pûpûraa mai i te hoê hoo no te huitaata. (Ioa. 3:16) E haapii ratou no nia i te Basileia e e nafea Iehova e faaohipa ˈi i te reira no te faatupu i to ˈna hinaaro no te fenua atoa nei. (Mat. 6:9, 10) E ite mata roa ˈtu ratou i te here e te auhoêraa o te mau tavini a te Atua e e fanaˈo ratou i to tatou farii maitai mahanahana.—Sal. 133:1.
2. E nafea tatou e nehenehe ai e tauturu i te mau piahi Bibilia o te tae mai i te Oroa haamanaˈoraa?
2 Te mau piahi Bibilia: No haamata noa ˈtura vetahi i putuputu mai i te haapii i te Bibilia e o tatou. A parau i to ratou iˈoa i te mau taeae e tuahine. A faataa ˈtu i te mau putuputuraa tahebedoma, e a mataitai poto e o ˈna i te Piha a te Basileia. I te roaraa o te oreroraa parau, e faaitoito te taeae orero i te taata taitahi ia tamau â i te haere i mua i te pae varua. E nehenehe oe e faaohipa i to ˈna mau manaˈo no te faaitoito i ta oe mau piahi.
3. E nafea tatou e nehenehe ai e faaitoito i te feia aita e poro faahou ra i tae mai?
3 Te feia aita e poro faahou ra: E feia aita e poro faahou ra vetahi o te putuputu mai. A tutava i te haere e aroha ia ratou ma te mahanahana. A ape i te ui atu i te mau uiraa no nia ia ratou iho aore ra i te parau atu i te mau mea o te nehenehe e faahaama ia ratou. I muri noa ˈˈe i te Oroa haamanaˈoraa, e titauhia ia haere te mau matahiapo e hiˈo i te feia atoa aita e poro faahou ra o tei tae mai, ia haapopou ia ratou no ta ratou mau tutavaraa i te haere mai, e ia titau manihini ia ratou ma te mahanahana i te putuputuraa a te amuiraa i muri mai.
4. E nafea tatou taitahi e nehenehe ai e tauturu i te mau manihini?
4 Te mau manihini: Vetahi o tei tae mai, o te feia paha ta tatou i matau aore ra e melo utuafare o ta tatou iho i titau manihini. Ua titau-manihini-hia paha vetahi i te roaraa o te opereraa taa ê. Mai te peu e e ite oe i te tahi mau taata aita oe i matau, a haere atu e farii popou ia ratou ma te faaite o vai oe. A tahi ra paha ratou a haere mai ai i te hoê o ta tatou mau putuputuraa. I roto i ta outou tauaparauraa, e nehenehe e itea mai ia oe e nafea ia farerei ia ratou. E nehenehe oe, na roto i te haere-roa-raa ˈtu e farerei aore ra te niuniu-poto-raa ˈtu tau mahana i muri aˈe i te Oroa haamanaˈoraa, e atuatu i te anaanatae e e pûpû atu i te hoê haapiiraa bibilia.
5. Eaha ta tatou e nehenehe e parau no te haamata i te hoê haapiiraa bibilia?
5 E nehenehe te haamaramaramaraa i roto i te oreroraa parau o te Oroa haamanaˈoraa e riro ei niu no te faaite atu i te buka Bibilia haapii i te farerei-faahou-raa. Ei hiˈoraa, e taio te taeae orero i te Isaia 65:21-23. I te farerei-faahou-raa, e nehenehe oe e faahiti i te oreroraa parau e e parau atu, “Mai te peu e e farii oe, e faaite atu vau i te tahi atu mau haamaitairaa ta te hoo e horoa mai.” A hiˈopoa ïa i te mau api 4-5 o te buka Bibilia haapii. Aore ra e nehenehe oe e parau e, “Mea rahi te ui nei afea tatou e ite ai i te tupuraa o te parau tohu a Isaia.” A hiˈopoa ïa i te mau paratarafa 1-3 o te pene 9. Te tahi atu ravea, o te faahiti-noa-raa ˈtu ïa i ta te taeae orero i parau, te faaiteraa ˈtu i te buka Bibilia haapii, e te faataaraa ˈtu i te tereraa o te haapiiraa.
6. Teihea mau ravea ta tatou e nehenehe e imi a faaroo ai tatou i ta Iesu faaueraa e haamanaˈo i to ˈna poheraa?
6 Ia nehenehe tatou taitahi e imi i te mau ravea no te tauturu i te mau piahi Bibilia, te feia aita e poro faahou ra, e te mau manihini te tae mai. (Luka 22:19) E mea papu e e haamaitai Iehova i te ohipa rahi atu â atoa i roto i ta tatou taviniraa i te Basileia.