Pahonoraa i ta outou mau uiraa

◼ Eaha te huru ahu e te huru faaneheneheraa rouru e tano no te mataitai i te Betela?

Ia haere tatou i te Betela, no te mataitai anei aore ra no te farerei i te tahi mau melo no te utuafare o te Betela, “te tiaturihia ra e . . . no te pae o te faaneheneheraa rouru, te ahu aore ra te haerea, ia tuea ïa e to tatou huru ia haere tatou i te mau putuputuraa no te haamoriraa i te Piha a te Basileia.” (om-F api 131) Teie râ, ia mataitai anaˈe te tahi mau taeae e tuahine i te mau fare o te Betela, e oomo noa mai ratou i te tahi mau ahu mahana. Eita roa te reira e tano. Ia riro to tatou huru ahu ei mea maitai, te faanehenehe maitai, te au noa e ia faaite te reira i te peu mâ e te tura e au i te mau tavini a te Atua ra o Iehova.—Tim. 1, 2:9, 10.

E mea faufaa roa ˈtu te reira ia haere tatou e mataitai i te Betela, no te mea e huti mai te reira i te ara-maite-raa o te mau taata e rave rahi e ere i te Ite no Iehova. Ia au i ta ratou e ite ra, e nehenehe ratou e hamani i te manaˈo no nia i te nunaa o te Atua e ta ˈna faanahonahoraa. E haerea paari ïa ia tauaparauhia no nia i teie manaˈo e te mau taata o te haapii nei i te Bibilia e te tahi atu mau taata o te mataitai paha i te hoê Betela, no te faaite ia ratou i te faufaaraa ia haapao maitai i to ratou ahu e to ratou faaneheneheraa rouru. E mauruuru te utuafare o te Betela i te reira.

E haapao maitai te mau tavini Kerisetiano ia ore to ratou huru ahu ia riro ei turoriraa. (Kor. 2, 6:3, 4) Na roto râ i te faaturaraa i te mea au noa, ia tamau noa tatou ‘i te faanehenehe i te parau a te Atua a to tatou Ora ra i te mau mea atoa ra’!—Tito 2:10.