E haapapu te ahu e au e te faatura ra tatou i te Atua
1. E nafea tatou e faaite ai i to tatou mauruuru no te mau tairururaa mataeinaa e piri maira?
1 Ua fatata tatou i te riro ei manihini na Iehova i te mau tairururaa mataeinaa 2003 “A faahanahana i te Atua.” Auê tatou i te mauruuru ia Iehova i te titau-manihini-raa ia tatou i tera amuraa maa rahi pae varua! E faaite to tatou ahu e to tatou faaneheneheraa rouru i to tatou faatura ia ˈna e to tatou mauruuru no ta ˈna mau faanahoraa pae varua.—Sal. 116:12, 17.
2. No te aha e mea faufaa ˈi ia mâ tatou e ia au to tatou ahu e to tatou faaneheneheraa rouru?
2 Mâ e te anoi ore: E mea maitai ia faaite to tatou ahu e to tatou faaneheneheraa rouru i te mau ture aveia a to tatou Atua viivii ore e te anoi ore. (Kor. 1, 14:33; Kor. 2, 7:1) E mea maitai ia mâ to tatou tino, to tatou rouru e to tatou maiuu, e ia au to tatou ahu. E mea rahi i teie mahana e ahu haapaoraa ore to ratou. E ere râ no te mea e ahu haapaoraa ore to te hoê taata teata aore ra tuaro, e na reira atoa ïa te hoê Kerisetiano. Ia pee tatou i te mau peu apî, eita ïa te taata e ite maitai i te taa-ê-raa i rotopu i te feia e tavini ra i te Atua mau e te feia aita e tavini ra ia ˈna.—Mal. 3:18.
3. E nafea e papu ai ia tatou e te tuati ra to tatou ahu i te aˈoraa e vai ra i roto i te Timoteo 1, 2:9, 10?
3 Te ahu e au i te mau tavini Kerisetiano: I to ˈna papairaa i te tiaau Kerisetiano ra o Timoteo, ua faaitoito te aposetolo Paulo i ‘te mau vahine ia faanehenehe ia ratou iho i te ahu e au ra, ma te faaieie ore, e te haapao maitai; ma te parau maitai, o tei au i te mau vahine i mau i te paieti ra.’ (Tim. 1, 2:9, 10) E mea faufaa roa ia hiˈopoa maite ia tatou iho ia papu e e ahu e au to tatou. Ia mâ, ia tano e ia au to tatou ahu, eiaha ia pura aore ra ia faatupu i te hinaaro.—Pet. 1, 3:3.
4, 5. Eaha te mau faaararaa e mea titauhia ˈi ia pee te mau tane e te mau vahine Kerisetiano?
4 Ua faaara atoa o Paulo no nia i te haapao-hua-raa i “te rouru firi, e te auro, e te poe, e te ahu taoˈa rahi ra.” (Tim. 1, 2:9) E faaite te hoê vahine Kerisetiano i te paari ma te faaohipa au noa i te mau taoˈa rii faanehenehe, te mau faaunaunaraa mata e te tahi atu mau taoˈa faaunauna.—Mas. 11:2.
5 No te mau tane Kerisetiano atoa te mau faaueraa tumu o te aˈoraa ta Paulo i horoa na te mau vahine Kerisetiano. E mea maitai ia ape te mau taeae i te mau peu e faaite ra i te manaˈo o te ao. (Ioa. 1, 2:16) Ei hiˈoraa, i te tahi mau fenua, e mea auhia te mau ahu rarahi roa e pee noa i te mataˈi; eita râ teie faito ahu e tano no te hoê tavini a te Atua.
6. No te aha e mea titauhia ˈi ia pee tatou i te mau ture aveia teitei no nia i to tatou ahu e to tatou faaneheneheraa rouru ia haere tatou i te tairururaa aore ra ia hoˈi tatou mai reira mai, i te roaraa o te tairururaa e ia oti te mau rururaa?
6 I roto i te mau ohipa faaanaanataeraa: I te mau rururaa, te horoa ra te rahiraa o te mau taeae e tuahine i te hoê hiˈoraa maitai roa no nia i to ratou ahu e to ratou faaneheneheraa rouru. Te faaite maira râ te tahi mau parau faataa e aita te tahi pae e haapao ra i te reira ia haere ratou i te tairururaa aore ra ia hoˈi ratou mai reira mai, aore ra i roto i te mau ohipa faaanaanataeraa ia oti te mau rururaa. Eiaha tatou e haamoe e e ohipa to tatou ahu e to tatou faaneheneheraa rouru, i te roaraa o te porotarama, na mua ˈˈe aore ra ia oti te reira, i nia i ta te taata hiˈoraa i te mau tavini a te Atua. I te mea e to nia noâ ta tatou tareta iˈoa ia tatou, e mea titauhia ia oomo tatou i te ahu e au i te mau tavini Kerisetiano. E turai pinepine te reira i te taata ia haapopou ia tatou, e nehenehe atu ai tatou e poro ia ratou.—Kor. 1, 10:31-33.
7. Eaha te faahopearaa o te ahu e te faaneheneheraa rouru e au i nia ia vetahi ê?
7 Mai te hoê mata ataata o te faanehenehe i te hohoˈa mata, e faahanahana atoa te ahu e te faaneheneheraa rouru e au i ta tatou poroi e te faanahonahoraa ta tatou e tia ˈtura. I rotopu i te feia e mataitai ia tatou i teie matahiti i te mau tairururaa mataeinaa “A faahanahana i te Atua,” e turaihia paha te tahi pae ia ui no te aha tatou e mea taa ê ai, e parau atu ai e: “E haere atoa matou [na muri ia outou]: ite aˈenei matou e, tei ia outou te Atua.” (Zek. 8:23; MN) Ia faaite ïa tatou taitahi i to tatou faatura ia Iehova maoti to tatou ahu e to tatou faaneheneheraa rouru.
[Tumu parau tarenihia i te api 5]
Ia au to tatou ahu e to tatou faaneheneheraa rouru
▪ I roto i to tatou mau tere
▪ I te tairururaa
▪ I roto i te mau ohipa faaanaanataeraa