Porotarama o te tairururaa haaati i mua nei
E au ia faahanahanahia Iehova. E nafea tatou e faahanahana ˈi ia Iehova? Eaha te mau fifi ta vetahi e faaruru ra i roto i teie tuhaa? Eaha te mau haamaitairaa ta te feia e faahanahana ra i te Atua e fanaˈo nei? E pahono te porotarama o te tairururaa haaati no te matahiti taviniraa 2008 i teie mau uiraa ma te au. Teie te manaˈo tumu ‘A rave i te mau mea atoa ma te faahanahana i te Atua.’ (Kor. 1, 10:31) E hiˈo anaˈe eaha te tiai maira ia tatou i te roaraa o na mahana haapiiraa rahi i te pae varua e piti.
E vauvau te tiaau mataeinaa i na tumu parau “No te aha e faahanahana ˈi i te Atua?” e “A riro ei hiˈoraa maitai ma te faaî i te mau titauraa a te Atua.” Na ˈna e horoa i te oreroraa parau no te taatoaraa, “O vai te nunaa e faahanahana ra i te Atua?,” e te oreroraa parau hopea, “A faahanahana i te Atua ma te tahoê na te ao nei.” Na ˈna atoa e faatere i te Haapiiraa o te taviniraa teotaratia. E hohora te tiaau haaati i te mau manaˈo tumu “Ia au tatou i te faaite i te hanahana o te Atua,” “E hiˈopoa anaˈe i te mau hinaaro o te tuhaa haaati,” e “Ia papu noâ outou i te parau mau,” niuhia i nia i te Petero 2, 1:12. E haapii atoa tatou e “E faahanahana te taviniraa pionie i te Atua,” e nafea râ. E faahohonu te oreroraa parau tatuhaahia haaferuri matamua, “E faahanahana anaˈe i te Atua i roto i te mau tuhaa atoa o to tatou oraraa,” i te auraa o te mau parau faaurua o te Korinetia 1, 10:31. E faataa te piti o te oreroraa parau tatuhaahia “E rave anaˈe i te taviniraa moˈa no te arue ia Iehova,” i te mau tuhaa rau o ta tatou haamoriraa. E fanaˈo tatou i te haapotoraa o Te Pare Tiairaa e te aparauraa o te irava mahana i te Tapati. E taime atoa te reira no te bapetizoraa.
Aita te rahiraa o te huitaata e farii ra i te Atua. Mea rahi tei riro roa i te mau opuaraa a te taata, aita ïa e feruriruri ra i te hanahana o Iehova. (Ioa. 5:44) Ua papu râ ia tatou te faufaaraa ia faataa i te taime no te feruri e nafea ia ‘rave i te mau mea atoa ma te faahanahana i te Atua.’ A faanaho i te tae mai e i te haafaufaa roa i na rururaa atoa e maha.