Porotarama o te mahana tairururaa taa ê i mua nei
Teie te manaˈo tumu o te porotarama o te mahana tairururaa taa ê no te matahiti taviniraa 2008 ‘E araea tatou—Na Iehova tatou i hamani,’ niuhia i nia i te Isaia 64:8. Maoti te faaararaa bibilia e horoahia na roto i teie porotarama, e taa ˈtu â ˈi ia tatou te paari, te parau-tia, te puai, e te here o Iehova ei Potera Rahi.
E faaite mai te oreroraa parau a te tiaau haaati, “A haa mai te mau farii maitatai i roto i te taviniraa,” e te rahi noa ˈtura te taata e mea fanaˈo ratou i te ite i te parau mau e te faaite i te reira ia vetahi ê. E faaite mai te oreroraa parau “E paruru te feruriruriraa ia oe” e nafea te feruri-maite-raa i te mau faaueraa tumu parau-tia a Iehova e paruru ai ia tatou. E aparau te taeae orero ratere i te feia e faaroo ra i nia i na manaˈo tumu “Eiaha ‘e faaau atu i teie nei ao’” e “Ia taraihia tatou e te Potera Rahi.” E ite te mau metua e te feia apî i te faaitoitoraa i roto i na oreroraa parau “Te feia apî mea faufaa ratou no Iehova” e “Te tuhaa faufaa roa a te mau metua i roto i te ohipa tarairaa.” Na roto i te mau faahiˈoraa e te mau uiuiraa, e oaoa roa tatou i te faaroo e i te ite eaha ta to tatou mau taeae e tuahine e rave nei i roto i ta ratou taviniraa. E mea tia ia faaara oioi te feia o te hinaaro e faataipe i ta ratou pûpûraa na te Atua ma te bapetizo i roto i te pape, i te tiaau peretiteni. A afai mai i ta oe vea Te Pare Tiairaa o te haapiihia i te hebedoma o te mahana tairururaa taa ê.
Noa ˈtu eaha ta te Potera Rahi e opua, e faatupu iho â oia i te reira. Tei ia tatou taitahi râ ia maiti e nafea tatou i mua i ta ˈna tarairaa ia tatou. Mai te hoê tâpû araea i nia i te porotaa a te hoê potera, e nehenehe te feia o te auraro ma te paari i ta Iehova mau ture aveia e faatanoraa, e taraihia, e haamaninahia, e e faarirohia ei farii faufaa. Ia ohipa amui tatou e o Iehova, e faahanahana tatou i to ˈna mana arii e e fanaˈo tatou e rave rahi haamaitairaa.