Te hoê fa maitai no te matahiti taviniraa apî
1. Eaha te fa ta tatou e nehenehe e feruri no te matahiti taviniraa apî?
1 E titauhia ia haamau tatou i te mau fa ia hinaaro tatou e haere i mua i te pae varua. Eaha ta oe iho fa i haamau no te matahiti taviniraa apî? Te hoê fa maitai roa, o te taviniraa pionie tauturu ïa hoê avaˈe aore ra hau atu. I te mea e e titau pinepine teie ohipa au i te tahi faanahoraa maitai, mea tano ïa ia haamata i te feruri i teie nei. No te aha e feruri ai i te taviniraa pionie tauturu ei fa?
2. No te aha e feruri ai i te taviniraa pionie tauturu ei fa?
2 Te mau tumu e riro ai ei pionie tauturu: Maoti te taviniraa pionie tauturu e nehenehe ai tatou e faaoaoa “rahi atu â” i to tatou Metua i te raˈi ma te faataa ˈtu â i te taime i roto i te taviniraa. (Tes. 1, 4:1) A feruri ai tatou i te mau mea atoa ta Iehova i rave no tatou, e turai to tatou aau ia tatou ia paraparau no ˈna. (Sal. 34:1, 2) Te ite ra e te haafaufaa ra Iehova i ta tatou mau haapaeraa e rave ra no te haa ˈtu â i roto i te taviniraa. (Heb. 6:10) E hopoi mai te iteraa e te faaoaoa nei tatou ia Iehova maoti ta tatou ohipa puai, i te oaoa rahi.—Par. 1, 29:9.
3, 4. E nafea tatou e faufaahia ˈi i te taviniraa pionie tauturu?
3 E pinepine, ia rahi atu â oe i te rave i te hoê mea, e ohie e e au roa ˈtu â te reira. Ia faataa ˈtu â oe i te taime i roto i te taviniraa, e papu atu â ta oe paraparauraa i te taata. E aravihi atu â oe i te haamata i te mau aparauraa e i te faaohipa i te Bibilia. Ia rahi atu â oe i te faaite i to oe faaroo, e puai atu â te reira. Mea rahi te taata poro aita hoi e haapiiraa bibilia ta ratou tei haamata i te tahi a riro ai ratou ei pionie tauturu.
4 E faaitoitoraa atoa paha te taviniraa pionie tauturu e hinaarohia no te matara mai i te hoê tereraa ohipa pae varua haumani. Ua faaoti te hoê pionie tamau tahito, o tei haafaufaa roa i ta ˈna ohipa, i te rave i te taviniraa pionie tauturu hoê avaˈe. Teie ta ˈna i parau: “Ua maere au e ua faaitoito roa tera noa avaˈe ia ˈu i te pae varua! Ua faaoti atura vau i te rave tamau i te taviniraa pionie tauturu, a riro faahou atu ai au ei pionie tamau.”
5. E nafea tatou e nehenehe ai e haavî i te manaˈo e eita e maraa?
5 E haavî i te mau haafifiraa: E taiâ paha vetahi i te riro ei pionie tauturu no te mea e ere ratou i te feia poro aravihi i to ratou manaˈo. Mai te peu e tera atoa to oe manaˈo, e nehenehe Iehova e tauturu ia oe mai ta ˈna i tauturu ia Ieremia. (Ier. 1:6-10) E “reo maromaroâ e te maumau” to Mose, ua faaohipa râ Iehova ia ˈna no te faatupu i to ˈNa hinaaro. (Exo. 4:10-12) Ia manaˈo oe e eita e maraa ia oe, a ani i te itoito ia Iehova.
6. E nafea e nehenehe ai e riro ei pionie tauturu noa ˈtu te maˈimaˈi aore ra te rahi o te ohipa?
6 Te taiâ ra anei oe i te riro ei pionie tauturu no te maˈimaˈi aore ra mea rahi ta oe ohipa? Mai te peu e mea paruparu to oe tino, e nehenehe oe e riro ei pionie tauturu ma te faatano i te tereraa. Mai te peu e mea rahi ta oe ohipa, e nehenehe paha oe e faanuu i te tahi mau ohipa e ere i te mea faufaa roa i te tahi atu avaˈe. Ua nehenehe vetahi e ohipa taime taatoa ta ratou e faaherehere i te taime no te riro ei pionie tauturu ma te rave hoê aore ra e piti mahana faafaaearaa.—Kol. 4:5.
7. No te aha e mea maitai ai ia pure noa no nia i te taviniraa pionie tauturu?
7 E nafea ïa: A faaite i to oe hinaaro i roto i te pure. A ani ia Iehova ia haamaitai i ta oe mau tutavaraa no te faaaano i ta oe taviniraa. (Roma 12:11, 12) E nehenehe o ˈna e tauturu ia oe ia rave i te mau faaotiraa paari no te faanaho maitai ia oe. (Iak. 1:5) Mai te peu e aita oe e hinaaro ra, a ani ia Iehova ia tauturu ia oe ia au i te pororaa.—Luka 10:1, 17.
8. E nafea te faaohiparaa i te Maseli 15:22 e turu ai ia oe ia riro ei pionie tauturu?
8 A aparau e te utuafare i te fa o te taviniraa pionie tauturu. (Mas. 15:22) E nehenehe te hoê melo e riro ei pionie tauturu ma te turu a te tahi atu mau melo o te utuafare. A aparau e te tahi atu i roto i te amuiraa i to oe hinaaro e riro ei pionie, te feia iho â râ hoê â to outou huru tupuraa. E nehenehe te reira e faatupu i te aau tae rahi no te taviniraa pionie tauturu.
9. Teihea avaˈe ta oe paha e maiti no te riro ei pionie tauturu?
9 A hiˈo faahou ai oe i ta oe tarena teotaratia no te matahiti taviniraa apî, afea oe e nehenehe ai e riro ei pionie tauturu i to oe manaˈo? Mai te peu e e ohipa taime taatoa ta oe aore ra te haere noa ra oe i te haapiiraa, e hiˈo paha oe i te mau avaˈe te vai ra te tau faafaaearaa aore ra te vai ra e pae Mahana maa aore ra e pae Tapati. Ei hiˈoraa, e pae hopea hebedoma taatoa to Tetepa, Titema, Mati e Atete. E pae Mahana maa to Me e e pae Tapati to Tiunu. Mai te peu e mea maˈimaˈi oe, a hiˈo i te mau avaˈe e pinepine mea maitai te mahana. E nehenehe atoa paha oe e rave i te taviniraa pionie i te avaˈe e tere mai ai te tiaau haaati i roto i ta oe amuiraa. Ia tere mai o ˈna, e fanaˈoraa taa ê atoa ta oe e apiti i te tuhaa matamua o te putuputuraa e te mau pionie tamau. I te mea e e topa te Oroa haamanaˈoraa i te 22 no Mati i teie matahiti i mua, e avaˈe maitai roa o Mati, Eperera e Me. Ua maiti anaˈe oe i te aore ra te mau avaˈe e hinaaro ai oe e riro ei pionie tauturu, a haamau i te hoê porotarama o te tauturu ia oe ia rave i te rahiraa hora titauhia.
10. Eaha ta oe e nehenehe e rave ia ore e tia ia oe ia riro ei pionie tauturu?
10 Noa ˈtu e te manaˈo ra oe e eita e maraa ia oe te taviniraa pionie tauturu i te roaraa o te matahiti taviniraa e haere maira, e nehenehe noa oe e atuatu i te feruriraa pionie. A tamau i te rave i tei maraa ia oe i roto i te taviniraa, ma te tiaturi e te mauruuru ra Iehova i ta oe mau tutavaraa ma te nephe taatoa no te horoa na ˈna i te mea maitai roa ˈˈe. (Gal. 6:4) A turu e a faaitoito i te feia e nehenehe e riro ei pionie tauturu. E nehenehe paha oe e faatano i ta oe porotarama no te poro hoê mahana hau i te hebedoma e te mau pionie.
11. No te aha e mea tia ˈi ia taa ia tatou e e tau ru to tatou?
11 Te taa ra i te nunaa o Iehova e e tau ru to tatou. Te vai ra te hoê ohipa e rave—te pororaa i te parau apî maitai. Te fifi ra te ora o te taata, e te poto nei te taime. (Kor. 1, 7:29-31) Na te here i te Atua e i te taata-tupu e turai ia tatou ia rave i tei maraa ia tatou i roto i te taviniraa. Maoti te tutavaraa e te hoê porotarama maitai, e nehenehe tatou e riro ei pionie tauturu hoê aˈe avaˈe i te roaraa o te matahiti taviniraa apî—te hoê fa maitai mau â!