E nafea ia haamata i te hoê haapiiraa bibilia i muri aˈe i te vaiihoraa i te mau vea
1. Eaha ta tatou fa ia vaiiho tatou i te mau vea?
1 I te Mahana maa, e pinepine tatou i te pûpû i Te Pare Tiairaa e te Réveillez-vous! i roto i te taviniraa. Teie râ, e taahiraa matamua noa teie e raea ˈi ia tatou ta tatou fa e haapii i te parau mau i te feia aau haavare ore. E manaˈo tauturu to muri nei e nafea ia pûpû i te buka Bibilia haapii i te hoê farerei-faahou-raa e ia haamata i te hoê haapiiraa bibilia. E nehenehe oe e faatano i te reira i ta oe tuhaa fenua e e faaohipa i ta oe iho mau parau. E nehenehe oe e faaohipa i te tahi atu faaiteraa e tano no oe.
2. E nafea ia faaohipa i te mau api matamua o te buka Bibilia haapii no te haamata i te hoê haapiiraa bibilia?
2 A faaohipa i te mau api matamua: Ia hoˈi atu oe, e nehenehe oe e parau e: “Te huti ra te mau vea ta ˈu i vaiiho atu i te ara-maite-raa i nia i te Bibilia. A tapao na no te aha e mea faufaa roa ˈi ia taio i te Bibilia.” A taio i te Isaia 48:17, 18; Ioane 17:3; aore ra te tahi atu irava e tano. E i muri aˈe i te faaiteraa e te horoaraa i te buka Bibilia haapii i te taata, e nehenehe oe e parau e:
◼ “Te horoa maira te Bibilia i te hoê tiaturiraa mau no a muri aˈe.” A faaite atu i te mau api 4-5 e a ui, “Teihea parau fafau ta oe e hinaaro e ite ia tupu?” A faaite atu i te pene o te faataa ra i te parau fafau bibilia ta ˈna i maiti, e a hiˈopoa poto noa hoê aore ra e piti paratarafa ia hinaaro o ˈna.
◼ E nehenehe atoa oe e parau e, “Te pahono ra te Bibilia i te mau uiraa faufaa roa ˈˈe o te oraraa.” A faaite atu i te api 6, e a ani aita anei o ˈna i ui aˈenei hoê o te mau uiraa i raro i te api. A faaite atu i te pene e pahono ra i te uiraa ta ˈna i maiti, e a hiˈopoa poto noa hoê aore ra e piti paratarafa.
◼ E nehenehe atoa oe e faaite i te tahi mau upoo parau o te tapura tumu parau e e ui atu eaha te tumu parau e anaanatae o ˈna. A faaite atu i taua pene ra, e a faataa poto noa ˈtu i te tereraa o te hoê haapiiraa bibilia.
3. E nafea tatou e nehenehe ai e haamata i te hoê haapiiraa bibilia i muri aˈe i te vaiihoraa i te mau vea e faataa ra i (a) te mau tupuraa o te ino noa ˈtura i te ao nei? (b) te utuafare? (c) te huru papu o te Bibilia?
3 A tuu i te hoê uiraa i te farereiraa matamua: Te tahi atu ravea, o te faaineineraa ïa no te farerei-faahou-raa i te farereiraa matamua. Ua farii anaˈe te taata i te mau vea, a tuu i te hoê uiraa, e a parau e e pahono atu oe ia hoˈi atu oe. A faanaho maitai i te farerei-faahou-raa, e a tapea i ta oe parau. (Mat. 5:37) Ia hoˈi atu oe, a haamanaˈo i te taata i te uiraa, e a taio e a tatara poto noa i te pahonoraa a te buka Bibilia haapii. A horoa ˈtu i te tahi buka na ˈna ia nehenehe o ˈna e apee i te taioraa. Teie te tahi mau hiˈoraa:
◼ Ia vaiiho oe i te vea no nia i te mau tupuraa o te ino noa ˈtura i te ao nei, e nehenehe oe e parau, “I mua nei, e nehenehe tâua e aparau i nia i te pahonoraa a te Bibilia i teie uiraa, Eaha te mau tauiraa ta te Atua e faatupu i te fenua nei?” A faaohipa i na api 4-5 ia hoˈi atu oe. E nehenehe atoa oe e tuu i te uiraa, “O te hinaaro anei o te Atua ia tupu te mau ati?” Ia hoˈi atu oe, a faaite atu i na paratarafa 7-8 o te pene 1.
◼ Ia vaiiho oe i te vea no nia i te utuafare, e nehenehe oe e tuu i teie uiraa hou a reva ˈtu ai, “Eaha ta te melo utuafare taitahi e nehenehe e rave ia oaoa ˈtu â te utuafare?” Ia hoˈi atu oe, a hiˈopoa i te paratarafa 4 o te pene 14.
◼ Ia vaiiho oe i te vea no nia i te huru papu o te Bibilia, e nehenehe oe e horoa i teie uiraa no ta orua aparauraa i mua nei, “Mea tano anei te Bibilia i te pae ihi?” Ia hoˈi atu oe, a hiˈopoa i te paratarafa 8 o te pene 2.
4. Ia aha tatou ia ore te taata e rave i te buka Bibilia haapii?
4 Ia hope te aparauraa taitahi, a tuu i te tahi atu uiraa ta oe e pahono ia hoˈi atu oe. Ia tamau te hoê haapiiraa, a hiˈopoa i te buka mai te omuaraa e tae atu i te hopea. E ia ore te taata e rave i te buka Bibilia haapii? E nehenehe oe e tamau i te afai atu i te mau vea e e aparau e o ˈna i nia i te Bibilia. A atuatu ai oe i to ˈna anaanatae, e farii paha oia i te pae hopea i te hoê haapiiraa bibilia.
5. No te aha tatou e tutava ˈi i te rave hau atu â i te vaiiho noa i te mau vea?
5 E nehenehe Te Pare Tiairaa e te Réveillez-vous! e faaara i te hinaaro o te hoê taata e faahohonu i ta te Bibilia e haapii mau ra. No reira, e tutava taa ê anaˈe i te haamata i te mau haapiiraa bibilia e te feia e rave i te mau vea. Mea na reira tatou e auraro ai i te faaueraa a Iesu e ‘faariro i te mau fenua atoa ei pǐpǐ, ma te haapii atu ia ratou.’—Mat. 28:19, 20.