A haamori ia Iehova ei utuafare
1 I te tau bibilia, e rave amui te mau melo utuafare e rave rahi ohipa. I te mau mahana atoa, e rave ratou i te mau ohipa fare e te mea faufaa roa ˈˈe, e haamori ratou ia Iehova ei utuafare. (Lev. 10:12-14; Deut. 31:12) I teie mahana, i e rave rahi vahi, mea iti roa te ohipa ta te mau melo utuafare e rave amui nei. Ua ite râ te mau Kerisetiano i te faufaaraa ia rave i te tahi mau ohipa ei utuafare, te haamoriraa iho â râ. Eaha paha te Tumu o te utuafare i te oaoa ia ite i te mau utuafare ia haamori ia ˈna i roto i te auhoêraa!
2 A poro amui: E tahoê te utuafare ia poro amui ratou i te parau apî maitai. No reira, hau atu i te apeeraa ia vetahi ê o te amuiraa i roto i te taviniraa, e poro tamau atoa te hoê matahiapo e ta ˈna vahine e ta ˈna mau tamarii. (Tim. 1, 3:4, 5) Noa ˈtu te hoê porotarama î maitai, e faataa atoa te mau tiaau ratere i te taime no te poro e ta ratou mau vahine.
3 E nehenehe te mau metua o te poro e ta ratou mau tamarii e tauturu ia ratou ia haere i mua ei poro evanelia. Eita noa te mau tamarii e ite i te oaoa e te mauruuru o to ratou mau metua i roto i te taviniraa, e ite atoa râ ratou i to ratou mau metua ia faaite i to ratou iho here ia Iehova e i te taata-tupu. (Deut. 6:5-7) Eiaha teie haapiiraa ia faaea a paari mai ai te mau tamarii. Te tamau noa ra te tahi nau metua i te apee i ta raua na tamaroa e toru i rotopu 15 e 21 matahiti i roto i te taviniraa. Te na ô ra te metua tane e: “E haapii mâua ia ratou i te tahi mea i te mau taime atoa. E e ara maitai mâua e e tupuraa au te reira e te faaitoito.”
4 A faaineine amui: Ua tapao te tahi mau utuafare e mea maitai ia faaineine amui no te taviniraa. E pinepine, mea au na te mau tamarii e rave i te mau faaineineraa ma te horoa i te faaiteraa aore ra ma te hauti i te fatu fare. E rave vetahi tau minuti ia hope te haapiiraa utuafare no te reira.
5 E rahi atu â to tatou oaoa ia rave tatou i te mau ohipa faufaa e te oaoa e te feia ta tatou e here ra. Auê te au ia haa amui te mau melo utuafare i roto i te taviniraa i tera fare i tera fare, i te mau farerei-faahou-raa e te mau haapiiraa bibilia atoa! No reira, ma te haamori ia Iehova ei utuafare, e nehenehe outou e parau ma te oaoa e: “Area vau e to ˈu atoa ra utuafare, e haamori ïa matou ia Iehova.”—Ios. 24:15.