Te poihere nei tatou i ta tatou mau fanaˈoraa taa ê!
1 I te roaraa o te oraraa o te huitaata, ua horoa Iehova na ta ˈna mau tavini e rave rau fanaˈoraa taa ê. Ua na reira oia noa ˈtu e e tane aore ra e vahine, te faito matahiti, aore ra te tiaraa i roto i te oraraa. (Luka 1:41, 42; Ohi. 7:46; Phil. 1:29) Eaha te mau fanaˈoraa taa ê ta ˈna e horoa maira na tatou i teie tau?
2 Te tahi o ta tatou mau fanaˈoraa taa ê: Mea fanaˈo tatou i te haapiihia e Iehova. (Mat. 13:11, 15) Te haamaitairaa ia Iehova na roto i ta tatou mau pahonoraa i te mau putuputuraa a te amuiraa, o te tahi atu ïa fanaˈoraa taa ê ta tatou e poihere nei. (Sal. 35:18) Ia nehenehe tatou e pahono, ia na reira tatou ma te aau tae. Oia atoa, ia hiˈo tatou i te hopoia taitahi i roto i te amuiraa ei haamaitairaa, e rave maitai roa ïa tatou i te reira. Te apiti tamau ra anei tatou i te fanaˈoraa taa ê e tamâ noa e e atuatu maitai i te Piha a te Basileia?
3 E mirioni taata te uiui nei e te faaroo ra anei te Atua i ta ratou mau pure, mea fanaˈo râ tatou e te faaroo ra te Ihotaata faufaa roa ˈˈe o te ao taatoa i ta tatou mau pure. (Mas. 15:29) O Iehova iho te faaroo nei i te mau pure a ta ˈna mau tavini. (Pet. 1, 3:12) Aita o ˈna e taotia ra i te pinepineraa e nehenehe ai tatou e pure ia ˈna. Auê ïa ô faufaa roa ta tatou, te neheneheraa e pure ma te “tuutuu ore”!—Eph. 6:18.
4 ‘Hoa rave ohipa no te Atua’: Hoê o ta tatou mau fanaˈoraa taa ê roa ˈˈe, o te poro-haere-raa ïa i te parau apî maitai o te Basileia o te Atua ei ‘hoa rave ohipa no te Atua.’ (Kor. 1, 3:9) E hopoi mai teie ohipa i te oaoa e te tamǎrûraa. (Ioa. 4:34) E ere hoi i te titauraa ia faaohipa Iehova i te taata no te rave i teie ohipa, tera râ ua horoa mai oia i teie hopoia no to ˈna here ia tatou. (Luka 19:39, 40) Aita Iehova i horoa i teie fanaˈoraa taa ê na te mau huru taata atoa. E titauhia ia faaî e ia pee maite te feia o te apiti i te taviniraa i mua i te taata, i te mau titauraa pae varua. (Isa. 52:11) Te faaite ra anei tatou e mea faufaa no tatou teie fanaˈoraa taa ê ma te faariro i te taviniraa ei tuhaa faufaa o ta tatou porotarama tahebedoma?
5 E faariro te mau fanaˈoraa taa ê no ǒ mai ia Iehova ra i to tatou oraraa ei mea hoona. (Mas. 10:22) Eiaha roa e haafaufaa ore i te reira! Ma te faaite e te poihere mau ra tatou i ta tatou mau fanaˈoraa taa ê i roto i te taviniraa, e faaoaoa tatou i to tatou Metua i te raˈi, Tei horoa mai i ‘te mau mea maitatai i hohia mai e te mau mea tia roa e maitai roa ˈi.’—Iak. 1:17.