“Te horoa nei oia i te itoito no tei rohirohi”

¹ E rohirohi tatou paatoa i te tahi taime. E ere noa ïa no te ohipa aore ra te tahi atu ohipa pae tino, no te mau fifi atoa râ ta tatou e faaû ra i teie “mau taime ati rahi faaruru atâ.” (Tim. 2, 3:1, MN) Ei tavini a Iehova, e nafea e noaa ˈi ia tatou te puai pae varua e hinaarohia ia ore ta tatou taviniraa e taupupu? E na reira tatou na roto i te turuiraa i nia i te ihotaata “puai rahi” ra o Iehova. (Isa. 40:26) Ua ite maitai oia i to tatou mau hinaaro e te anaanatae mau ra oia i te tauturu ia tatou.—Pet. 1, 5:7.

² Ta Iehova mau faanahoraa: Te faaitoito ra Iehova ia tatou na roto i to ˈna varua moˈa, tauâ puai mau ore ra ta ˈna i faaohipa no te poiete i te ao nui. Te tauturu ra te varua o te Atua ia tatou ia ‘noaa te etaeta apî’ ia rohirohi noa ˈtu tatou. (Isa. 40:31) A uiui ia oe iho, ‘Anafea te taime hopea i to ˈu iho â râ pureraa no te ani i te varua moˈa ia faaitoito mai ia ˈu ia rave i ta ˈu mau hopoia Kerisetiano?’—Luka 11:11-13.

³ Na roto i te taioraa e te feruriruriraa i te Parau faaurua a Atua i te mau mahana atoa e te faatamaaraa ia tatou i te pae varua maoti te hoê haapiiraa tamau i ta tatou mau papai Kerisetiano, e au ïa tatou i te hoê “raau [oraora] i tanuhia i te hiti anavai ra, o tei hotu i to ˈna ra tau mau, e o tei ore roa i maheahea to ˈna rau.”—Sal. 1:2, 3.

⁴ Te faaohipa atoa ra Iehova i te mau hoa Kerisetiano, o te nehenehe e “haamahanahana” ia tatou. (Kol. 4:10, 11) Te faaitoito ra ratou ia tatou i te mau putuputuraa a te amuiraa na roto i ta ratou mau aparauraa, pahonoraa, e oreroraa parau o te patu. (Ohi. 15:32) Te horoa ra te mau matahiapo iho â râ i te tauturu pae varua e te faaitoitoraa o te faaoraora faahou.—Isa. 32:1, 2.

⁵ Te taviniraa: Mai te peu e te rohirohi ra oe, eiaha e faaea i te poro! Taa ê roa i te tahi atu â ohipa e rave rahi, e tamahanahana iho â te apiti-tamau-raa i te taviniraa ia tatou. (Mat. 11:28-30, MN) E tauturu te pororaa i te parau apî maitai ia tatou ia tiatonu i te Basileia o te Atua e ia haamanaˈo noa i te tau mure ore e to ˈna mau tiairaa faahiahia.

⁶ Mea rahi te ohipa e rave hou e haamouhia ˈi teie faanahoraa ino. E rave rahi tumu ta tatou no te vai aueue ore i roto i ta tatou taviniraa, ‘ia au i te [puai] ta te Atua e horoa maira.’ (Pet. 1, 4:11; MN) Maoti te tauturu a Iehova e faaoti ai tatou i ta tatou ohipa, no te mea “te horoa nei oia i te itoito no [tei rohirohi].”—Isa. 40:29; MN.